رعاية المسنين

Potato_76035 🇪🇬

منذ أسبوع واحد

شعور لا مبالٍ

عبّر عن شعورك بشكل مجهول

من أربع أيام، الساعة 11 بليل وانا ماسك موبايلي أشغل حاجة جنبي لحد ما أنام، بمجرد ما مسكته جاتلي نوتفكيشن إن خالي اتوفى
خالي كان مهندس معماري وكان من أكتر الناس في دفعته شهرة، اشتغل في شباب ولمدة عشرين سنة ويمكن أكتر مخطط مدن في دول خليجية وله تصميمات معمارية مشهورة كتيرة في القاهرة ممكن تكون بتعدي عليها كل يوم وماتعرفش مين اللي عملها
من تلت سنين كانت صدمة كبيرة شوية لما ماما قالتلي إن خالي جاتله جلطات في المخ وهيجي يقعد معانا فترة علشان نراعيه، مراته بعد ما انفصلوا اتوفت قبلها في الكورونا، وولاده كلهم بقوا عايشين برا مصر، وبقية اخوات ماما أشقاء وغير أشقاء يا اما برا مصر يا ماتوا من زمان يا اما ماعندهمش مساحة انهم يستقبلوه ويرعوه بعد ما طلع من المستشفى

خالي وانا طفل ياما كان بيتخانق معايا وبيتناقش في اللي بقراه في وقت ماحدش كان بياخدني فيه بجدية وكنت طفل وحيد، اخواتي أكبر مني بفرق سن كبير شوية فعلى ما ابتديت أوعى كانوا سابوا البيت واستقلوا بحياتهم، والدتي شغلها واخدها وأبويا ماليش أي علاقة بيه من صغري بعد انفصاله عن ماما، وأكيد مش محتاج تخمن إن ماكانش ليا صحاب كتير في المدرسة والدروس علشان مافيش حاجة بتجمعني بيهم ولا أراضي مشتركة، فزيارات خالي مناقشاتنا وانا لسة عيل صوته ناعم ورفيع ومايعرفش حاجة عن العالم غير من اللي بيقراه في الكتب وبيشوفه في الأفلام وبيسمعوا في أغاني الروك، كان دايما وجوده في البيت على فترات قصيرة بيدي حياة شوية للبيت وبيديني مساحة أختبر الأفكار اللي عندي

لكن كل صورتي عن خالي المهندس المعماري العبقري اتبخرت بعد دا بسنين لما جالنا البيت بعد ما طلع من المستشفى بعد ما حرفيا كان بيصارع الموت، الحاجة الوحيدة اللي بتميزه - مخه - اتعطلت، بيكون كلمتين بالعافية، بيسأل نفس السؤال خمس مرات في عشر دقايق، مابيقدرش يمشي لوحده، ماعدش واعي بأي حاجة حواليه، وملامح براءة وسذاجة أطفال بقت على وشه، أي حاجة هتقولهاله هيصدقها، وسواء صدقها أو ماصدقهاش فدا مالوش معنى لأنه هينسى وهيسألك تاني

في أغلب الوقت كنت انا اللي معاه في البيت وبديله حقنه وأدويته بعد خناق كتير، كأني بشوف نسخة الطفل مني اللي بيهرب من حقنة التطعيم، أو عيان شوية وكل اللي حواليه بيخدموا عليه علشان مايحسش بأقل قدر من الألم، وبعدين رمضان جيه ودي كانت خناقات كبيرة بينه وبين ماما وزعيق مابيقفش في البيت لأنه مش عايز يصوم، هو ناسي كل حاجة بس مانسيش احتياجاته الأساسية في الحياة، السجاير والنيسكافيه البلاك اللي مابيبطلش شربهم طول الوقت، كل محاولاتنا في اننا نضحك عليه وناخده على قد عقله ونخبي عنه علب السجاير او نخليه يصوم بالعافية فشلت، الصيام ماكانش بس احتياج ديني هنا، هو فعلا كان محتاج مايشربش سجاير ويبتدي ياكل أكل صحي علشان الأدوية تشتغل قبل ما الحالة تسوء

رمضان عدى ومشي في أول يوم عيد، قعد معانا الفترة دي كلها لحد ما الحجز بتاعه يتم في دار للمسنين خاصة بمرضى الألزهايمر، وعلى قد ما كنت مرتاح يوم ما مشي إن الخناقات والزعيق ووالرعاية كلها هتنتهي، على قد ما كنت زعلان علشان انا عارف إن صورة خالي اللي أعرفه في طفولتي انتهت ومافيش سبيل لإرجاعها، آخر الألوان الوردية اللي كنت محتفظ بيها من طفولتك الألزهايمر اللي بيسحب الحياة والنور من حياة أي حد خطفها منك

في خلال التلت سنين اللي قضاهم في المصحة ماما رفضت تروحله لأن حالته كانت بتسوء أكتر وأكتر، تخيل كل الممرضين والدكاترة والمسئولين اللي في المكان فشلوا في انهم يسيطروا عليه ويخلوه يبطل سجاير، والألزهايمر اللي بيخلي المخ يتحلل ويتراجع كمان بياكل النهايات العصبية، ماكلمتوش غير مرة واحدة على التليفون وكان فاكرني حد من عيلتنا مات في التمانينات، وفي أواخر أيامه المرض كان ساء لدرجة إن الماية والأكل بقوا بيروحوا دايركت على الرئة ومابقاش عنده صوت حتى يتأوه

