مشاكل شخصية

هل المشكلة ممكن تتحل بالتجاهل؟ زي مثلا مشاكل الشخصيه و التعامل مع الناس و الرهاب و المقارنه و كده بتتعبني و بتاخد مساحة كبيرة من تفكيري و بتشغلني عن حاجات تاني كتير فهل لو اتعايشت عادي و اشغلت نفسي المشكلة هتتحل؟ عشان حاسه اني مدياها اكبر من حجمها بس هي فعلا مستنزفه كل طاقتي و يكاد اغلب مشاكلي هنا عالبرنامج حوالين الحوار ده

دكتور 35 سنة ، بدرس دبلومة ارشاد نفسي واسري بجانب التخصص الاصلي بتاعي ، المهم : اكيد عندي مشاكل كتير ولذلك عندي حيلة دفاعية وهي ان احل مشاكل غيري، ودا بيساعدني فعلا الحمد لله،، خصوصا انكم اصغر مني سنا وبتحترموني وتقدروني ودي حاجة بتسعدني جدا 😌 عموما انا عارف ان اكبر مشاكل اتعرضتم ليها هي التحرش او الاساءة الاسرية وعدم الاهتمام وعدم الاحترام وهكذا ولذلك انا جمبكم دايما وفي انتظاركم يسعدني انكم تعتبروني اخوكم الكبير ومن قلبي يا رب تكونوا دايما بخير 🌷

انا مبعرفش احل مشاكلي الشخصية بشكل صحي بس بعرف ادي حلول منطقية حتي علي نفسي، و اه المنطقية لغيت حته الشعور عندي بس مريح دماغي، اه مبحسش بس بفكر ف لو عندكم مشاكل اتكلموا و لو عندي حل منطقي هرد عليكم

مشكلتي هي انا شخصيا ١-باجي على نفسي عشان التانيين يعيشوا مرتاحين ٢- المماطلة ٣-تعفن دماغي و جرعات دوبامين عالية يوميا ٤-عايشة في خيالاتي اني نجحت و حققت احلامي و انا حرفيا ما بتحركش من مكان ٥-مش محبوبة ٦-صحابي بعدوا ٧-تايهة و فقدت الهدف اللي كنت بسهى عشانه

جماعة انا عندي كذا مشكلة كدا في شخصيتي ومش عارفه بالظبط اعمل ايه اول حاجة انا شخصيتي ( الشخصية الحدية) و دي بسببها بتجنب دايما اي حاجة جديدة في حياتي واي ناس جديده وعندي خوف دايما من اي جديد وفي نفس الوقت ببقي عايزة الحاجة ومش عايزاها يعني مثلا عايزة اصاحب ناس جديدة وفي نفس الوقت مش عايزة اعمل كدا بتجنب عايزة اجرب حاجة جديدة وفي نفس الوقت لا ودي مشكلة عاملة صراع كبيرة جوايا تاني حاجة بقي مش عارفه اشرحها ازاي بس انا مش بحب حد يشاركني اي حاجة بحبها خصوصا الناس الي بحبها يعني مثلا لو صاحبت بنت واتعرفت عليها وبقينا قريبين ولقيتها بتتعرف ع ناس جديدة واندمجت معاهم وبقت قريبة ليهم وهي عادي لسه صحبتي وكل حاجة بنسحب تدريجيا واتقفل منها اي حد قريب مني بغير جدااا لما الاقيه قريب من حد غيري وبجد ممكن انسحب واسيبه وامشي انا بغير جدا من اي حاجة تخصني وممكن افضل لوحدي عشان بس محسش بالشعور دا مش عارفة بقي دا اسمه ايه وايه الحل؟!

جدااا خاصة في مشاكل الآخرين الواحد مخي بيدي نصايح و بيكون بيحتوي اللى قدامه ولا كأنه لايف كوتش بقاله ٢٠ سنة مثلا 😂 ييجي يبص بقا ع حياته الشخصية يلاقيها يا ساتر يارب بشعة 😂💔 مش عارفه المشكلة فين بالظبط ممكن عشان اتعودنا نشيل هم غيرنا بس همومنا لازم تكون مهملة لازم نساعد غيرنا بس ماحدش يساعدنا

من وجهة نظري المتواضعة ان معظم مشاكل حياتنا الشخصية هتتحل لو لقينا دعم نفسي كاف لو لقينا حد يسندنا ويقف جمبنا ويقوينا ويساعدنا منخافش من اي حاجة نواجها وقتها اعتقد هنقدر نواجه اي مشاكل بتقابلنا