إنجازات

عايز اعرف امتى بتحسوا بالرضا عن نفسكم، انا عن نفسي لما بخلص كل اللي عليا واكون ماشي كويس في إنجازاتي ومجهز لكل حاجة المفروض وقتها احس اني تمام، بس برجع اجلد في ذاتي اني معملتش اكتر واني كان لازم ابدأ دة من بدري وهكذا ازاي بتهربوا من جلد الذات بالرضا

عايز اعرف انام نفسي بجد ازاي بتفرغوا الضغط اللي جواكم واللي بيتولد بسبب حاجات لازم تفضل في حياتي لإن دي إنجازات لازم احققها بس هي كدة كدة بتضغطني جدا بطريقة بشعة كدة كدة المشكلة مش في الحاجة اللي شغال عليها المشكلة فيا بس انا مش بعرف انام من كتر التفكير والضغط ف ازاي افرغ دة

ليه مش قادره افرح بالإنجازات اللي بعملها!!!! لما جت لحظة مهمة واشتغلت وتعبت لحد ما وصلت لها حسيت اني خلصت التاسك المطلوب فقط بس محستش بالفرحة. اه حاسه بالامتنان لفضل ربنا والنعم المحيطة بيا بس مش قادرة ابقى مبسوطة، لا دا كأنه يوم عادي مفيهوش حاجه مميزة ولا مهمة مع أني استنيت اليوم دا لمدة طويلة جدا والحمد لله وصلت إلي انا عايزاه. اعتقد برضو لو مكنتش حققت الهدف مكنتش هعرف أظهر زعلي وكنت هتعامل عادي برضو.ومش عارفه ايه العبث دا كله

السلام عليكم 🌸. لما ببص حواليا، واشوف الناس، مين عمل ومين سوا ومين انجز، بحس اني بزعل. يعني مثلا، واحدة زميلتي في الدروس، حَكَم ف الهاندبول، وعندها انجازات وميداليات قد كده ما شاء الله ربنا يباركلها. اللي هو انا مش بحسدها والله، بس زعلانة اوي على نفسي؛ مأنجزتش حاجة، معنديش حاجة ماهرة فيها فعلا، حتى هواياتي مستوياتي فيها متدنية جدا لاني فاقدة الشغف فيها، حتى التنس اللي كنت بلعبه زمان وقفته. جسمي متدمر نفسيتي متدمرة، بقى عندي بوادر ارتجاع للمريء من نظام الاكل والنوم الزفت اللي متبعاهم، ده غير فقر الدم والانيميا ونقص الفيتامينات وشعري اللي حرفيا انتهى بعد ما كان حرير. طب صحاب؟ مفيش، اغلبهم طلعوا توكسيك ومهووسين يا بيا يا بتدمير حياتي، وحاجة آخر رعب تقريبا، والكويسين منهم قطعت علاقتي بيهم عشان مكانش عندي طاقة. طب والمذاكرة؟ آخر امجادي كانت تالتة اعدادي، من بعدها معدتش بفتح الكتب الا ليلة الامتحان. آه بجيب درجات عالية نسبيا وكل حاجة، في منتصف التسعينات مثلا، بس هل انا بذاكر؟ لأ، معتمدة على ذكائي بس، حتى امتحاناتي لخبطت ف مواعيدها السنة دي تلت او اربع مرات من قلة الاهتمام والله، بعد ما كنت بصحى نص الليل اعيط مفكرة اني ضيعت الامتحان، واقعد اراجع المنهج والله وانا نايمة من الرعب. مش عارفة امتى حالي تدنى كده، ومش باخد خطوة، انا ببص على اللي حواليا وزعلانة بس برضو ماسكة تلفوني وزي ما انا، ولا فيه اي تغيير. حياتي مش سيئة، بل ممتازة للأمانة، مستوى معيشي منصب اجتماعي تعليم فلوس جمال ذكاء قبول لبس سفريات، كل حاجة تقريبا عندي، بس بحس ان الحاجات دي مش بتبسطني، حاجات انا اتولدت بيها مأنجزتهاش، زي فكرة اني ذكية مثلا، بحسها عار عليا لان انا ذكائي ولا بهتم بيه ولا بنميه ولا انا حتى بستغله ف حاجة مفيدة.. فاا بس، مش عارفة والله اعمل ايه ومكتئبة بشكل غير طبيعي ومليش خلق حتى سريري ارتبه.