في آخر أسبوعين كانت الفكرة عمالة تلح عليا إني أروح أزوره وكنت مقرر إني الأسبوع الجاي دا هروحله، علشان من أربع أيام تيجيلي الرسالة أول حد إنه اتوفى، ولحد دلوقت مش حاسس بحاجة، مافيش غضب، مافيش عياط وشحتفة، مافيش غير إني مهدود وحاسس إن الطاقة كلها مسحوبة مني وماعنديش أدنى تركيز، بفكر في كل الاحتمالات البديلة، بفكر في الـ legacy اللي سابه ورايا اللي بقى منبع حزن وألم بالنسبة لي على كل الإمكانيات المهدرة، وفي إني كنت بحبه لدرجة إني صعبان عليا النهاية دي وإنه كان يستاهل وداع أحسن، بس دا بيكون حب مؤلم إنك تكون بتحب حد أكتر ما هو بيحب نفسه، أو إنك تكون بتحب حد مخه متعطل لدرجة إنه مش مدرك معنى الحب من أساسه

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Banana_69959 🇪🇬

منذ 3 أسابيع

شعور وحيد

أنا دلوقتي 33 سنة و لسه عايش مع أبويا و أمي هما الإثنين فوق ال 70 سنه والدي عندو زهيمر في مرحله متأخره جدا فمتطر أجيب حد جليس معاه في الوقت إللي أنا بكون فيه في الشغل و بأخد بالي من لما برجع والدتي كبيره و مريضه الوضع ده بقالو 8 سنين تقريبا أنا دلوقتي حاسس بوحده شديدة جدا جدا و بفكر في الزواج بس

Donut_81901 🇪🇬

مشاعر متلخبطه بعد الطلاق.. عاوزه يحس بقيمتي

بعد الطلاق مبسوطه ومش مبسوطه مشاعر كتير متلخبطه ده مش معناه اني عاوزة ارجع بس يرده عاوزاه يحس بقيمتي وبكل اللي كنت بعمله علشانه بس عاوزة احب واتحب حاسه انه مستحيل وانا معايا ولاد لو كلمت حد يبقي كلامه كله خارج او بيفكر ان المطلقه فريسه سهله معيطتش في حضن حد علي عمري اللي عدى رغم اني كنت باينه قويه بس كنت محتاجه انهار بس ملقتش حد ممكن اعمل كده في حضنه ناس كانت فاكرة اني لو عيطت ابقي ندمانه وده صعب يتندم عليه بس عمري اللي عدى وسنين راحت كنت محتاجه انفصل بدري الاقي فرصه جديدة اعيش في حب وراحه وامان كتير بسال نفسي هي خلاص حياتي وقفت كده وحزعل لو عرفت انه اتجوز وخابفه العمر يجري اكتر فرص كل حاجه راحت شغل وحب وجواز كتبر بسال نفسي هو انا كان المفروض اتحمل علشان البديل مش حلو ولا انا كده صح وفي حاجه تهدى من وجع قلبي يمكن علشان كتمت الوجع وعملت نفسي جدعه حاسه انه بيطلع عليا ...عرض المزيد

3 الدعم

29 نصيحة

Pear_51536 🇪🇬

زعلانه علي نفسي وبتمني زوج صالح يطبطب عليا

زعلانه علي نفسي اوي حرفيا قلبي زعلان بتمني حاجات كتير و حاجات اصلا طبيعيه ولا حاجه بتحصل منهم نفسي اكون بيت و اسره هاديه و جميله نفسي ف زوج صالح بجد يكون عوض ليا انا اتحرمت من بابا .. نفسي ف زوج يخاف عليا و يحبني و يموت فيا انا انا وبس و يملي عيني حرفيا محتاجه زوج صالح بتمني كده من وانا صغيره و تعبت انا 27 سنه و نفسي ف حد يطبط عليا .. ادعولي من قلبكوا و لكم المثل لان نفسيتي زي الزفت بسبب كده... و انا مش كاتبه كده عشان حد يدخل يتقدم ادعولي بس من قلبكوا ...عرض المزيد

8 الدعم

24 نصيحة

Marshmallow_69067 🇪🇬

مش بحب عيد ميلادي.. كل سنة وانا طيبة

انا مبحبش يوم عيد ميلادى بس هو النهاردة ١٥/١١ قولولى كل سنة وانتى طيبة😅😅.. كل عيد ميلاد ليا بقفل اكونتاتى عشان محدش يعملى بوست عملت كل حاجة عشان أختفى من أذهان كل الناس الى حوليا تعمدت دا .. بس النهاردة بحاول اتفاءل شوية عيد الميلاد بالنسبالى شئ حزين مش مفرح لان كل سنة الإنسان بيكبرها بتقربه من الموت .. سنين كتير عدت من غير م نحس بيها.. لما بتعدي علينا ذكري ميلاد حد بنحبه بس هو مش موجود او مات بنحس مشاعر مش لطيفة.. بستشعر ان كل الذكريات حزينة حتى الذكرى المفرحة لما بنفتكرها بعد وقت طويل بنفتكرها بحزن لاننا بنحس انها مش هتتكرر.. ديما الأيام واللحظات الحلوة بتكون ف الماضي كل م بنكبر الحياة بتبقى أصعب و إستقبالنا لأى شئ مفرح بيبقى بحماسة أقل.. بس مش يمكن الانسان محتاج يعيش الوقت زى م هو وخلاص كدا كدا أيام محسوبة علينا.. أتمنا الايام الجاية تكون شيلالنا أفراح كتير وجبر من ربنا أتمنى خلال السنة دى ربنا يحققلى كل الاحلام والدعوات الى متحققتس ف عمري كله وانا مش رابطة الموضوع بعيد ميلادى هو مش مولد السيد البدوى 😂😂 هو مجرد انى بحاول اتفاءل ...عرض المزيد

5 الدعم

23 نصيحة

التجربة أفضل عبر التطبيق

حمّل تطبيق توهيل على هاتفك لتجربة أسرع