بداية

حياتي واقفه بقالها كتير بجد، لسه عند نفس النقطة من سنتين يعتبر ، مطورتش متغيرتش ومحسنتش اي حاجه بالعكس الدنيا بتسوء أكتر معايا ، حاسه اني محتاجه حد يشدني يقولي يلا تعالي هنعمل كذا وياخدني معاه ، حاسه بفراغ كبير بقالي فترة مع ان عندي صحاب اشكي واحكي ليهم بس مبقتش احس بالراحه ما بينا زي الاول ، مضايقة من نفسي عموما ومش راضية عن حياتي ، وكل ما اقول هتغير و دلوقتي وابدأ في حاجه مأجلاها ، يومين وبرجع تاني لنقطة الصفر ، نفسي الاقي حل بجد مش شوية كلام من الي بسمعهم كل شوية العبي رياضة و شوفي هواياتك وكوني صحاب والكلام الي مش عملي ده ، انا عايزة الخلطة، الطريقة فعلياً عايزة افهم ازاي

الناس حواليا كلها ماشية، كل واحد بيحكي عن شغل أو سفر أو حتى محاولة… وأنا واقف مكاني. مش فاشل بالمعنى الواضح، بس مش ناجح برضه. حاسس إني تايه بين الاتنين، لا عارف أبدأ منين ولا عندي طاقة أجرب. كل مرة أقول هبدأ، ألاقي اليوم خلص من غير ما أعمل حاجة، وكأني بهرب من حاجة مش فاهمها. حتى الحاجات اللي كنت بحبها، بقيت تقيلة عليا.

ازاي اتعلم لغة بيبقى عندي شغف كبير لتعلم لغة بس بخاف من ان اخد الخطوة وابدأ فعلية بحس انه مش هنجح فيها هفشل ممكن حد يتريق علي نطقي مثلا وان اخاف اشارك في السيشن ف ازاي اقدر اخد الخطوة من غير كل التفكير ده

قررت ما احسش بالذنب تاني ...قررت ما اعملش حاجة تحسسني بالذنب ابدا مهما كانت لا اسيب صلاة ولا اصاحب ولاد ولا ابطل مذاكرة قررت اكل صحي و ما اندمش ع ال فات و اقتنع اني استاهل احسن حاجة ف الدنيا واحمد ربنا على كرمه وهفتكر ان دا من بداية ١٤ ابريل باقي بس احذف الاب دا

انا طالبه ف سنه أولى كليه علوم عايزه اشتغل بس مش عارفه اشتغل ايه وابدأ ازاي يا ريت لو حد عارف يفيديني انا معنديش اي خبرات وعمري ما اشتغلت قبل كده وهل ممكن الاقي شغل بدون خبره وهعرف اشتغل جمب الدراسه؟

مش فاهم نفسي في موضوع العلاقات بصراحة. نفسي أتعرف وأتكلم مع بنات بس بتلخبط ومش بعرف أبدأ، وبرضو مش عايز أبان محتاج أو تقيل. حصلت كذا محاولة قبل كده ومكملتش، فحاسس إني تايه شوية ومش عارف أتصرف،حد عنده نصيحه

السلام عليكم انا عندي وقت فراغ كبير محتاجه استغله ف حاجه تفيدني واتعلمها ممكن حد يرشحلي اي اللي ممكن اتعلمه جديد وازاي ارجع شغفي بحاجات كنت بحب اعملها ويبقي عندي قابليه وصبر للحاجه اني ابدا فيها

