مواهب

جماعة انا محتاجة اخد رأيكم ف كذا حاجة لو سمحتم يعنى 😁.. انا بنت عندى ٣١ سنة بحاول أغير روتيني ورتم حياتى كله..انا وبلا فخر مش بكمل فأى حاجة بس بحاول أبدا من أول وجديد بس مش عارفة المفروض أعمل ايه .. ياريت الي يقترح عليا يقترح عليا أماكن في جوا اسك^ندر*رية تحديدا أولا: انا مش بحب الشغل جربته كذا مرة بعد التخرج انى اشتغل منفعش مع شخصيتي خالص ومشتغلتش حتى ف مجالى لانى مش بحبه.. ثانيا: كنت متطوعة ف "جمعية ما" كذا سنة لحد م بقيت موظف متطوع لكن مكملتش برضو لأسباب كتير.. ثالثا:عندى مواهب كتير مثلا * انا رسامة وقررت اعمل دبلومتين ف فنون جميلة واحدة ديكور والتانية رسم زيت وفعلا بدأت ولكن لما بدأت لقيت ان الموضوع مش زى ماانا كنت متخيلة ف مكملتش.. بس اخدت كورسات برا فحم وباستيل.. *كان عندى براند حلويات من البيت واشتغلت كتير بس الحقيقة تعبت ف مكملتش وقفلت كل حاجة * انا بحب التصوير وبصور حلو اوى وبدأت اتعلم كاترنج بس مجرد تسلية *غير انى بحب القراءة والشعر وساعات بكتب يعني.. رابعا: انا عندى رهاب من فكرة الخروج لوحدى بس عايزة اجرب اعمل دا اقعد مثلا ف كافيه ع البحر واقرأ ف قولولى أماكن ...... المهم انى مش بكمل ف حاجة اشتغلت ف شركات تسويق وشركة اتصالات بس مش بحب الشغل.. لكن الايام دى عايزة انزل اعمل حاجة بعيدا عن الشغل مثلا ◇ اخد كورس إنجلش لانى بقالى كتير مش بمارس لغة وحاسة ان الانسان من غير انجلش كويس يبقى جاهل 😅 ف عايزة حد يرشحلى مكان بيعلم بجد في حدود اسكن،*در@ية زى م قولت ◇نفسي كمان اروح مكان له علاقة بالرسم يضيف ليا بجد واعمل صحاب منه كمان ف ياريت تقترحوا عليا ◇لو حد يعرف اماكن للتطوع برضو يقترح عليا ..... بشكل عام قوليلي أعمل ايه عشان استثمر ف وقتي وأستمتع وفنفس الوقت أعمل أصحاب جديدة.. مع العلم انى شخص بيحب البيت جدا وبنزل بصعوبة بس بحاول أبدأ عهد جديد مع نفسي.. شكرا مقدما😎

إني ممكن ملاقيش التقدير إلي أنا عايزاه و جربت كتير اتكلم و أطلع إلي جوايا بس مفيش فايدة برضو مش بتسمع و قليل أما بحس إن في حد مهتم يعرف جوايا إيه وأنا حاسه بإيه و كمان أهلي مكانوش بيهتمو بيا أوي يعني بيقولو لما كنتي عندك تلت سنين كنا بنعملك كذا وكذا بس بعدها مفيش حتى كانو بيضربوني بالحزام من وأنا 5 سنين و ماما بتضربني بالشبشب لغاية ما جسمي بيحمر بس هما برضو بيحاولو يحافظو عليا وكدا فأنا حرفيا مشتتة مش عارفة هما كويسين معايا وأنا ظلماهم ولا ايه و كمان محدش كان بيلاحظ مواهبي أو إني بعرف أرسم ومكانش حد فيهم بيهتم حتى لما ايدي اتكسرت كانت ماما بتزعقلي وبتقولي اني بتدلع مش عارفة في ايه لكن لما كبرت معتش في دماغها خالص ولا حتى بتسألني رايحة فين او جاية منين لا كدا و خلاص شوفي انتي هتعملي ايه واعمليه يعني ولا بتهتم بيا ولا حتى بتعاملني بطريقة طبيعية و كانو بيتنمرو عليا البنات الي في المدرسة و ولاد خالي عشان مناخيري كبيرة مع انها يعني عادية مش عارفة مالهم و بقيت بجد بخاف اوي ابقى تقيلة على حد او ميعبرنيش عشان محسش اني متجاهلة

