تقدير

حقيقي محدش هيديك اكبر خازوق في حياتك سواء اهل صحاب جواز اي علاقات عامةً غير الشخصيه اللي عايشه ب عقليه (الكل مش بيحبني) الضحية اصعب فئة من الناس ايدلهم صوابعك العشرة شمع هيفضلو شايفينك مقصر رغم انهم ما بيبذلوش مجهود معاك في حاجه طول الوقت عايزين اثباتات من الناس انهم يتحبو وبيتعمل عشانهم وهما ما بيعملوش حاجه او اي حد معندوش ثقة فنفسه او عقد نفسيه مجرد ما بيقابلو ناس سويه بيتمنوا لهم يبقو زي نسختهم وبيتضايقوا من اي حد ناجح مع ان انا شخص شاف المر اشكال والوان وعيشت ايام مش صعبه دي مستحيله وعدتبلطف ربنا مبقعدش اصيح واحمل الناس مسؤوليتي واكره ف دا و احسد دا دور الضحيه دا عقليه مش معناه ان الشخص دا ضحيه فعلا

عايزاكم تدعولي كتير اعدي مادة ميكرو صافي ولو مفيهاش احراج يعني اجيب تقدير كمان😔 عندي بكرة شفوي و عملي و المادة مش مبشرة نهائي ف ادعولي كتير اجيب تقدير عالي و اظبط الGPA وادعولي ربنا يوفقني و يهديني

غريب بجد الانسان ده تبقى الحاجة معاه و مدياله كل اللى كان نفسه فيه و زياده بس ميقدرهاش و بالعكس يقلل منها و يطلع فيها العبر و اول ما تروح منه يبدا يعيط و يبدا يعتذر و يقول انه غلطان و يبقى هيموت عليها تانى طيب و ليه ما تبقى كويس من الاول

اوقات زي الفترة ديه كدا بكون مش قادرة استحمل إحساس اني لوحدي تقريبا انا طول عمري لوحدي حتى وسط اقرب الناس ليا بكون لوحدي مش قادرة استحمل فكرة اني طول عمري محتاجة احس بمشاعر طبيعية وعمري ماحسيتها مشاعر المفروض انها أبسط حقوقي زي اني أكون متشافة ومتقدرة انا حقيقي مش كويسة ومبقتش قادرة اتعايش مع أي حاجة بتحصل حوليا

أوقات بيقا حواليك نِعم مش بتدرك قيمتها غير ف لحظه فقدانها امبارح كنت ف المستشفي كان عندي هبوط م قلة الاكل والشرب، من نزلة برد شديدة شويا ف عادي رحت ركبت محلول وخدت فيه جرعة مضاد حيوي بس، لحظه استشعاري لنعمة الصحه، كانت وانا قاعده وشايفه بقيت العيانين. الناس كتير راحه جايه راجل عجوز باين عليه المرض الشديد ومعاه تلت شباب حواليه وشاب جاي لوحدو. شكلو ملقاش اللي يجي معاه يعيني. عامة دي تاني مرة ادخل مستشفى ف حياتي او مؤخرا يعني وعايزة اقول ان دخولها مش زي الخروج منها كونك قاعد ف البيت كويس ومش بتشكي من ألم دي نعمة كبيرة جدا ناس كتير بتتمناها ف اللحظه دي الحمدلله.