ما حدش هيجي يشدك من اللي انت فيه وما حدش هيجي يقومك ويقولك يلا انت وراك كذا وكذا وكذا ولا حتى البوست ده هيخليك تقوم اعتبر البوست ده بس هو اي زي حاجه كده تصحيك بقي وتفوقك من اللي انت فيه حتة اللي هو انا مستني الوقت المناسب ما هو مفيش وقت مناسب ما كله بيبدا ومعهوش امكانيات ومعهوش احسن حاجه يبدا بيها وبيبداو وبيتعلمو وفي الاخر بيوصلو اللي هم عايزينه لو انت بقي اللي هو مستني الوقت المناسب اسمع مني انت مش هتوصل لحاجه في الاخر اتعب واعمل اللي عليك وحط كل الطاقه اللي عندك بالامكانيات اللي موجوده عندك وفي الاخر هتوصل لحاجه كويسه علي الاقل حتي لو ما وصلتش يبقي اسمك حاولت انما ما تقعدش وتستني علي الفاضي واسمع مني العمر بيعدي بسرعه انت سنه في اتنين في تلاته هتلاقي نفسك تلاتين اربعين سنه وعملت اي في حياتك ولا حاجة فقوم من دلوقتي واعتبر البوست دا بس اي يصحيك علشان محدش يخد مكانك

اري هنا كلمات غريبه.. اري شباب ف بدايتهم يشعرون بعدم الانجاز وكان الانسان بينزل م بطن امه دارس وفاهم للحياه وقوانينها من الطبيعي هو ذلك الشعور التخبط وعدم الفهم والحزن والالم والضياع لولا وجود تلك المشاعر لما نجحت لانها مشاعر تضغطك لتتحرك لتتعلم لتحاول ولتنمي معرفتك وبعد ذلك بعد مرور تلك الفتره وتصل وجهتك ف٣٠او ٤٠او٥٠ ستضحك ع تلك الفتره ومشاعرك وقتها وخوفك وقلق الذي لم ين ده داعي .. تذكر انه عليك ان تتالم لتتعلم والانسان ف حياه الترف لا يصنع شيئا..

عايزه اتعلم المهارات الاجتماعية ازاي اتكلم و كلام حلو و مليان مش فارغ مش عارفه حد فاهمني ولا لا بس انا عايزه اتعلم مهارات كتير اوي وبس انا مش عارفه ابدا منين أو اقرا كتب أيه ف اتمني تساعدوني

الصراحه انا مش جايه احكي مشكله انا عندي فكره حابه اشاركها مع حد ويشجعني اعملها انا عايزة اكتب روايه وبعرف اكتب كويس جدا وكتبت المقدمه وحاجات بسيطه كدا واخدت راي كام شخص قريب مني مدحوها بس الصراحه انا مش عارفه ابدا منين او ازاي بس انا فعلا بحب الروايات وبحب القراءة عموما ونفسي بجد اكتب رواية حتي لو مش هتتشهر بس اكون عملت الي نغسي فيه مش اكتر فالو حد عندو نصايح ازاي ابدا او اخلي بالي من اخطاء ممكن مكنش انا واخدة بالي منها عموما دا الجزء الي كتبتو رايكو هيهمني جدا ❤️ كانت تظن ان ماكُسر فيها لن يُصلح،وان القلب حين يُخذل مرة لايعرف كيف ينبض، خبأت نفسها خلف الكتب،وتسللت الي زوايا لا يصلها الضوء، ظناً منها ان العزلة احن عليها من قلوب البشر، فهل الحب قادر علي جمع شتات الروح؟ وهل من جلس طويلاً علي رفوف النسيان يحق له ان يكتب في الصفحات الاولي؟

حاسه اني من اول الترم التاني ده وانا مذاكرتش حاجه و بعيده عن ربنا و حاسه ان ربنا عمال يديني فرص عشان اذاكر و اعمل الي عليا و اقرب منه زي رمضان و بردو انا معملتش ده ف رمضان كنت بحاول اجاهد و اقرب من ربنا بعدين جيت ف الاخر معدتش بنزل دروس و بغيب و جه بعدها العيد و الدروس اتلغت و كان قدامي فرصة الم كل الي متراكم عليا و معملتش ده بردو و انا حتى مش قادرة احاول و مش عارفة فعلا ايه الي بيمنعني و جه تاني حوار الجو ده و الدروس اتلغت و انا بردو معملتش حاجة من الي عليا وانا حاسه بالذنب اوي و كل يوم اقول اني هلم الي عليا بكره و معملش كده والفكره انا ف سنه المفروض اجيب مجموع لو حد عنده حل يفيدني انا فعلا مش عارفة ابدا ازاي