قرار صعب

انا من فترة بسيطة عرفت أن صاحبتي حاولت الانتحار اكتر من مرة ولان كل واحد فينا انشغل ف حياته ماعرفتش غير من قريب ووقتها هي كلمتني انا محتاجة وجودي جمبها وانا عملت اللي اقدر عليه خرجنا وغيرنا جو وشغلت وقتها بس اخر كام يوم كان عندي امتحانات ومع الأسف انشغلت ومش عارفة اسأل عشان اصحى النهاردة على مكالمة من مامتها بتستنجد بيا اساعدها لأنها رافضة حتى تروح المصحة ومع الأسف ده الحل الوحيد والسبب ف كل ده شخص كان ف حياتها وكانت بتعتبره كل حاجة ومصدر الامان وهو فعلا شخص كويس بس مع اللي بتعمله ولوم أهلها ليه أنه ممكن يكون السبب مع أنه العكس هو انسحب ورافض رفض تام رغم محاولاتها كلها ومحاولتي معاها أنها تنسى بس هي تقريبا بقت مريضة بيه .. هل من الصح اني اتواصل مع الشخص ده مع اني عارفة الضغط اللي هو فيه ولا بلاش عشان ماياخدش رد فعل عنيف ويقلب نتيجة عكسية .. اعمل ايه بجد.

يجماعه انا مقهوره ومدايقه جوزي عايز يطلقني علشان يرضي مامتو وتقريبا هيتجوز بنت خالتو كمان وانا مبقتش قادره امسك فيه علشان كرامتي لكن في نفس الوقت مش قادره اطلق حد يقولي اعمل اي علشان تعبت

دلوقتي انا بحب بنت في اختلاف ف الدين بينا.. وللاسف احنا الاتنين متعلقين ب بعض جدا ومحدش فينا قادر يبعد عن التاني.. ومعنديش استعداد اكسرها بجد لأني فعلا بحبها جدا وهي كمان بتحبني ومع بعض لينا فتره ومستحملاني ف كل حاجة حتى مشاكلي شايلاني فيها وواقفه جمبي.. يعني حتى مفيش حجه اسيبها عشانها.. مش عايز اكسرها وف نفس الوقت خايف افضل معاها تتأذي بسببي

أنا شخص كنت ف قصه هنقول أنها كانت حب من طرف واحد والطرف دا انا لكنها مظبطتش وانا لسه حاليا بحاول اتعافي أنها خلاص معدتش ليا لأنها اختارت تتخطب مع اني عرفتها اني عايز اخطبها ومدتنيش رد ولا حتي سبب رفض وأنها اهم سبب ليها أنها تبقي جمب مامتها لما تتجوز خصوصا أنا من محافظه وهيا من محافظه تانيه أنا سؤالي ان بيني وبينها شغل لسه مستمر لحد دلوقتي هل الصح ليا اني أوقفه مع أنه مصدر دخل ليا هفقده وهيأثر عليا اكتر ولا اكمل واستحمل بس بحس بوجع رهيب لما تتأخر عليا ف الرد حتي لو كان كلام شغل

صباح الخير جايلي فرصة شغل اوي ف السعودية بس عدد ساعات كبير و اسف يعني بس مبرتاحش لإخواتنا السعوديين خالص و التفاهم معاهم صعب .. بس الفرصة كويسة و بردو انا هنا مش باخد سالري قليل خالص بس السالري هناك اكيد أعلى .. انا محتار بعد ما اتقبلت ف الانترفيو و بردو خايف على نفسي عشان فيه فتن معينة ف السعودية عارف اني ممكن بنسبة كبيرة اقع فيها

سامحوني لو بتكلم في الموضوع ده كتير بس الحوار شاغلني بجد. و ياريت الرد من رجاله. دلوقتي انت اتقدمت لبنت و لما روحت البيت لقيت ان واضح جدا الأهل مش احسن حاجه مع بعض و الاب مش كويس مع بنتو و بيهين بنتو بالكلام قدامك بشكل واضح يعني و النسب مش أحسن حاجه مجرد ناس عاديه. هتعمل ايه خلاص هتشيل البنت من دماغك ولا هتفضل مكمل؟

