مساء الخير البوست طويل بلا هدف كلام فارغ ملوش لازمة مش مهم حد يقرا اكتشفت ان استجابتى للحاجات اللى اتقالتلى وانا صغيرة بدات تظهر بشكل كبييير لما كبرت ..... كل المواقف اللى كانت بسيطة وطنشتها وانا صغيرة بس سابت اثر جوايا بترجع تظهر تانى ..... المشكلة انى اتكتب علياا مبقاش فاهمة اللى انا حاسة بيه ، لما كبرت بقيت فاهمة ان اللى كنت فيه وانا صغيرة خوف ، وحدة ، قلق ، كنت فى بيئة مضغوطة نفسياا من كل اللى فيها ودة انعكس عليا ...بس وانا صغيرة مكنتش فاهمة ، ودلوقتى انعكاس دة على شخصيتى بردو مش فاهمااه ..... لما عرفت ان اهلى اتطلقوا وانا عندى سنة ورجعوا بعدها على طول عرفت وانا فى اعدادى تقريبا ومش من امى او ابى اصلا من برا ، وقتها معتقدش انى اخدت اى رد فعل بس عدى دلوقتى اكتر من 4 سنين ولسة بردو اى خلاف بين امى وابى او حتى نقاش عادى مجرد صوتهم بيتكلموا سوا بيخلى قلبى يتقبض برغم ان الحمد لله دلوقتى خناقاتهم اقل كتيييير ، معرفش دة تاثير الخناق والمشاكل زمان ولا بسبب معرفتى بطلاقهم قبل كدة ولا بسبب ايه معرفش ، كل اللى متاكدة منه ان قبل ما اعرف بطلاقهم كنت مهما زادت الخناقات بينهم لو هيولعوا فى بعض كنت ببقى متطمنة لان بالنسبالى الطلاق دة مش اوبشن اصلا ولا حاجة ممكن تحصل ، بس اما عرفت استوعبت ان لا عادى ممكن تحصل ..... ساعات بتمنى انهم مرجعوش ، امى اتظلمت فى الجوازة دى كتيير ، الضغط اللى هى اتحطت فيه انعكس علينا انا واخواتى كتيير ، وساعات مبقدرش استوعب لو مرجعتش كان ايه اللى هيحصل ، اكيييد كانت هتتجوز دى كانت 22 سنة ، امى رجعت لابى وقتها عشانى انا بس ، ساعات بحس بالذنب لمجرد انها استحملت كل دة عشانى وانا بتخنق من الضغط اللى بتحطنى فيه ..... عارفين احساس انكم تبقوا متاكدين مليون فى المية ان كل اللى حواليكم بيحبوكم اووى ويعملوا اى حاجة عشانكم بس انتو مش حاسين باى حاجة ، لا بحبهم ولا بكرههم زى اى حد ، مبحبش حد ومبكرهش حد ، مفيش حد ليه تاثير عليا عشان اتمسك بوجودة او يفرق معايا ، حتى لو حد مات مش بتاثر ، اصل ايه يعنى معدش هشوفه عادى ..... وانا صغيرة لما كنت اتخانق مع ابى امى امى عشان تتلاشى الخناق دة كانت تقولى اول كا ابوكى يدخل البيت خدى نفسك واقعدى فى اوضتك لحد ما يمشى ، وقتها مكنتش بعرف اعمل كدة اصل طفلة هقعد فى اوضة لوحدى بارادتى بالساعات ازاى ..... وكبرت وعدت سنين وحاليا بخرج من باب اوضتى بمعجزة ..... مكنتش الطفلة اللى بتعيط كتيير بس المرات اللى عيط فيها مهما عدت سنين مبقدرش انساها بالذات لو بسبب امى او العياط دة كانت امى شايفاه وسابتنى ، خصوصا انى عمرى ما عيط عشان حاجة مادية مكنش بيفرق معايا اصلا ، بس كتير كنت اعيط عشان مقعدش لوحدى سواء بقا عايزة اقعد معاها هى مع جدو مع تيتة اى حد بس مش لوحدى ، لحد دلوقتى يمكن اسوا احساس يمر عليا انها تشوفنى بعيط وتطنش وتمشى او تقف تزعقلى عشان مش عاجبها السبب ..... حياتى مش مأساوية خالص يا جماعة يمكن دة احسن سيناريو ممكن تشوفوه هناا ، بس هو مجرد كلام فى الفاضى مش هيغير حاجة بحاول افضى دماغى مش اكتر .....

0

4