دلوقتي انا بني آدمة باردة برود غير طبيعي، ده ظاهريا، بس لما برتاح لحد بفك وبضحك وببقى عادي.. واحدة من اللي عرفتهم يعني وقربنا من بعض، كانت بتقولي انها قبل ما تعرفني كانت بتشوفني دحيحة اوي وهادية كده، ومغرورة ومتكبرة ومكتفية بنفسي اوي و indpendent وبتاع، وببص للناس من فوق اللي هو انا احسن منكم، وان حتى تعابيري ولغة جسدي من غير ما اعمل حاجة بتوحي بكده، ده غير طريقة مشيتي وطريقة كلامي وكل وده، وان لولا انها عرفتني بالصدفة مكانتش هتتكلم معايا خالص. وحتى السنة اللي قبلها اما كانت بتشوفني كانت بتبقى هتموت وتكلمني ونروح سوا بس خايفة اني اتضايق او كده. انا فاهمة ان عشان يمكن انا اتعودت بسبب المركز الاجتماعي والمادي وطريقة التربية والناس المحيطة، وآه مغرورة بس مع عينة من الناس اللي ممكن تكون بتكرهني ف بتعمد اعاملهم كده، وكاريزمتك جدا وانا عارفة ده.. بس مش حاسة ان تعابيري بجد بتوحي بكمية الغرور دي، يعني انا ممكن ابقى بفكر هنتغدى ايه انهاردة اصلا وحد شايفني ببص بغرور.. هي قالتلي ان انا شبه حواليا هالة كده حرفيا بتريح اي حد يقعد جنبي بس بتحسسه برهبه ف نفس الوقت، ف اللي هو عايز يكلمني بس خايف اعامله وحش او كده.. المشكلة اني سمعت الكلام ده كتير اوي وبأكتر من طريقة؛ ان انا فيا قبول غير طبيعي، ودي سمعتها حتى من مدرسين، وان انا احيانا هدوئي وبرودي بيخوفوا ودي من اللي ف سني بالذات.. وانا والله دي طبيعة شخصية ومش عارفة حوار الملامح ده ولغة الجسد ايه بالظبط بجد. انا مكانش الموضوع فارق معايا خالص لاني اصلا بحب العُزلة في الواقع، بس بدأ الموضوع يضايقني لما بدأت اروح المدرسة والحضور الاجباري وكده.. بقيت اروح، اقعد لوحدي، وهو الديسك اصلا بياخد ٢ او ٣ بالكتير اوي، ولو ٣ مش بيكون اللي قاعد مرتاح اصلا، وانا قاعدة ف ديسك لوحدي ومحدش بيقعد جنبي ويرورحوا يقعدوا ٣، رغم اني والله لطيفة ف التعامل ومتفوقة، واللي بيطلب مني حاجة مش ببخل وبديه اللي عندي وزيادة، واسلوبي والله ذوق جدا.. بس انا تقريبا مدياهم انطباع ان انا مش طايقة حد يقعد جنبي او يقرب مني، حاجة شبه كده.. ف دلوقتي اعمل ايه؟ والصراحة العينة اللي فالمدرسة انا بكرههم كلهم فعلا بسبب قلة ادبهم واسلوبهم، بس برضو بحس اني لوحدي ومتضايقة طول الوقت لما بروح هناك..
