خدر عاطفي

لما توصل لدرجه انك مش حاسس بأي حاجه ده معناه ايه؟ الأكل ملوش طعم، مبتجيبش اي حاجه لنفسك عشان مش مهتم، ولا بتحب تخرج ولا تروح ولا تيجي في اي حاجه وشك مبقاش ليه غير تعبير واحد وهو العبوس .. يبقي انت كده وصلت لإيه؟ ناقص ابطل احس بالألم الجسدي ويبقي كده انا مبحسش بأي حاجه فعليا ..

انا كنت حساسه جدا بتأثر بأقل حاجه دلوقتي اتقلبت للعكس تماماً لا بيهمني اي حاجه ولا بنبهر لو حصل ايه ولا اي حاجه كنت بحبها ممكن تبسطني ولا عندي دافع لاي حاجه او بنفعل انا مش عارفه انا بقيت كده ازاي لا أنا ولا اي حد كان يعرفني يتخيل اني بقيت كده مش عارفه ده شئ إيجابي اني مبقتش بتأثر وبتعب زي الاول ولا سلبي اني حتى الحاجه الحلوة مبقتش بحس بيها مش عارفه أخلق اي نوع من أنواع المتعه في حياتي مع اني والله كنت بفرح بحاجات صغيره وبسيطه اوي

مبقاش عندى مشاعر خالص تجاه اى حاجة او اى حد لا فارق معايا مين موجود ومين لا، لا بكره حد ولا بحب حد مش مهتم بأي اى حاجه تحصل حوالي، اللي يمشى عادي واللي يجي عادي كله زي بعضه مبقاش عندي تمييز لأى حد مهما كان مين او كان قريب منى. يمكن ده مسببلي بعض المشاكل زى انى مبعرفش ادى لحد اهتمام او اميز شخص عن شخص تانى مهما كان بيعمل او مين هو. بس برجع وبقول انا كده في سلام نفسي ومستريح ومش فارق معايا حد ولا عاوز حاجة من حد ولا عاوز حد يعوز منى حاجة.

انا بجد عاوزه حد يساعدني ازاي ارجع احس تاني بقيت معنديش مشاعر مش عارفه ليه بس قلبي بقي يدق بس شايف شغله مفيش مشاعر احساس حتي لم بابا دخل عمليات والكل بيعيط مكنتش حاسه بحاجه بحاول انزل دمعه عشان ابان متاثره بس من جواء مفيش حاجه خالص

لسه من قريب حاسه ب تبلد مشاعر وعدم قدره علي الكلام والحركه قاعده ف السرير مش عارفه افكر ولا اتعايش ولا اقوم ولا اعمل اي حاجة اكن دماغي اتشلت مش قادره افكر ومش حاسه اني في الدنيا هنا ولا عايشه مع الناس انا ف حتت توهان غريبه انا مش فهماها

انا بقالي فترة كبيرة فاقد مشاعري تماما مش بحس بأي مشاعر ولا حب ولا كره ولا حزن و لا فرح بتحول ل روبوت حرفيا كل حاجة باخدها بالعقل و المنطق و بجردها من اي مشاعر و دا مخليني متبلد المشاعر مش عارف اعبر مش حاسس بحاجة ف بخسر ناس كتير بيحصل مشاكل كتير مع خطيبتي بسبب اني بقلل من مشاعرها لاني فعلا مش فاهم يعني ايه مشاعر و واخد كله بالمنطق مع اني كنت اكتر حد حساس و عنده مشاعر فالدنيا