خير

بحاول دايمًا أكون شخص سهل ولين في التعامل، شخص ميبقاش تقيل على حد ولا يخلي اللي قدامه يحسب كلامه أو يخاف يحكي اللي جواه. نفسي أكون الشخص اللي الناس ترتاح له من غير مجهود، اللي تقدر تتكلم معاه في أي وقت وتحكي له عن خوفك وحزنك وضعفك وأنت مطمن إن كلامك هيفضل أمانة، وإن عمرك ما هتتعاير بيه ولا هيتستخدم ضدك في يوم من الأيام. بحاول أكون شخص تتعامل معاه بطبيعتك، من غير أقنعة ولا تمثيل، من غير ما تحس إنك محتاج تبقى نسخة أحسن من نفسك عشان تتقبل. شخص يسمع أكتر ما يتكلم، ويفهم أكتر ما يحكم، ويعذر قبل ما يلوم. بحاول أكون خفيف على القلوب، وجودي يضيف راحة مش ضغط، وذكرياتي مع الناس تكون طيبة حتى لو فرقتنا الأيام. يمكن مش بعرف أساعد في كل حاجة، ومش دايمًا عندي الحلول، لكن على الأقل أحب أكون حد يهون الطريق على غيره بكلمة حلوة أو موقف صادق أو مجرد وجود وقت الضيق. الحياة مليانة قسوة كفاية، وعشان كده نفسي أكون سبب في إن حد يبتسم، أو يهدى، أو يحس إن الدنيا لسه فيها خير. يمكن محدش كامل، وأنا أول واحد عنده عيوب وأخطاء كتير، لكن كل اللي بتمناه إن قلبي يفضل نضيف، وإن نيتي تفضل خير، وإن محدش يتأذى مني بقصد أو من غير قصد. يارب اجعلني شخصًا طيب الأثر، لين القلب، جميل السيرة. وإذا غبت يومًا عن أي مكان، يفضل ذكري فيه دعوة حلوة وكلمة طيبة، وتفضل سيرتي بين الناس بالخير والمحبة. فدي في الآخر أغلى حاجة ممكن يسيبها الإنسان وراه." ❤️✨

عندي مشكله كبيرة فعلا كنت محتاج أتكلم فيها ليه الناس بقا جواهم أو بعض الناس مش الكل بقا مفيش فيهم خير لبعض أو ناحيه بعض ودايما ممكن تلاقى حقد ومشاكل وكره وما إلى ذلك حتى مع الناس اللى هما مش عارفينهم

في لحظة ما، هتكتشف إن التعب مش دايمًا بيتحل، وإن الإجابات مش دايمًا بتيجي… بس القلب اللي بيتراضى بيهدى حتى وسط اللي مش مفهوم. الرضا مش إن كل حاجة تبقى ماشية زي ما عايز، الرضا إنك تبقى واثق إن اللي ربنا اختاره ليك أرحم من اللي أنت كنت مُصمم عليه، حتى لو مش شايف الحكمة دلوقتي. يمكن تتأخر حاجة نفسك فيها، ويمكن تتقفل أبواب قدامك، بس اللي بيتعلم يرضى، بيلاقي نفسه بيكسب راحة أغلى من أي وصول سريع. ﴿وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ﴾ مش كل تأخير حرمان، ومش كل فقد نهاية… في حاجات بتتأجل علشان تيجي أنضج وأجمل مما كنت تتخيل.

بعد ما حكيت قصتي الطويلة اللي محدش عارفها معررفتش اكملها ..فضلت باصص للسما والسحاب و سرحان يا ترى كان ممكن يتم النصيحة ب ايه مش عارف ...بس خير انا بس نفسي ربنا يتمم على خير للموضوع ده لاني اتكسرت

من الحاجات اللي مش عارف اتخطاها. اني في يوم كنت بحب بنت او بعشقها مش مجرد بحبها الموضوع دا كان في تالته ثانوي. طبعاً مقدرتش اقولها حاجة زي كدا فضلت بحب البنت دي ومتعلق بيها سنين كتير حتي بعد ما دخلنا كليات مختلفة. فقررت فجأه اني اعرفها فبعتلها مع بنت قريبتي اني بخبها وعايز اتقدملها. فكان قرارها الرفض بحجة انها مش بتفكر في الموضوع دلوقتي وانا بصراحه اضايقت وحسيت ان جالي عقدة من الموضوع.لحد ما النهارده عرفت انها كانت بتحب شخص وسابها وخطب غيرها. مش شمتان فيها والله بل بالعكس زعلان عليها. وكل ما بقعد مع نفسي بحاول افهم الحكمة من الموضوع. لاني عارف ومتاكد ان دا الخير سواء ليا او ليها 🙂‍↕️🙂

