نصائح مؤذية

قررت المرة دي ما أكتبش مشكلة ولا أتكلم عن وجع حصل لي أو موقف مضايقني… النهارده هكتب حاجة مختلفة خالص، يمكن تكون كلمة بسيطة، بس طالعة لوجه الله، من غير أي غرض غير إنها توصل لحد يفكر قبل ما يوجع حد تاني بكلمة أو تصرف. يمكن اللي هقوله ده مش هيعجب ناس كتير، ويمكن يتفهم غلط كمان، بس الحقيقة إن في حاجات بنعديها كل يوم من غير ما ناخد بالنا قد إيه بتسيب أثر جوه الناس… كلمة، أسلوب، طريقة كلام، أو حتى “نصيحة” بتتقال بشكل جارح ومش محسوب. في ناس كتير بتكون أصلًا تعبانة ومش شايلة من الدنيا حاجة، وتيجي كلمة كمان تزود الحمل عليهم بدل ما تهونه… ومحدش بيحس باللي جوا غير اللي بيعيشه. عشان كده حبيت أكتب الكلام ده، مش علشان ألوم حد، لكن علشان نفكر سوا… يمكن حد يراجع نفسه قبل ما يكون سبب في وجع حد تاني، أو في دعوة طالعة من قلب مكسور مش هتسكت بسهولة. يعني ناس كتير داخلة تنصح وهي أصلًا لا عاشت التجربة، ولا فاهمة أبعادها، ولا حتى فكرت دقيقة في تأثير كلامها على اللي قدامها. اللي مستغرباه فعلًا إن في ناس بتتكلم بقلة ذوق أو بأسلوب مستفز جدًا، ولما تعترضي يقولك: "دي نصيحة!" مشكلتي مش مع النصيحة، مشكلتي مع الناس اللي فاكرة إن قلة الذوق اسمها صراحة، وإن التجريح اسمه نصح. لو أسلوبك مستفز ومؤذي، متستغربش لما الناس ترفض كلامك حتى لو كان فيه جزء صح. هو من إمتى النصيحة بقت إهانة؟ ومن إمتى احترام مشاعر الناس بقى حاجة اختيارية؟ النصيحة مش مجرد كلام بيتقال وخلاص، النصيحة أسلوب وتوقيت وذوق وإنسانية قبل أي حاجة. لأن ببساطة، مهما كان الكلام صح، لو اتقال بطريقة مؤذية فغالبًا أول حاجة هيوصلها الطرف التاني هي الأذى، مش المعنى. وأعتقد أي حد طبيعي هيقابل أسلوب هجومي أو متعالي هيتضايق من الطريقة قبل ما يفكر أصلًا في المحتوى. والأسوأ من ده كله إن كل مرة بلجأ فيها للمكان ده بكون أصلًا موجوعة ومحتارة، وبعد ما تكون سبل الحلول قلت معايا ومش عارفة أعمل إيه. فبدل ما ألاقي حد يساعد أو يهون، بلاقي أحيانًا ناس بتحط النار على الجرح وتزود الوجع أكتر. بجد رفقًا بالناس شوية. مهما كان الشخص غلط، ومهما كنت شايف إنه محتاج يسمع الحقيقة، مفيش حد هيحب حد يهزقه أو يقلل منه أو يكلمه بطريقة جارحة. ومحدش بيتقبل الإهانة على إنها نصيحة. لو فعلًا هدفك تساعد، حاول تفهم قبل ما تحكم، واسمع قبل ما تهاجم. لأن اللي قدامك ممكن يكون بيحارب ظروف أو مشاعر أو وجع أنت متعرفش عنه حاجة. وفي الآخر، أي حد طبيعي هيركز في الأسلوب قبل الكلام. ولو الأسلوب كان مؤذي، غالبًا هيعترض ويقفل قلبه عن أي معنى كنت بتحاول توصله. مش كل الناس محتاجة أحكام، أحيانًا كل اللي محتاجينه شوية رحمة وكلمة تتقال بإنسانية. 💔🙂