ايه اللي فرق بجد، مش فاهم يعني ايه ابقى زي الفل وكله كويس وإنجازات وطاقة وحيوية وتيجي فجأة كدة تقول لي بس لحد هنا ونقف في مكاننا، ايوة وليه مش فاهم ايه المبرر اني اقف دلوقتي وايه المبرر ان الهبل دة يشتغل

تظل العدو الاول و الغريم الازلى للانسان هى الوحده مهما كافحت و حاولت و سعيت و جيت لو انجازاتك دى معندكش حد يفرح بيها مش هتحس بحلاوتها مهما أنكرت و حاولت تبان صلب فى يوم من الايام مقاومتك هتنهار و تقع لان الوحده دى العدو الوحيد للانسان اللى فى الاخر مهما عمل هتخليه يرفع الراية البيضاء و الوحده مش شرط انك تبقى لوحدك بالمفهوم التقليدي ممكن تبقى وسط ناس كتير و انت لوحدك و محدش حاسس بيك ولا فاهمك فالموضوع يبقى اصعب الوحده قاتله و ياريت كل واحد يلاقى الشخص اللى يقتل الوحش ده عنده

يارب كلكوا. تتجوزا وتخفوا إدمان وتنجحوا ف دراستكوا وتبطلوا عادتكم السيئة وتحسنوا علاقتكم ب الي حوليك كلهم وتحققوا إنجازات كتيره جدا جدا يارب يا كل التوهيلرز مع ان في ناس هنا دمها تقيل بس ماشي

انا عندي مشكله فس الثقه بالنفس مهما عملت من انجازات بشوف نفسي قليل حتي ناس كتير الحمدلله بتمدحني بحس برضو ان هم احسن مني ممكن كلمه وحشه تأثر عليا سنين حتي لو من شخصيه كرهاني حد عنده حل تعب

كدا الندم علي الماضي انت مش هتقدر تغير حاجه هي حصلت خلاص يس انت تقدر تتعلم من اللي حصل ده الدروس اللي تقدر تخليك تتحرك لقدام حرر نفسك من الخوف من المستقبل انا عارفه ان احنا بنبقي خايفين من المستقبل علشان المستقبل بنسبالنا هو حاجه مجهوله بس خليك واثق في نفسك و صدق نفسك وفخور بنفسك خليك فخور بكل محاولاتك مش كل الاجازات بتكون ملموسه او احنا شايفينها بعينينا ممكن بكون اكبر الانجازات اللي انت اتعلمتها في اليوم لنك اتعلمت الصبور ممكن يكون اكبر انجاز حققته ان انت بقيت شخص رحيم باللي حواليك خليك فخور بكل حاجه انت بتحققها وخليك عارف ان انت هتقدر تتعامل مع اي حاجه في المستقبل بطريقتك انت

تعبت من احساس انى بستمد قيمتى لنفسي من مذاكرتى او انجازاتى بقيت حايه انى totally انسانه فاشلة ومش عارفه احقق حاجه حرفيا حياتى كلها بحلم بحاجات واسعى ليها ومبتجيليش نهائى وناس اقل منى ومبيبذلوش ربع مجمودى بيجيلهم

دايما باخد إستحقاقيتي من الإنجازات اللي بحققها غير كد بحس اني حد ميستاهلش عايشه طول الوقت في ضغط اني لازم اكون شاطره علشان استاهل اتحب بس انا تعبت من الدوامة د ومش عارفه المفروض تخلص ازاي