مصر

أنا مش بكتب الكلام ده عشان أشفق على نفسي، لكن يمكن لأول مرة أتكلم بصراحة... أنا شاب، ويمكن من برّه شكلي طبيعي، بشتغل وبضحك وبهزر زي أي حد، لكن من جوّه فيه إحساس دائم بالوحدة والتيه صعب أوصفه. معظم وقتي بقضيه لوحدي... أقعد على البحر بالساعات أبص للموج وأفكر، أنزل أتمشى لوحدي في الشوارع من غير هدف، وأسافر لوحدي للقاهرة ومطروح ومحافظات تانية بس عشان أشوف الدنيا وأغير جو. دايمًا الناس بتشوف الصور والرحلات، لكن محدش بيشوف كمية الصمت اللي وراها. الغريب إني طول عمري ما عرفت أكون صداقة حقيقية تدوم، ولا عرفت أحس إن عندي شخص ثابت في حياتي أقدر أرجعله وقت ما أتعب. كل ما أحاول أقرب من حد، بطريقة أو بأخرى بلاقي نفسي لوحدي تاني. حتى الحب... عمري ما عرفت أعيشه بالشكل اللي كنت بتمنى أعيشه. كنت خاطب في يوم من الأيام، وحلمت زي أي شاب ببيت واستقرار وحياة هادية، لكن النصيب مكانش كاتب إننا نكمل. ومشكلتي إني حنين زيادة عن اللزوم. يمكن زيادة عن الحد اللي المفروض يكون موجود. بحب أهتم، وأسأل، وأطمن، وأكون موجود. لكن بقيت محتار... هل الحنية دي بتتفهم غلط؟ هل الناس بتشوفها ضعف؟ ولا بتعتبر إن وجودي مضمون فمش بتحس بقيمته؟ بجد مبقتش عارف. بقيت ساعات أسأل نفسي: هو العيب فيا؟ ولا أنا بس لسه ملقتش الناس الصح؟ ليه كل مرة أتمسك بحد يبعد؟ وليه دايمًا بحس إني الشخص اللي بيدي أكتر ما بياخد؟ عندي 26 سنة، والمفروض في السن ده أكون ببني حياة مستقرة، لكن الحقيقة إني لسه بدور على شعور بسيط جدًا... إني أحس إن فيه حد موجود عشاني بصدق، حد أقدر أكلمه من غير ما أحس إني تقيل، حد يفتقدني لو غبت، وحد يختار يفضل جنبي من غير أسباب ولا مصالح. يمكن أكتر حاجة وجعاني إني اتعودت على الوحدة لدرجة إني بقيت بعرف أعيش بيها، لكن عمري ما حبيتها. وفي الآخر، رغم كل حاجة، لسه عندي أمل إن ربنا يعوضني عن كل مرة اتخذلت فيها، وعن كل مرة حسيت فيها إني لوحدي وسط الناس، وإن يجي اليوم اللي ألاقي فيه مكاني الحقيقي وسط ناس تحبني لكوني أنا، مش للي بقدمه. يمكن أنا تايه شوية... لكن لسه بدور. 🖤

جماعه عاوزه اتناقش في موضوع دلوقتي طبعا شايفين أحوال التعليم ازاي في مصر و أن هي متدهوره و كلها غش و كده ودا مسببلي خمول رهيب و احباط اني مش عاوزه اذاكر و من بدايه ثانوي وانا معرفش المنهج بيقول اي و بدخل الامتحان علي الله و دلوقتي انا داخله ٣ ث و اكيد عندي احلام و كده خايفه الخمول دا يصيبني في السنه دي و اكيد مش هحب كده حد كان زيي و انا اصلا شايفه أن ثانوي هي اللي منعاني اشتغل علي احلامي و كده و حرفيا كارهه المذاكره و رافضاها تماما فحل بقي قبل ما ابدأ السنه

عندي فترة متعرفة على واحد مصري ونا مش مصرية مالفايس بس و نتكلم واتس مرات مكالمات و نادرا فيديو كول...الشخص هذا توافقت معاه جدا ...يعاملني بطريقة محترمة و يبين انه معجب بي و مرات يصرح انه يحبني ...اما انا عادي ..انجذبت ليه مؤخرا و من اول مرة متفقين انه يعنل خطوة و يتقدم فكنا بنهيأ الوضع ..شوية بشوية نتعرف على بعض و اسئلة ووو مرة كلم ماما و تعرفت عليه .و بعدها بشوية كلم اخي و قاله مرجبا بيك تجي تخطب ..و كل الامور تمام هو حاليا يجهز ف امور الفيزا ووو اما انا لصبحت مترددة و متخوفة لما صارت الامور تمشي و تتحقق ..هو صح اثبت انه يريدني ك زوجة و بناء اسرة ووو الموضوع اني انا خايفة يكون يمثل علي و لا مخبي علي امور ولا يطلع مجرم ولا يرميني بعد زواج ولا يستغلني ..حتى ان اسال عليه في بلده مالقيتش فرصة وخصوصا كل حكايات لي نسمع بهم كارثة من زواج بأجانب المهم حابة وحدة تكون من مصر محافظة البحيرة ولا سيموحة ..لو تقدر تقدملي مساعدة اسألها عن الشخص هذا

