سن

انا رجل داخل 32 سنة لسة مالقتش بنت الحلال للاسف، دلوقتي بنزل برنامج اسمه مسلمة المفروض انه للبحث عن شريكة الحياة، هل دي خطوة صحيحة ولا هتكون لعب عيال، حد دخل علي البرنامج دة قبل كدة؟؟ انا اتبعت الطرق التقليدية للزواج عن طريق الصالونات وللاسف مش جاية معايا وللاسف ماليش اي علاقات مع الجنس الاخر سواء في الشغل او برة الشغل و كان ديما مقفول عليا زي ما بيقولوا فهل ممكن البرنامج دة يكون خطوة للامام؟

ازيكوا عاملين ايه انا بنت كبرت في السن و نفسي كنت اكون اسره و احس اني ممكن احب و اتحب و لكن محصل و انا ليا اخت نفس الموضوع ناس كتير اتكلمت معايا على اني اتعملي ليا و اختي عمل بكدا و اكدوا الموضوع و لكن احنا لسه زي ما احنا و بقى سننا 43 سنه و احنا نفسنا نحب و نتحب و نكون اسره بجد و ناس كتير كانت تهجمنا على ان احنا سبب في الموضوع و ناس تانيه تقول اكيد ناس كانت بتتقدم و احنا اللي بنرفص و لكن بجد مفيش و ناس بتهاجم بدون سبب هو احنا الغلط من عندنا مش قدرين يفهموا ان الموضوع بعيد عننا

بجد بدون افكار فلسفيه انا شايف ان الارتباط في السن ده مش هيجيب غير مشاكل سواء انك هتحس بانتماء زائف ممكن يتسحب مك في ثواني او انك تحس بانك مستهلك علشان في شخص دخل حياتك وبقا يستغلك او حتا انك تضطر تشتغل اكتر بس علشان تشتري ليها طلباتها علشان تفضل معاك فاصبح وجود الانسان معاك عائق مش تحفيز لكن لما نيجي نبص علي الاكبر مننا سنا بنلاقي في اختلاف الارتباط م مجرد حب لا يمكن تقيمه هو حاله كامله من المشاركه سواء بتقديم دعم نفسي معنوي من المرئه او دعم مادي و جسدي من الرجل وعمرك مهتوصل لمرحله النضوج النفسي دي طول منت في السن ده لان السن ده مجتمعيا هو سن انفتاح الثقافات على بعض المباح و المحظور بقوا شئ واحد علشان كده اصبح من الصعب رؤيه الخطئ او حتا تجنبه اصبح انك لازم تجرب الخطئ علشان تتعلم منه و في مننا مش بيتعلم اصلا وبيكمل وقوع في نفس الخطئ بالنسبه ليا انا كنت بدات اتعلق بوجود بعض الاشخاص في حياتي كنت مبسوط بوجودهم و كنت بشاركهم اغلب افكاري و تخطيطاتي و كانت محادثاتي معاهم محادثات عقلانيه تماما ولكن الموضوع اصبح بالنسبه لي يؤثر على ميزاجي اليومي بمعنى اني اصبحت متعلق بوجودهم لما يكونوا موجودين كنت بفرح و العكس كنت بزعل علشان كده قررت اني امشي وقد كان اه طريقتي في الانسحاب طفوليه ولكنها كانت اسلم طريقه للانسحاب دون مشاكل بعيدا عن كل ده هي مكنتش ارتباط ولكن وجدت ان صداقتي مع بنت هتسبب لي مشاكل على المستوى النفسي حتا لو الكلام كان في حدود المنطق والمعقول قد اكون غريب في اللي بقوله قد اكون مش متقبل ليك لكن ده اللي انا حسيته فعلا و ده اللي حبيت اشاركه معاكم

انا ديما شايف هنا سن ال 20 فقط هوا سن ال 30و 35 راح فين يا جماعه مش موجودين ولا موجودين وعاملين نفسكم صامت اتمني تكونو بخير واللي عايز يتكلم انا موجود تحت امره في اي موضوع او مشكلة مش عارف يحلها يمكن اقدر اساعده

