ليه طول البنت دايما عامل أزمة؟ ليه البنت الطويله دايما مرعبه ولازم نبعد عنها؟ انا طويلة طولي ١٧٥ من و انا صغيرة دايما نقدر نقول بيتم إستبعادي، في المدرسة لازم اقعد في اخر ديسك عشان انا طويلة اوي، لو في عرض في المدرسة لا مش هينفع نختارك عشان انتي اطول من كل الي في العرض و شكلك هيبان مختلف فا مش هينفع. كبرت بقيت بيص للهيلز من بعيد كأنها حاجه حرام مقدرش ألبسها لان لو لبست كعب هكون طويلة اوي و هيبقا طولي مبالغ فيه بالنسبة لبنت. انا ذنبي ايه اني اتولدت في مجتمع ملئ بالبنات ال ١٦٠سم و ١٥٠سم مش قصدي إهانة ليهم، لاكن ليه لازم طولي حاجه استعر منها لاني اكتر من ١٦٠سم؟ لا و الجمله الاكثر إستفزاًز "متلبسيش هيلز يا حبيبتي عشان نلاقيلك عريس في طولك" ليه ملبسش هيلز عشان الاقي عريس بجد؟ هيفيد بأيه العريس لو هو اقصر مني اصلا؟! وليه امتنع عن حاجه بحبها عشان حاجه مش مضمونه؟ يعني اديني ملبستش هيلز و مفيش عريس جه يبقا كده انا ضيعت علي نفسي فرصه اني البس هيلز! و جملة "ايه زرافة معدية؟" ليه حاجه زي دي تتقال لطفلة؟ تخليها تكره نفسها و طولها؟ "ملقوش في الورد عيب قالوله يا احمر الخدين."