السلام عليكم، عاملين اي.... كنت بس حابب ابين قيمة الكلمه بموقف انا مريت بيه شخصيا، انا عندي الصراحة رهاب اجتماعي والحمدلله منتظم في صلاتي الفروض في المسجد، فيوم من الايام قدمني واحد صلاة العصر، وعشان اول مره يعتبر كانت اصلي بعدد كبير فخوفت اوي ودخلت ولكن ركبي كانت بتخبط في بعضها وكنت سريع جدا في الصلاة وانا مكنتش مدرك كل دا، الحقيقه بعد ما خلصتي جه الشحص صاحب الكلمه الشريره وزعقلي، قالي يااستاذ انت مستعجل لي هو انت وراك حاجه لو وراك متجيش تصلي، انا وقتها ادركت خطأي وقولتله حصل خير وعديتها، حد في حالتي كان قال والله العظيم انا مش داخل الجامع تاني ولكن لا روحت في صلاة المغرب ووقفني هناك (عم فرج وذكرت اسمه عشان تدعوله) وقالي ياعم احمد انت مدايق لي ما انت عارف عقليات الناس هناك هي غريبه عنك، انت بس استعجلت شوية والمره الجايه تبقا احسن، تاني يوم في صلاة المغرب تقريبا قدمني واحد صلاة ووقتها قلت الرهبه، ودخلت وقدرت وقتها افرض قدراتي، من اتقان للقرأة الحمدلله وصوت كويس، وقتها خلصت ووندى عليا راجل كبير(عم سعد ادعوله) وقالي هو انت الي كان بيزعقولك امبارح قولتله ايوا، قالي طيب ما انت حلو اهو ما شاءلله وربنا طارح فيك البركه وحط ايده على ضهري كده وارتحت نفسيا وقتها، وتاني يوم كذلك دخلت وقرأت وابدعت (كانت في صلاة جهريه)، االحمدلله وقتها وقفني (عم رزق) وقالي ما شاءلله عليك اهو بقيت افضل عاوزك تعلي صوتك كده وقالي نفس الكلمه ربنا طارح فيك البركه، الحقيقه الاربع اشخاص بأربع كلمات مكلفتهمش ابدا ستين ثانيه حتى، ولكن في الي قال كلمه طيبه صدقه كما قال رسول الله "االكلمه الطيبه صدقه" وفيهم الي قال كلمه ولكن خبيثه كانت ممكن تخليني مروحش الجامع ابدا ولا اصلي تاني حتى.