العربيات كانت رخيصة وانا اتعولقت ومشترتش حاجة بسبب حوارات كتير ملهاش لازمة كانت شغلاني .. دلوقتي رجعت تغلي تاني .. و المستعمل كله تجار حرامية .. غير اني مش خبرة ف المجال و خايف يضحك عليا .. ــــــــــــــ سبب تصميمي علي شرا العربية هو اني حاسس ان فيه بنات مبتكملش معايا بسبب أن مفيش عربية .. هما مبيقولوش كدا بصورة صريحة طبعا .. بس حسيت اخر مرة اني قليل ف عنيها بسبب الحوار ده .. كدا كدا محصلش نصيب معاها .. بس انا مش عايز احس الاحساس ده تاني .. خاصتا أن سني كبر نسبيا ولسة مرتبطش حتي

انا مهندس 32 سنة بس لسه مجوزتش مش عارف الاقي الموصفات ال انا عايزهاا عايز انا ةاحد مفيش حاجه فارقه معايا وسيابها كدا ومش بحسبها ب الورقة والقلم مش عايز اتجوز جواز تقليدي ال هوا واحدة عايزة تتجوز وتخلف لا،عايز واحده ننبسط مع بعض ونكون اصحاب ومش لازم نخلف عادي والدنيا تبفي ايزي عادي وعايزها مشتركة في نادي

الواحد عنده مشاعر الوحده و أن الشخص وصل لسن و عايز ونس و حب المشكلة الواحد نفسه يلاقي الإنسانة ده و بيحاول بس مش بيلاقي فالواحد دخل الجروب عشان كده ممكن يلتقي شخص قريب من حالته و يعني يركز معاه

انا مش كويسه ومش عارفه اتصرف اتقدملى شخص اهلى موافقين عليه بس من اول مشوفته وانا حسه انه مش هو ده الشخص الى عوزه اكمل معاه حياتى المهم بعد ظغوطات عملت قرايه فاتحه وحاليا بتعرف عليه هو كويس وبيحاول يراضينى مش هكدب بس هو مش التيب بتاعي وساعات مهتم وساعات لاء ودي حاجه موتراني اوي ومش عارفه اخد قرار هل اكمل ومش عارفه هتبسطت بعدين ولا لاء ولا ابعد من دلوقتى واضيع حد محترم وخصوصا اني ف ارياف وبالنسبالهم اني سني كبر فمش من حقى اختار خلاص

بفتكر ايام الكلية لما كنت طالب كحيان فى سنة اولى وتانية اما كنت اطلع على السلم والاقى الشباب والبنات بتوع تالتة ورابعة وهما قاعدين جمب بعض على السلم ومعاهم ساندوتشات الجبنة وقاعدين بيضحكوا وياكلوا كان نفسي اعمل زيهم وارتبط ويكون ليا حبيبة انا خريج تربية فنون بس ما بشتغلش فى تخصصي اشتغلت فى التسويق حبة وبطلت المهم نفسي ارتبط وتعرف على Girlونحب بعض انا ٢٩ سنة تفتكروا كدا كتر الزواج فاتنى ولا ايه وساعات لما اصور نفسي بحس انى شكلى مش جميل مع انى نوعا ما شكلى حلو وبلبس كويس ماما كانت بتحبنى جدا رحمة الله عليها وكانت بتجببلى لبس دايما مش عارف اعمل ايه.

عندي مشكلة غريبة، هي اني مش بعرف اتربط ببنت، بيبقا نفسي اوي بس ببقا خايف اخد الخطوة دي، بصراحة احترت اني احدد السبب.. زمان كنت بقنع نفسي اني علشان مش مقتدر ماديا وكدا .. لكن دلوقت الحمدلله الدنيا اتغيرت ١٨٠ درجة وجبت شقة ومعايا فلوس كويسة الحمدلله. بس نفس المشكلة ، معنديش الجرءة اني اكلم بنت واعبرلها عن مشاعري! مش عارف لية واي السبب ف كدا .. لما فكرة الفلوس أنها معطلاني اتشالت، بقيت بحس أن شكلي هو السبب! مع أني عادي مش وسيم ومش وحش يعني! بس مش قادر احدد السبب وحياتي واقفة وسني بيكبر كل شوية!

