أنا عندي كلام كتير ومش عارفة ابدأ منين بس انا مشكلتي ف بابا، لما كنت صغيرة مكنش اغلب الوقت معايا بسبب ظروف شغله وانا متفهمة ده جدا بس الوقت اللي كان بيبقى موجود فيه مفتكرش ذكريات حلوة كتير مع بعض بابا كان عنده الحزام أساسي واحنا صغيرين كان عندي 7و 8 سنين وكان بيضربني بالحزام أنا مش عارفة ايه الغلطة الشنيعة اللي ممكن يعملها طفل ف السن ده يخليه يضربني، حتى من قريب كنت بحكيله على حد من اصحابي والدها بيضربها وبقوله تأثيره النفسي عليها وقد ايه فعلا الضرب ده شيء مؤذي بعدها بكام يوم حصلة مشكلة مع اخويا وهو كان غلطان ولما بابا جيه يسألني أنا جالي انهيار عصبي وبقيت ازعق لدرجة اني قطعت التيشيرت بتاعي كل ده بدون وعي حتى مش فاكرة أنا قولت ايه بس بيقول اني كنت بقولهم انتم عايزين ايه مني راح هو ضربني على وشي بالقلم لدرجة أن نظارتي طارت من وشي وقعدت اصوت واعيط وجسمي يترعش وهو كمل عليا وكل ضربه كان على وشي وانا كنت بصوت ومش قادرة اتحكم ف نفسي ولا ف رعشة جسمي بعدها طلع وانا فضلت اصوت ومكنتش قادرة اوقف بعدين دخل اخويا قالي كل يوم هنمسيكي بعلقة ونصبحك بعلقة، وقبلها بيومين عشان ماما قالت إن ده سبب ضربه ليا كنت بقوله هنزل كورس تبع الجامعة وهو اساسا كان موافق من قبل ما أقدم والكورس كان ببلاش عشان محدش يقولي ماديات راح قالي لا قبله بيوم روحت قولتله انت قولتلي ماشي وقالي أنا مقولتش ليكي حاجة وانا ساعتها مسكت التليفون وقولتله إن شاءالله هنشوف وهو اتعصب وانا أقوله إن شاءالله وبكرة هنشوف راح اتعصب جامد وكان هيحدف حاجة عليا بس ماما حاشته عني وانا فعلا كنت قاصدة اعصبه لأن مينفعش توعد حد بحاجة وتوافق عليها وترجع تقول لا ودي مش اول مرة يعمل معايا كده وانا ببقى متعشمة وبرسم خطط ويجي مرة واحدة يرجع ف كلامه، وكمان ف ثانوية عامة ف عز ضغطي النفسي واكتر وقت محتاجه فيه حنان ضربني مرتين عشان خاطر اختي ولأسباب تافهة جدا ومرة فيهم اختي اللي كانت غلطانة، وكان عندي حلم اني اكمل ف الكاراتيه وادخل بطولات عالمية وكنت باقي ساعتها سنة وأكمل ال 16 واخد الحزام الاسود اللي قعدت سنتين مستنية اخده بعد ما خلصت البني راح قالي لا انت كبرتي ومش هينفع، ودلوقتي عايزة انزل تدريبات تخص مجالي وتطور من نفسي أنا اساسا دخلت كلية مش بحبها ويحاول فيها وتقديراتي الحمدلله حلوة جدا وعايزة انزل اشوف مجال العمل واشتغل وحتى الكلية عملتلنا تدريبات صيفية بعدد ساعات لازم اجتازه وفعلا لقيت تدريب وهو رفض وقال لا وحتى شاكك فيا اني بكذب على موضوع عدد الساعات وكل مرة انزل الكلية عشان تصوير أو غيره يفتح تحقيق ويكون عايز إثبات أنه اللي بقوله صح مع اني والله عمري ما عملت حاجة غلط ولا بتعامل مع حد ولا ليا اختلاط بالناس وبتكسف جدا اتكلم مع أي حد مش متعودة عليه والموضوع ده كمان مأثر عليا اني مبعرفش اتعامل مع حد ولا اتكلم مع حد حتى ف الكلية انا مليش صحاب اوي غير واحدة اعترفت عليها مؤخرا بالصدفة وبقعد معاها وهي زي بالظبط، أنا اسفة اني طولت بس انا فعلا مخنوقة ومؤخرا بقى يجيلي افكار انتحارية وانا لزمتي ايه وانا فاشلة ومبتقدمش خطوة لقدام ومفيش حد بيحبني وبحس بابا بيكرهني

0

9