لاحظت انه اغلب الناس هنا مصريين ف لو اخد منكم شوية وقت و اطلب مساعدة من ناس طيبة انا قبل ثلاث سنين كده كنت مدمنة روايات و مستهلكة كبيرة على وجه الخصوص للكتاب المصريين بحب افكارهم و اسلوبهم فعايزة ارجع اقرأ و مش عارفة ابدأ منين ف عايزة قتراحات لو عندكم ارجوكم و شكراا اوي لأي عابر

انا دلوقتى عايش فى مصر لوحدى تماما اهلى كلهم قرايبى كلهم برا مصر و ساعات بوصل لنقطه انى لو حصلى حاجه وانا فى البيت محدش هيعرف غير لما يطلعلى ريحه مع العلم حالتى الماديه متيسره جدا و شغل كويس جدا بس زهقت من التوحد الى انا فى دا

بعد سن التلاتين الانسان بيصبح اكتر نضج ام اكتر سلبية ؟! اعتراضات اقل .. بمشي الدنيا .. بيعدي كتير .. بس لو اتكلم بينفجر!! حقيقي طبيعة الحال في مصر بتخلي التلاتنينات مش شباب خالص.. مدعكة شغل.. عك حواليك في كل حاجة .. مينفعش تعترض .. مينفعش تصلح .. بكابورت حرفيا! 🤮

الرجالة في مصر بيحبو في العشرينات العلاقة بتفشل بيخشو الجيش بیخرج عايز يبدأ حياته يبدأ حياته يلاقي نفسه بقا عنده ٢٧ سنة بيحس ان الحياة بتجري منه وصحابه اتجوزو هنشيل عيالك امتا احنا مش عايشنلك طول العمر بيدور على واحدة مناسبة عشان يرضي اهله ويحس انه مفاتوش حاجة بلا مشاعر بلا رغبة

الواحد قرف وزهق من وضعه، مفيش جديد السنه دي زي الي قبلها والي قبلها وحياتي زفت لسه ومكرره جدا، عاوز اتغير واعمل اي حاجه بس مش عارف، عاوز انزل اشتغل واعمل فلوس واعمل اي حاجه نفسي فيها بس مش عارف، مش لاقي شغل فلوسه حلوه، الي موجود استعباد حرفيا مش شغل، فعلا الحياه في مصر مش حياه، اتمني من كل قلبي اعرف اخرج منها

جايلى عريس كويس مسافر برة مصر لكن شقته ف مكان بششعععععع ومتنفعش بتربى فيها طيور حتى مينفعش حد يدخل فيها ، اتكلمت معاه ف البدايه ان الشقه مشكله قال هجيبلك اللى انتى عيزاه قولتله براحتك ناجر عادى ، بكلمه تانى يوم يقولى لا انا مش هعرف اسيب مامتى ، ومش هغيب كل دة ولما اجى انزل مصر شهرين ابعدهم بعيد عن امى وامى مش هترضى والكلام كله اتغير ، انا رافضة الشقه بشكل قطعى رغم انى قولتله انى معنديش اعتراض ع شخصة وانى معاه ف كل الحالات بس بلاش الشقه دى ويحاول يشوف حل وسط م بينا ، مكلمنيش من وقتها ولا بعتلى وبعتله مردش عليا ولا رد عليا اعمل ايه اتنازل واقبل بس الشقة قذرة بجد وهو مش عايز اصلا يطرح اوبشنز تانيه ، المفروض اعمل ايه ، اقل حاجه المفرروض يكون ف شقه كويسه ف مكان كويس ولو ايجار حتى

- استبدال المواصلات العامة في مصر بالمواصلات الخاصة هو من الرفاهيات المنسية! من أول إنك تطلب أوبر، أو حتى تاخد توكتوك لوحدك بدل م تتزنق ف ميكروباص حاجة بتحافظ على كم مش طبيعي من الوقت والجهد والطاقة والصحة، وبتحافظ على شكل الواحد يفضل مش مبهدل ونضيف مش مترب ومجهد ولبسه باظ حزينة والله وأنا بقول من "الرفاهيات"، بس المواصلات العامة نفسها غليت بشكل مش طبيعي فعلا، وبقت تعجيزية لشريحة كبيرة.. ربنا يرحمنا برحمته ويرزق الناس كلها عموما، والبنات خصوصا، مواصلات وعيشة سهلة ويسيرة. يارب عربية جي كلاس من حيث لا أحتسب يارب يا واسع )"😭💗💗💗💗🦆