ليه الناس يتعامل اللي قدامها كأنهم عبيد عندها بجد ليه كب حد بيشتغل الناس بتعامله كأنه شغال عنده كل ده عشان بيديله فلوس ليه دايما العميل بيهين الشخص اللي بيقدم له خدمة بالرغم انه ممكن يكون بيديله حقه على أكمل وجه ليه بجد اتعامل مع الناس يقلة قيمة عشان يعني يكونوا مبسوطين مانا بحترم واقدر بس ليه في المقابل مالاقيش الاحترام والتقدير ماهو برده أنا بني أدمه بحس وعندي مشاعر بجد كل مابيكون عندي طاقة للشغل بتقل ثاني انا مش بس مش عاوزة حاجة غير الاحترام والتقدير حقي على الأقل 😒🥲😢

حكاية التقدير صعبة شوية، انا دكتور حاجة وتلاتين سنة واتجوزت اكتر من مرة ومخلف، يعني مريت بظروف وتجارب ومع ذلك امي بتاخدني ع اد عقلي ، المفروض ان ليا رأي في حياتي وقراراتي انما شيفاني برضع لسه، ويعتبر عدم احترام من الاخت الكبيرة ، ودا غالبا بيصيب الطفل الاوسط وبيتبهدل،، اقصد يعني انسى ان اهلك او مجتمعك او حتى مراتك هتعملك قيمة طالما مش مشاغب ومخربش وبتفرض نفسك، انشغل بنفسك وطور نفسك ومصيرك هتكون بين ناس تقدرك وتعرف قيمتك 🌷🌿

معايا امتحان فارما وانا معرفش حاجه ف الماده امتحان مش بكره بعدوا وانا اصلا بكره هسافر عشان الكليه مش محافظتي ف هوصل بليل ومعايا شغل صبح مش عارفه اعمل اي ولا اذاكر امتا انا كان قدامي فرصه اذاكر بس ضيعتها وحاسه بلا مبلاه بس خايفه عايزه اجيب تقدير ف الماده انا ضيعت وقت كتير خالص اليوم كله علي الفون بضيع وقت او بروح الشغل

هاي .. انتوا عارفين الواحد لو يبطل يحس بالذنب تجاه اى حاجة و كل حاجة حواليه هيبقى اخف و احسن بكتير بجد مش هيبقى دايما حاسس انه تقيل و حاسس انه كان لازم يعمل حاجات هى اصلا مش فرض عليه بالعكس دي مسؤوليات غيره اصلا لو رمي من جواه إحساس ( لا لازم اعمل لهم لاااازم اساعدهم و اصل هما مش هيعرفوا يعملوا ده زي ما هاساعدهم) و يخلي كل الحاجات اللى بيقدمها دي لنفسه الوضع هيكون الطف كتير اوي له اصل ف الآخر بيتقال له ماحدش ضربك ع ايدك عشان تعمل لنا 🙂 ولا الاسوء بقا انك تتلام عشان غلطت فى حاجة صغيرة لا تكاد تذكر اصلا او بمعني اصح ماعملتهاش زي ما هما عاوزينها بالملي ( مع انهم اصلا هما نفسهم لو عملوا اللى ساعدتهم فيه هيكون نتيجته اسوء بمراحل بس هو قصر ديل منهم سوري يعني 😂 ) الناس اللى حوالينا بلا استثناء بجد ماتستاهلش اى تضحيات و حرق بنزين جامد عشانهم ف ياريت ماتقدمش اكتر من طاقتك لاي حد عشان يوم ما هتحتاج طاقتك دي و جيس وات برضو مش هتتشاف حلو عشان ضحيت .. هتتشاف ساذج 🙂 ف اعمل لغيرك بس بالمعقول و ماتجييش ع نفسك عشان اى انسان ايا كان مين باي 😌👋🏻

عندي شعور اني لازم اتجوز واعدد، غالبا لاني عايز احس اني مرغوب وليا قيمة، لان احساسي اني مش متقدر في المجتمع وخصوصا من الطرف الاخر، زي فكرة الشاب اللي بيصاحب بنات كتير عشان يحس انه مرغوب ايه يا ترى ممكم يعوض الموضوع دا ،، عشان لو هعدد يكون عادي بدون دوافع غلط

مشكلتي ف مذاكره انا فكليه نظريه امتحان فيها فاينال بس معرفش لي طول ترم متحمس و قبل امتحانات باسبوعين بهبط بامد و ببقا عصبي و بتخنق و متدايق و مبعرفش اذاكر خالص موضوع ده نزل تقديري حبه حلوين تنصحوني اعمل اي انا فاخر سنه و عايز احافظ علي مرتبه شرف و شكرا