السلام عليكم انا طالبه جامعيه حاليا. بس مشكلتي اني حاسه اني لوحدي اوي. بالرغم ان في ناس كتير في دايره معارفي و ناس كتير بيعملوني حلو حتي لو اول مره يشفوني، بس برده حاسه ان في ناس اكتر مش بتطقني. مع ني مش بءذهم ف اي حاجه و بحاول علي قد ما اقدر ما ازعلش اللي قدامي ولا احرجه. و اوقات كتير اوي ببقا نفسي اخد حقي من ناس بس ببقا بجد مش عايزه احرجهم او بتبقي في حتجه منعاني مش عارفه ايه هي. و بالرغم اني اعرف ناس الى حد ما كتير شويه لاكني برده خاسه بوحده و اكتأب. دايما حساهم بيتكلموا عليا في ضهري مثلا او حاجه شبه كده. اوقات كتير بحسهم مش عايزني اقعد نعاهم اصلا و بيخبوا عليا مواضيع. انا مش فارقلي هما اصلا، بس انا اللي فارقلي اني افهم انا ليه الناس بتعملني كده رغم اني بدي كل حاجه حلوه ليهم بجد. يعني مثلا، صحابي البنات دايما بمدحهم بشكلهم او شخصيتهم او ايا كان هو ايه فيهم حتي لو حاجه عاديه و انا احسن فيعا كمان. لاكن هما نادراااااا جدا لما يمدحوني في اي حاجه. مع ني مش بحب اكسر مهاطر حد. و لاحظت مؤخرا انهم اصلا شايفني مش ذاكيه زيهم. هما ماقولش كده بطريقه مباشره، بس لو مثلا عايزين يعرفوا حاجه ايا كانت اي هي و انا كنت عارفها مثلا و اقولها بيتفجؤه و يقولوا ما انتي بتفكري اهو! هو بس انا مش بحب اني اتظاهر بالمعلومات اللي عندي لان ليه اصلا؟! بغض النظر عنهم، انا اصلا شايفه نفسي محترمه و جميله و ذاكيه، ثقه في النفس مش غرور. و عندي مواهب كتير او مش قادره حتي اكملها و حاسه اني هفشل لو كملت. و بسبب اني ماعنديش هوايه واحده ثابته و دايما متنوعه، ده مخليني شايفه اني بوهم نفسي اني موهوبه في كذا حاجه و مش عارفه اتحرك. عارفه ان كلام الناس المفروض ميفرقش و كده، بس بجد تعبت لان برده اكيد في ضغط كبير اوي عندي في البيت و مشاكل عائليه كتير. باقيت تايهه و مش عارفه حتي اذاكر.

انا عارفة ان محاولاتى مش كفاية وانى محتاجة أعمل مجهود أكبر وإن القصة كانت ممكن تبقى مختلفة تماما لو بس عرفت أبدأ بشكل صح.. من وانا طفلة ولفترة كبيرة من حياتى مكانش عندى أوبشن الاختيار او ع الاقل سؤال نفسك تعملى ايه ويلا نخطط نعمله ازاى.. دايما كنت بمشي ع خط مرسوملى زى مثلا المذاكرة والمدرسة انا عمري م فكرت وقتها نفسي أبقى ايه كل الى كان بيشغلنى هى الدرجات عشان بابا وماما مش حيهتموا بمجهودى إهتمامهم دايما كانت بالنتيجة وانا مكنتش نفس المستوى ف كل المواد .. المهم ان وقت المدرسة كله عدى من غير خطة وهدف بعينه.. دخلت كلية واتخرجت وبعدين إتصادمت بالحياة فهمت ان كل الى فات انا مستفدتش منه بأى حاجة .. محاولتش أشتغل بشاهدتى لانى مكنتش متخيلة نفسي ف الشغلانة دى بس كان لازم أملى فراغ انى أكون بعمل حاجة قدام أهلى ف إشتغلت فشركة ليها علاقة بالاتصالات بس مكملتش وبعديت اشتغلت ف شركات تسويق مكملتش برضو لانى مكنتش فاهمة انا بعمل ايه وبعمله ليه .. مكانش عندى هدف ف كل حاجة بعملها .. كنت دايما ف موضع مقارنة من بابا وماما بيني وبيم اختى لان هى كانت بتحب تخصصها وكملت فيه بعد كدا وبتعمل ماستر واشتغلت فيه لكن انا بالنسبالهم كنت كسولة .. مخى إتشتت ف سكك كتير من غير نتيجةلدرجة انى حسيت فعلا انى فاشلة وكسولة .. بس بعدها ركزت مع نفسي و اكتشفت ان عندى مواهب كتير وان ربنا ميزنى بحاجات زى زى اى حد لكن كنت دايما بدور ع نظرة رضا ف عين بابا وماما انى انسانة طبيعية وعندى مواهبي مش لازم اشتغل او اعمل ماجستير عشان اكون ناجحة.. انا حد بيحب البيت بيحب الحياة الهادية بعيد عن الناس ولو اختلطت مش بيكون مع ناس كتير ومش طول الوقت.. كنت بحلم بحياة هادية محسش فيها انى محتاجة اثبت فيها حاجة لحد.. لكن طول الوقت كنت مضغوطة تحت فكرة انى لازم أعمل حاجة .. أنا بحب الرسم وبقيت رسامة محترفة ونزلت اخدت كورسات ديكور ورسم زيت وسوفت باستيل وفحم وكنت عايزة اكمل بس كنت بحس انهم شايفني انى بعمل اى حاجة وان دى مجرد مواهب مش حاجة مفيدة ف وصلت لمرحلة انى قعدت فترة مش برسم.. حاولت أفتح براند حلويات وهما شجعونى بس بصراحة انا الى تعبت كان مجهود كبير عليا كنت بعمل كل حاجة لوحدى ايوا اتعرفت والناس حبوا حاجتى بس الموضوع كان مرهق جدا .. حاولت أحفظ قران حاولت أعمل حاجات كتير بس مبكملش لانى من الاول مكانش عندى طريق واضح .. كل الى حوليا بيقولولى انى لازم انزل اشتغل عشان اشوف الدنيا والناس حتى مش فكرة احتياج مادي بس هو انزلى وخلاص .. انا لما جربت اشتغل كنت بنزل الصبح بعيط حاسة انى متعاقبة ليه اقعد طول اليوم برا البيت عشان اخد شوية فلوس ايه الهدف .. ايوا شوفت بنات تانية بتحب الشغل ومستمتعين بيه بس انا معرفتش.. ساعات بقول فيها ايه لو عيشت حياة هادية من غير م اكون مضطرة اثبت لحد حاجة و كفاية الى فات من عمري.. انا بحب البيت وجو البنت وانى اقعد اعمل حلويات وارسم واكتب واهتم بالزرع بتاعى واتعامل مع الناس في أضيق الحدود نفسي اعمل دا وانا مرتاحة من غير م يحسسونى انى غريبة ..