ليسي

مانيش عارف نحكي بصح معليش، المهم أنا إنسان عندي 20 سنة، في الليسي كنت نحب وحدة من النهار اللول لي دخلنا فيه، كنا في نفس الكلاصة كامل الأعوام الثلاثة. كنت نحبها لوحد الدرجة لي اذا شفت في وحدة خلاف كنت نكره روحي، كنت حابها هي لي ندير معاها الذراري، تالمون جاية شابة و عاقلة، وخاطيها اللعب السامط، رحت عندها في العام اللول وقلتلها، قاتلي "مانحبش ندخل في هذا اللعب" أنا تماك زدت حبيتها، خاصة كي جامي لا شفتها مع واحد، وهي كانت علابالها بلي مزالني حابها، في العام الزاوج، مشي رحت و قلتلها في وجهها، كنا نحكوا انسطا وشريتلها وفهمت، وفي العام تاع الباك، خلاص ماقدرتش، قلت نحطلها كلش، رسلت ميساج طويل، حكيتلها على واش راني نحس من جيهتها، و واش راني حاب في المستقبل معاها. لكن الرد كان شوية قاسي، قاتلي ني نشوفك كي خويا. تماك كنت على شعرة ما نهبل، درت في بالي بلاك راح تخليني آمي معاها في مواقع التواصل، بصح بعد مدة شفتها ماولاتش تبان، دخلت نشوف لقيتها مبلوكيتني من كل جهة، و كي دخلت من الكونت الزاوج تاعي، لقيتها مخلية كامل لي كانوا يقروا معانا، حتى هذوك لي حبسوا. و لحد الان مزالت هذيك العفسة قاعدتلي في قلبي، حتى و لوكان نحكيها ماتبراش....... واش رايكم، كون غير ماحكيتلهاش ولا مزية لي حكيتلها