إني ممكن ملاقيش التقدير إلي أنا عايزاه و جربت كتير اتكلم و أطلع إلي جوايا بس مفيش فايدة برضو مش بتسمع و قليل أما بحس إن في حد مهتم يعرف جوايا إيه وأنا حاسه بإيه و كمان أهلي مكانوش بيهتمو بيا أوي يعني بيقولو لما كنتي عندك تلت سنين كنا بنعملك كذا وكذا بس بعدها مفيش حتى كانو بيضربوني بالحزام من وأنا 5 سنين و ماما بتضربني بالشبشب لغاية ما جسمي بيحمر بس هما برضو بيحاولو يحافظو عليا وكدا فأنا حرفيا مشتتة مش عارفة هما كويسين معايا وأنا ظلماهم ولا ايه و كمان محدش كان بيلاحظ مواهبي أو إني بعرف أرسم ومكانش حد فيهم بيهتم حتى لما ايدي اتكسرت كانت ماما بتزعقلي وبتقولي اني بتدلع مش عارفة في ايه لكن لما كبرت معتش في دماغها خالص ولا حتى بتسألني رايحة فين او جاية منين لا كدا و خلاص شوفي انتي هتعملي ايه واعمليه يعني ولا بتهتم بيا ولا حتى بتعاملني بطريقة طبيعية و كانو بيتنمرو عليا البنات الي في المدرسة و ولاد خالي عشان مناخيري كبيرة مع انها يعني عادية مش عارفة مالهم و بقيت بجد بخاف اوي ابقى تقيلة على حد او ميعبرنيش عشان محسش اني متجاهلة

جماعه هونو عليا عشان هعيط بجد لما جبت نتيجه اتصدمت يعني اي ماده متاكده اني حله فيها كويس واجيب تقدير دا وناس تانيه عشان بس واخدين فيها كورسات جابو امتياز فيها يعني دا بجد عدل ليه ممكن كليه تحطم الواحد كدا الحاجه وحيده اللي مهوني عليا شويه اني بقيت مواد تقديرات حلوه فيها الحمدلله وسؤال لو في ماده جايبه ضعيف فيها يعني بتبقي اي معناها و بنمتحنها امتي وازاي شكرا 💗

بغكر نفسي وبفكرك ، قبل ما تشتكي من الناس ومعاملتهم ليك وخذلانهم المستمر او عدم تقدريهم ، شوف الاول علاقتك بربنا ، اصلح ما بينك وبين الله يصلح الله ما بينك وبين الناس ، محبه الناس ليك دليل على حب الله لك ، ف شوف علاقتك بربنا قبل ما تشتكي من علاقتك بالناس.

من مكاني هذا احب اقولكم ان هيجي وقت عليك هتحس انك خلاص قدمت كل ما بوسعك عشان تحافظ علي اللي بتحبهم جاي اقولك لو قدمت وبرضو مفيش فايدة اهرب انت تستحق حد يقدرك ويحس بقيمتك اكتر من كدا مفيش حد يستاهل انك تديله فرصه يقلل منك وميقدركش م طز بجد ياجماعه طظ ف اي حد ميقدرش قيمتنا من نفس النقطة بقولكم للاسف مش عارفه اتخطي 💔

اياك تتوسل لصداقة او لحب لو حد فعلا مقدرك مش هتحتاج تجري وراه ولا تفكره يعاملك صح المجهود مينفعش يبقي من طرف واحد لو انت بتدي كل حاجه وهو مش بيدي ولا حاجه ده مش ارتباط ده استنزاف لنفسك امشي من عند اللي بيحسسك انك اختيار احتياطي النااس الصح هتطبقك نفس المجهود من غير ما تطلب

