سخرية

لي انا منبوذ من المجتمع هو أنا وحش ☹️ مش عارف افضفض ولا حتى هنا مش عارف لي خايف افضفض تقريبا لحد يتريق عليا انا مش عارف انا مش منبوذ من المجتمع اللي في الشارع أو المدرسة بس لا من مجتمع الاهل حتى

انا بجد متعصبة اوي مش شوية كنت في المستشفى باخد حقنة المهم لما كنت بملى الاستمارة الممرض أخدها مني و قرأها و خلاص دخلت المكان اللي هي المفروض باخدها من عند تحت كتفي بشوية يعني مش في دراعي من النص و كان فيه ممرضة قاعدة و بتدي حقن عادي انا لقيته دخل هو يديهالي انا اتكلمت عادي و قولت اني عايزة الممرضة هي اللي تديني بصلي و قعد يضحك بسخرية كدة و خرج ليهم برا و قالهم بصوت عالي حد يدخل يديها الحقنة عشان مش عايزة اشوف دراعها انا بجد مش مصدقة طالما فيه ممرضة خلاص ليه بقى السخرية حسسني كأني أوفر أو عيلة صغيرة و يستهزئ بيا بجد مضايقة اوي

كل الي كان نفسي فيه حد يحبني زي ما بحبه عمري ما لقيت حد حبني زي ما بحبه حتي البنت الي حبيتها اكتر من نفسي بتكرهني ومش عارف السبب حتي اهلي الي المفروض يكونوا الأمان ليا بيكرهوني وبيتريقوا عليا لأن مفيش عندي أصحاب أو حد يحبني انا بجد تعبت من الشعور دا

انا بكره يوم عيد ميلادي بشكل غير طبيعي بعيد اني لما كنت طفل عمري ما اتعملي عيد ميلاد ابدا أو حتي حد جابلي هديه كان دائما اهلي بيعملوا لأخواتي حفله ويجيبوا بقيت العيله عشان عيد ميلاد اخواتي وبيجيلهم هدايا كتير جدا ولكن اهلي مكانوش بيوافقوا يعملولي عيد ميلاد ابدا في في مره وافقوا كنت فرحان جدا وعزمت اصحابي 3 أشخاص تقريبا ووصلي خبر أن في اصدقاء تانيين ليا هيجوا تقريبا كمان 8 أشخاص فرحت جدا وروحت جهزت كل حاجه مع اني كنت كبير بس كنت فرحان كأني طفل صغير وروحت جبت تورته كبيره عشان تكفي ال11 شخص الي هيجوا كلهم وجبت مشروبات وجهزت كل حاجه وكنت مستني بفارغ الصبر وقزلت لأهلي أن كل صحابي جايين فجأه لقيت واحد ورا التاني بيتصل عليا وبيعتذروا انهم مش هيعرفوا يجوا انا من الصدمه قولت ممكن يكونوا بيضحكوا عليا وهيعملوا مفاجأة وهيجوا واستنيت ساعه ونص كدا بس للأسف اقتنعت أن مفيش حد جاي بعد ما جهزت كل حاجه التورته الكبيره الي كنت جايبها من مصروف حوالي شهر او من الفرحه الي كنت فيها ولما اهلي عرفوا بدل ما يطمنوني يتريقوا عليا ويقوليلي أن مفيش حد بيحبك عشان كدا محدش جه ليك ومفيش حد بيحبك منهم قلبي يومها اتكسر وقررت اني معملش عيد ميلاد تاني في حياتي

لما اللى كانت صديقتى المقربة كانت عارفه انى انا وبابا بنتعالج نفسية وبعدين كنت بحكى عن حاجه وعرفت ان اختى كمان طلع عندها اضطراب قلق ف قالتلى دا انتو عيله عاوزين العباسية من وقتها متعاملتش معاها تانى بس بجد الموضوع دا وجعنى جدا

حصلي موقف من كام يوم لازم أشاركه بجد مش عارف اتخطاه كنت بحب بنت عملت معاها كل حاجة وحاولت اتقدملها واخد خطوة مع ان ده عكس طبيعتي الجبانة البنت كانت محترمة بصراحة ورفضت اني اتقدم بس كنت حاسس ان عادي مش مشكلة لحد ما كنا في خطوبة واحد زميلنا لقيتها واقفة هيا وصاحبتها بيبصولي ويضحكوا من تحت لتحت في الاغلب بيتريقوا عليا بجد دي من اكتر المواقف الصعبة الي عدت عليا مش عارف اتخطاها لحد دلوقتي

أنا إنسان فاشل نوعا ما هناك أشخاص أعتبرهم أصدقائي يؤذونني نفسيا بحيث أنهم يتظاهرون أنهم ينصحونني لكنهم في الحقيقة يدسّون السخرية في النصيحة و يتعمدون تذكيري بفشلي و ينظرون إلي نظرة استهزاء و يتظاهرون بصداقتهم لي ،بسبب هذا لا أستطيع أن أنام بل أفكر فقط فيهم لا أستطيع التوقف عن التفكير في معاملتهم لي والله لا أستطيع النوم بسبب ذلك ،يا ليت أحدكم يدلني على خلاص من هذا الأمر .والسلام عليكم