جماعة دلوقتي انا مخنوقة جدا جدا انا في اخر سنة جامعة كلية عادية مش علمي ،انا بتمني زوج يكون متدين عارف ربنا بشكل كويس وانا مختمرة وبسعى جاهدة اقرب من ربنا اكتر ،عايز يكون زوج سنه قريب من سني ميكونش فوق ال ٣٠ سنة ودا حقي اكيد دلوقتي كل اللي بيتقدم بيكونوا فوق ال ٣٠ ومش معاهم تعليم عالي او مش متعلمين وكدا اهلي والعيلة كلها شايفين انه عادي ،يجماعة بجد انا بالنسبة ليا عادي والله التعليم مش فارق بس انا مش عايزة اتجوز حد اكبر من ٣٠ سنة ،محدش مقتنع دلوقتي اتقدم عريس امبارح عنده ٣٢ سنة مش مكمل اعدادية ،وهو مسافر برا واهله لوحدهم هنا وعايز واحدة تقعد معاهم وخلاص انا بالنسبة ليا هو انسان محترم وكل حاجة بس انا مش مرتاحة ،مش شايفة ان دي حياتي اللي هعيشها بعد كدا ازاى بقا اهلي وبابا يسبوني في حالي كل شوية نازلين رن رن رن عليا خصوصا بنت عمي وانتي ازاى ترفضي ولو رفضتي يارب يحصلك كذا وتدعي عليا قولتلها انا قلبي مش مرتاح يستي هصلي استخارة والله يا جماعة بجد قلبي مقبوض اوي من ساعة العريس دا ، انا رفضته اصلا وكنت اتمني بابا يقف جمبي بقا لا بابا فضل يقولي انتي كل ما يجيلك عريس ترفضيه ، مش هو دا الرد اللي كنت مستنياه منه خصوصا ان مش بييجي عريس كل يوم يعني وكمان عمتي لما جت تكلمني تقولي ما اصل دي فرصة ليكي علشان انتي ضعيفة (رفيعة يعني ) قولتلها هو انتوا تفكيركوا دا ازاى بجد ؟ قالتلي محدش دلوقتي بيتجوز غير البنت اللي عودها كويس وجسمها شكله حلو والجو دا قولتلها دا في دماغكم بس محدش محترم عايز يتجوز بنت متدينة محترمة هيشوف هي رفيعة ولا مش رفيعة بجد يا جماعة انا هتشل من التفكير ،وكمان عيلة بابا بقالهم فترة بيزنوا عليا علشان اخد حبوب النفخ والحقن والحاجات دي وانا رافضة لانها غلط ،هتسالوني وفين مامتك هقولكم ماما ماتت من ٦ سنين وسابتني في الهم دا لوحدي وانا اكبر واحدا في اخواتي

ازاى اتعامل مع فكرة اني متجوزتش و ان كل اللى حوليا بيضغطو عليا ف الحته دي و اني خلاص داخله على ال ٣٠ ف نفس الوقت بجد اللى بشوفه بيبقو ناس مريضه نفسيا محدش كان سوي نفسيا استريح معاه لو اتجوزنا حاسه بضغط و وحدة و خنقه

سني ٣٣ سنة مهندس ومش متجوز او خاطب للاسف عايش وحدي شغلي مقدرتش اعمل منه غير مبلغ متواضع جدا بالعكس بيقل ومش هيساعدني علي الجواز في الاسعار المجنونة دي من ناحية الشقة والخطوبة والخ وكل لما بفكر ارتبط بحس اني طالما مش جاهز ماديا يبقي ماينفعش علشان مظلمش حد حاسس اني كبرت خلاص ومش هتجوز او يبقالي اسرة حتي اني قولت اغير الشركة اروح لمرتب اعلي وبسعي وبدور بقالي كتير بس للاسف مش متوفق هل اتنازل عن الفكرة ولو كدا ايه الهدف من الحياة اللي مناسب للمرحلة دي غير الجواز