لما ملقتش تقدير لما لقيت كلام يوجعني ولما خسرت كرامتي بدل المره الف لما اتكسرت كتير واتزليت لحد ميستهلش كنت كل مره يسبني ويرجع ع مزاجو المرادي بس فوقت واقتنعت انه م خير ليا مبقتش استراحه محارب المحارب ساب الحرب تولع ب الي فيها وواقف يتفرج عشان اقتنع لا دي حربو ولا دا مكانو

مجرد فكرة او خاطرة 💡💡 الواحد بيشتغل و يوفر حياة كويسة للناس اللي بيحبهم و يتعب مع ده و دي عشان شوية تقدير او اهتمام من اللي بنديه للناس بس للاسف كل ده مش موجود، حتى لو في اهتمام ف مصطنع مش حقيقي مش اللي تحسه يوصل لقلبك في خذلان غير طبيعي

"التقدير الحقيقي مش موجود في الكلام… موجود في الأفعال اللي تشوفها بعينك." جربت قبل كدا احساس التقدير الحقيقي مش الكلام ولا كلو في الاخر بيطلع كلام عشان نعدي بيه الموقف مش اكتر يعني هل فيه تقدير حقيقي ولا وهم

الحقيقة عندي موضوع يعني ماثر فيا هو أن ما الامر لي يجعل الانسان الجميل المنظر جميل القلب افعاله مع الناس ظريفة أحيانا صح ممكن انفعالي لكن بطريقة ظريفة المهم لماذا هذا النوع من الناس نجده غير محبوب مع أنه يجب أن يحب بالمقابل نجد انسان أصلا لا منظر يعجب لا حركات فقط نفاق ومتكبر ويعمل مشاكل فقط ليكون موضع اهتمام وفي الصورة وتجده محبوب والناس نسأل وتستشيره وعلاقات كثيرة

هل الزواج بعد الانفصال صعب زي ماانا بفكر؟ انا اتزوجت شخص قاسي وغي مريح بالمرة، بخيل بمشاعرة وفلوسة ومرمطني كتير واخيرا بنفصل عنه انا مش معايا اطفال الحمد لله لما لاقيته كدا قررت امنع الخلفه ع شان مش هينفع اجيب ولاد امرمطهم مع اب نرجسي وسيء كدا، ف انا شخصية ناجحة الحمد لله معايا ليسانس وقريبا هقدم ماستر يعني ابحمد لله كله تمام، لكن الفتره دي تفكيري بيموتني اللي هو مش عايزه اتحط في تفكير المجتمع وإني مش هينفع احب واتحب من تاني واعيش حياة كويسة واقابل فتى احلامي اللي يصوني ويقدرني ومش لازم يكون متجوز قبل كدا، ليه المجتمع بيبص للبنت اللي اتجوزت قبل كدا إنها ماينفعش تتجوز واحد عادي كدا لسه ماتجوزش قبل كدا بجد ايه بيحكموا علينا وهما مايعرفوش اتبهدلنا قد ايه مع ناس ماتستاهلش انا لسه ٢٣ سنة يعني لسه مادخلتش دنيا لسه ماعشتش الحياة بس نظرة المجتمع وحشة اووي، ياريت أي حد مر بتجربة او حاسس باللي بقوله ينصحني ويقولي هل هلاقي الشخص دا ولا هيتحكم عليا بالإعدام والعيشة مكسورة الخاطر 😭💔

انا مش عارف الي عندي ده تعلق مرضي ولا ايه بس انا هقول الي بعاني منه انا اغلب الوقت منكش عندي صحاب ولما بقي عندي بيبقي واحد بس مثلا و ببقي متعلق بي جدا لدرجه اغلب الوقت بزعل بسبب قله الاهتمام او اني ديما بقدم حجات كتير و الشخص التاني مش بيقدر بحس اني مش متشاف اصلا فهل ده بسبب الoverthinking و التعلق ولا ايه