هويات

تفتكروا ممكن أبدأ حياتى من أول وجديد؟!.. تفتكروا ممكن أقدر حتى لو حاسة ان الوقت إتأخر؟! ٣١ سنة هو عمري؛ وقت قضيته ف الدنيا دى من غير م أعرف أستمر ف أى حاجة.. علاقات؟.. ارتباط او صداقة مكنتش بكمل..شغل؟ حاولت أشتغل من باب إنى أتشاف بعمل حاجة لكن أكتشفت انى مش شخصية شغل.. حتى الهوايات عندى هوايات كتير كنت بتحمس جدا فالاول بس مكنتش بكمل.. حاولت أعمل براند خاص بيا مكملتش.. حاولت أعرف أنا عايزة ايه وحسيت انى حد مرتبط بالبيت أكتر وانى ك بنت مش مطالبة بأكتر من إنى ابقى عارفة دوري ف الحياة وأشتغل ع عقلى.. كنت بقعد فترات كبيرة مش بخرج من البيت مش بتكلم مع حد أو حتى أصحابي.. حتى الإرتباط من خلال زواج الصالونات كل م كنت بقعد مع عريس بحس انه بعيد اوى جدا عن الشخص الى بتمناه .. ودا مش لعيب ف جواز الصالونات ع اد م انا الى شخصيتي ملغبطة .. زمان كنت بتمنى ان لما عريس يجي يجي عشانى انا عشان هو قاصدنى انا شخصيتي وملامحى وعقلى وأفكاري مش مجرد بيدور ع حد مناسب بس انا كنت بصد أى حد بيحاول يقرب مش بقول أعمل حاجة غلط بس إسلوبي وقتها كان بيتفهم بشكل انى برفض .. انا كنت متخيلة ان الشخص الصح هيفهمنى حتى لو من برا رد فعلى مختلف.. كبرت شوية وحسيت ان شخصيتى أقرب للنقاب ف لبست النقاب وتقريبا كنت بخرج قليل اوى وبالعكس بعد النقاب جالى عرسان اكتر بكتير من قبله وناس كلهم زى الفل بس بعيد جدا جدا عن الى ف دماغى .. هو مجرد عريس عايز زوجة بتطبخ وبتقول حاضر ونعم وفاهمة يعني ايه طاعة.. انا فاهمة ان دى حاجات مهمة بس مش بالشكل دا.. انت مش بتبقى عايز تكون مع حد عشان هو كله اوبشنز انت بتكون عايز تبقى معاه رغم عيوبه انت بتبقى شايف عيوبه بس عايز تكون معاه .. لكن جواز الصالونات حاليا بقى ان كل طرف يبين احسن م عنده ودا الى بيعمل تصادم بعد كدا لان محدش فيهم كان حقيقي بس فنفس الوقت انا عمري م هعرف ادخل علاقة مش في إطار صح!! فهمتوا حاجة وفهمتوا انا ليه شخصية ملغبطة ؟! لانى انا ساعات مش ببقى عارفة انا عايزة ايه ..انتى تبع دول ولا تبع دول.. الى انا متأكدة منه انى بس مش عايزة اعمل حاجة غلط او حرام انا عايزة أتحب بس بطريقة ترضي ربنا ومحدش ييعرف يوزان دا دلوقتي.. فكرة الشغل انا مش بحبه بس فنفس الوقت م انا مش هفضل عايشة كدا معرفش حاجة عن الدنيا ولا حد يعرف انى موجودة اصلا.. عايشة بين انى أقرا وأرسم ومستمتعه بالبيت بس كارهة فكرة الايام الى بتعدى بسرعة .. ٣١ سنة ف مجتمع المحسوبين ع المتدينيين بالنسبالهم كدا اناكبرت لذلك عايزة أطلع من وسطهم قصدي مكونش محسوبة عليهم.. اعمل الى يرضى ربنا بس أعيش حياتى محتاجة إنى أكون متشافة أبقى خفيفة .. مش عايزة اشتغل بس عايزة انزل امارس هواياتى أثاحب ناس جديدة.. بيتقالى كتير انى انا زى ماانا كدا هو دا الصح والفطرة السليمة لكن انا جوايا حاسة انى غريبة وبرا بحس انى غريبة ومع كل دا بقيت حاسة او هما حسسونى انى بقيت متأخرة وانا من جوايا معرفتش حاجات كتير ف الحياة ويادوب لسة هبدأ ف هينفع أيدأ بعد التلاتين؟