اي الحاجه الي غيرت نظرتك لنفسك

كنت بشوف نفسي اعقل واحده ومبغلطش وعاقله جدا لغايه ما اكتشفت انا كل سنه بنتقد شخصيتي السنه الي قبلها وعارفه ان السنه الجايه هنتقد نفسي دلوقتي بس بحاول ارضي نفسي علي قد ما اقدر انا بجد عنديه جدا ومتكبره وعايشه دور مش دوري دور كنت اتمني يبقي انا

الصُحبه غيرتني خلو نظرتي لنفسي فيها ثقه وثبات كدا بقيت بشوف نفسي بعنيهم بفرح وبحس قد اي انو ربنا أكرمني بيهم في حياتي علشان يساندوني ويقوو مني لما ببقي محبطه وزعلانه علي حاجه يقولولي مبتقفش يا بنتي متزعليش من من قيمتك متتعلقيش دا مش انتِ أنتِ غاليه عن أن الدنيا اللي ملناش مكان فيها تزعلك احنا جينا نزرع بس وهنحصد قريب متتعلقيش بيها لا بصحاب ولا علاقات ولا بأماكن متتعلقيش

ذنب وقعت فيه ومرحلة بمر بيها حاليا مخلياني مش قادره اتعرف علي نفسي من الاساس ولا افهم مين البنت الجديده اللي انا عليها بقالي شويه ديه ؟؟ هي مش انا وعدم تغيري للوضع الحالي بيخلي الاحساس ده يزيد اني باصه لنفسي بصه استغراب ومش عارفه مين الانسانه اللي انا عليها دلوقتي زائد خروج الانسان اللي حبيته من حياتي بكسره منه زود احساسي بالضعف والعجز وانا مش متعوده اكون لا ضعيفه ومهزومه

دايما كنت بحس اني فاشل حرفيا الاحساس كان موجود جوايا لفترة طويلة لحد ما اقتنعت بحاجة مهمة جدًا إني حكمت على نفسي بالفشل على الرغم إني محاولتش اعمل حاجة فهو حرفيًا حكم مش صح لاني حتى مجربتش أو حاولت عشان افشل واللي اكتشفته إن انجح الناس هما اللي حاولوا مرة واتنين وعشرة لحد ما وصلوا للهدف اللي هما عايزينه يعني حتى بعد المحاولة لو وقعت مينفعش تقول انك فشلت الحالة الوحيدة اللي ينفع تقول انك فشلت فيها هي الاستسلام وهنا عرفت إن الاستسلام هو الفشل الحقيقي وإن الظروف هي الشماعة اللي بنعلق عليها فشلنا

قبل ما ادخل الكليه كنت شايفه نفسي وحشه لدرجه فظيعه و شايفه نفسي متحبش و شايفه اني ممله و تافهه جدا لحد ما دخلت الكليه و اتعرفت علي صحابي ف الكليه و الحقيقه نظرتي لنفسي اتغيرت خالص لما لقيت نفسي متقدره و لقيت ناس شايفاني احسن صاحبه عرفوها و اني بجد شخص كويس اوي و استاهل اتحب بقي بيتقالي جمله انا بنزل الكليه عشانك و انتي بجد حد كويس اوي او يريتني عرفتك من زمان و حاجات كتير صغيرة بس بجد بتفرق معايا بجد فهمت ان الدايرة اللي كنت متحاوطه بيها من صحابي التانين كانو بجد مستنزفين طاقتي و لما بعمل اي حاجه و بضحي مبلاقيش تقدير لكن فعلا نظرتي لنفسي اتغيرت بجد عرفت اني صاحبه متعوضش و قدرت نفسي فعلا