تنصب

بتعملوا ايه لما يتنصب عليكم في شغل ، الموقف دا اتكرر معايا كتير جدا ، اخر موقف كان واحد طلبني لحاله ومزنوق ومش لاقي حد يشيلها ، شيلت الحاله يوم كامل والدنيا كانت تمام واتفقنا علي الايام الي هنزل فيها وكل حاجه ، جيت قبل اول يوم كلمني قالي الحاله مس عايزين حد بكرا ، واتفاجئ أنه مكلم حد اعرفه علي نفس الحاله (رغم اني مقصرتش خالص في شغلي معاها ربنا يعلم) ، المهم اكلمهم واتس يعملوا سين وما يردوش ، ارن عليهم ما يردوش ، وطبعا مفيش ورق ولا حاجه تثبت اني كنت شغال غير مكالمه الموبايل بيني ما بينهم ، عارف مزعلتش خالص علي فلوس اليوم دا بس زعلت من قلة التقدير لاني لغيت انترفيو عشان اروح اشيل الدورب بتاعه . الموقف الي قبل دا كنت نزلت يوم في مستشفي ٢٤ ساعه متواصل وبعدها سافرت علي الشغل التاني بتاعي في محافظه تانية وكنت متفق اني هاجي الشهر الجاي انزل علي نفس المستشفي وكلمت الاشراف اول الشهر واتفقت معاه وقالي تعالي ، ارن عليهم بعدها مره الاتنين و ١٠ مفيش رد لغاية ما ردوا عليا بعدها باسبوع واتفاجئ بيه بيقولي مين ؟! .. انا الي شيلتلك الشيفت ال ٢٤ ساعه لما كان عندك عجز وقولتلي انت معانا من اول الشهر ، قالي هظبط الروستر واكلمك ، وما كلمنيش ، قولت ارن انا ما بيردش ، ولا رد لدلوقتي ولا اخدت فلوس ال ٢٤ الي اشتغلتهم. الواحد بيزعل بجد لما يآمن لناس ويعمل شغله بما يرضي الله ويروح قبل الميعاد بساعه ويمشي بعد الميعاد ب٣ ساعات وفي الاخر يتنصب عليه ، لمجرد أنه آمن لشخص لا يؤتمن. وعايز تاخد حقك ؟! ، هتتخانق يعني ؟ .. مش اوبشن بالنسبالي لاني بتوتر من المشاكل جدا حتي لو كنت كسبان ومش برتاح بعدها .. هتاخد حقك بالقانون ؟! .. احنا في مصر واليوم بسنه وهتخسر أضعاف الي هتكسبه . ليه ممكن تعمل كدا مع حد مش عايز اكتر من انه ياكل عيش ويشتغل بما يرضي الله ، انا بقيت بتجنب اشتغل والله عشان الناس دي ، بس مضطر لأن مرتب واحد مش كفاية . حد عنده حل ؟