مساء الخير...بتتغلبوا ازاي على مشاعر الوحدة؟ .... وان الحاجه اللي نفسكم فيها اوي مش عارفين تحققوها وبالعكس كل شوية بتبعد مع انكم بتبذلوا مجهود كبير عشانها وهي اكيد اكيد خير ليكم مش حاجه وحشه ولا شر مؤمنه بقضاء الله وان كل حاجة لها وقت وميعاد بس ساعات التفكير بيسحلني

في لحظات بنضايق فيها جدًا من حاجة حصلت، ونفضل نسأل: ليه ده يحصل لي أنا؟ بس الحقيقة إن مش كل اللي بنشوفه شر بيكون شر فعلًا، أحيانًا بيكون هو الخير اللي جاي لك بس متغلف بشكل أنت مش فاهمه دلوقتي. ربنا قال: "وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ" موقف ضايقك، يمكن كان بيبعدك عن حاجة كانت هتكسرك أكتر، تأخير حصل، يمكن كان بيحميك من توقيت غلط، خسارة وجعتك، يمكن كانت بداية لطريق أنضف وأريح، باب اتقفل في وشك، يمكن عشان باب أحسن منه يتفتح. الفكرة إنك مش شايف الصورة كاملة، لكن ربنا شايفها، وبيختار لك على أساسها، مش على أساس إحساسك اللحظي.

أحم إفتكر إن كل ثانية من عمرك، وما تفرحش بيوم ميلادك لأن كل سنة بيقصر عمرك، وهتحس بالكلام دة أول ما تبدأ فى ال35 وفوق لغاية أخر يوم. فأعمل كل خير؛ ولما تغلط صلح غلطك فأسرع وقت لأنك مش ضامن بعد دقيقة هيحصل إى؛ دة لو ممكن تجي الدقيقة فعلاً.

افتكر أن صحتك يتمناها المريض و أكلك يتمناها الجوعان و لبسك يتمناها الفقير و شغلك يتمناها العاطل و اخوك يتمناه الوحيد و بيتك يتمناه المشرد و علمك يتمناه الجاهل و حريتك يتمناها السجين و عبادتك يتمناها الم*يت و تصحى في الآخر ناكر لكل النعم اللي انت غرقان فيها و تفتكر بس الشئ اللي اتحرمت منه لحكمة و قدر مكتوب و حتماً هو خير ليك شئت ام ابيت

ليه كل حاجة بتبقى عكسنا مع اننا بنعمل كل حاجة تخليها تمشي مظبوط بس مش بتيجي زي ما احنا عايزين ليه الناس بقت وحشة كده وبيإذوا بعض وبيكرهوا الخير لبعض دا انا لو شوفت حد ف نعمة بتمنى تدومله ويفضل مبسوط ومرتاح بيها

وسط الاوڤرثينكينج افتكرت موقف لوالدي فقولت احكيه لعله يجيبله دعوه كنت راكب معاه مواصلات واحنا بندفع الاجره ركبت جنبه ست كبيره وباين عليها غلبانه وبتقوله الاجره كام يبني والناس قالولها وبتجمعهم بالجنيه قام ابويا دفع لها وقالها خلاص يا حجه انتي دفعتي قالتله الله يباركلك ولما رجع الباقي اداهولها بتقوله ايه دا يبني قالها باقي الفلوس اللي اديتيهالي قعدت تدعيله مش منزل دا رياء ولا نيتي سيئه ابويا انسان نظيف من جواه والله وبيعمل خير كتير بس ربنا ابتلاه بلسانه وعصبيته بالله ادعيله لعلك اقرب مني ومنه وربنا يستجيب دعائك

أكتر حاجة هتساعدك في إنك تتخطى مرحلة معينة في حياتك هي إنك تفكر نفسك إن ربنا عايز كده وده الخير ليك، وأكيد له الحكمة في أنه يخليك تمر بالظروف دي، وإنه سبحانه وتعالى "لا يُكلّف نفسًا إلا وسعها"♥️ ﴿ لا يُكلِّف اللهُ نفسًا إِلاَّ وُسعها ﴾ لن يضع في طريقك عقبات لن تستطيع تجاوزها، لن يبتليك بشيء يُفقِدك صوابك، لن يجعل أقدارك أصعب من أن تتحمَّلها، امتحان الله دائمًا ما يكون على قدر صبرنا، ولن يُكلِّفنا برحمته ولطفه ما لا نطيق، أو ما لا نستطيع تجاوزه

جماعة هنعمل ايه ف الفراغ العاطفي اللي عندنا نملاه ازاي رغم وجود باقي الجوانب الحمد لله لكن ده برضوا جزء اساسي ف يومنا نعمل ايه بكل المشاعر دي واحنا مش مرتبطين ولا حتي عايزين نرتبط غير لما ربنا ياذن بالخير