هو أنا عندي حلم، هو مش تقليدي خالص لتقاليدنا وحتى الناس بتجادج لما تعرفه، و بشتغل على نفسي فيه، بس خايفه لما ابدأ اكون عايزه احقق الحلم ده، حد من اهلي يرفض او يقولي مينفعش علشان الناس وكلامهم، هل اكمل و اجازف علشان مندمش؟ و ادوني طريقة ابقى اقنع اهلي بيها، حاسه اني في تشتت رهيب

من ست شهور شلت قريبي من عندي كلامنا كان عادي جدا ولا فيه اي حاجه بس كان الموضوع شاغلني و حسيت انه فيه حاجه حرام انه عندي و خصوصا ان حجابي مش كامل قولت اشيله و بظروفها المهم انا شيلته من عندي فجاة منغير ما اقوله و شوفته بعدها بشهور بمناسبة الاجازة و بتا ع و هو زعل معاكم ان الحركه وحشه اوي بس محدش يقولي ما يتفلق ولا يزعل هو شخص انا بقدرة جدا و بحبه جدا كاخ و هو قريبي الوحيد الولد بعد الاجازة دي حسيته زعل مني و واخد جمب فهمته قصدي و قولتله انه مكنش قصدي انه زعلني او انه شخص وحش و فهمته قصدي و هو تقبل و قالي عندك حق و خلاص مفيش مشاكل المشكله انا داخله فالسبع شهور و حاسه باحساس وحش و هو كان اقرب حد ليا و لما حسيت انه اخد جمب مني اكتشفت انه مكنش فيه حد بيكلمني لما بنكون قعدين غيره او بيهزر معايا او مهتم لكلامي حسيت فعلا بالوحدة يمكن كان الوحيد الي بكلمه و برتاح معاه فالكلام و هو تقبل الكلام دلوقتي قريبي لما بشوفه معلق عند بقيت قريبياتي البنات و اختي بحس بغصه في قلبي كان فارق معايا لكن مكنش اعجاب او اوهام او اي حاجه مكنتش حاسه بوجودة الا لما راح و عارفه انها دخلت شيطان عشان ارجع تاني بس خلاص مقدرش عشان كرامتي و عشان مينفعش و عشان منظري و عشان شكلي و عشان حاجات كتير اوي بس انا الفترة دي مش احسن حاجه حاسه بوحدة و منكرش اني ارتحت انه بقى كل الي عندي بنات بس مع انه والله كان كويس جدا لكن قولت الحاجه الي ترضي ربنا مفكرش فيها مرتين و بس عارفه انا دخلت شيطان لكن والله حاسه بوجع معرفش سببه لكن حاجه متعلقه بيه كانت معايا طوفلتي كلها و انا الحفيدة الي وراه على طول و اغلب الي حوالينا بيقولوا اننا فاهمين بعض و دماغنا زي بعض و بكرر تاني كان كلامنا كله عادي جدا قرايب بس يلا الحمد لله سبت الامر ده ابتغاء مرضات الله و مقبلش ان حد يقول عليه كلمه وحشه

مشكلتي كلها في حياتي سببها الشغل بشتغل call center في بنك بقالي سنة ونص و الشغلانة مستنزفاني بنسبة 100٪ لدرجة اني دلوقتي جالي نوبة قلق بسبب اني رايح الشغل عايز اسيبه و مش لاقي غيره و مش عارف اعمل ايه هل اسيبه و اقعد في البيت لحد ما الاقي غيره في مقابل صحتي و سلامتي النفسية؟ ولا افضل فيه و نفسيتي تفضل تتدمر اكتر بس في مقابل الفلوس لحد ما الاقي غيره مع العلم اني الحمدلله انا سني صغير 23

مساء الخير ياجماعة.. انا شاب عندي 31 سنة فسخت خطوبتي من ساعات واللي استمرت لمدة سنة بسبب القايمة وعن اقتناع تام، مس حاسس اني ندمان بس ممكن تايه شوية.. لو ممكن حد مر بتجربة مماثلة يقولي رأيه