إيه الشيء اللي نفسك ترجع تقوله لنفسك القديمة؟

سامحيلي على كل دمعة على كل موقف حطيتك فيه و انا متأكدة اني بضرك سامحيلي على كل اهمال على كل وجع على كل يوم ضيعتو في محاولت ارضاء الآخرين و نسيتك و نسيت احتياجاتك على كل صرخة من الداخل استهنت بيها على كل حاجة عملتها غصبا عنك سامحيلي على الايام الي ضاعت وعلى كثير اشياء ....

انتي جميله مش محتاجه تتغيري متشكليش نفسك عشان حد خليكي ع طبيعتك اوعي تفقدي شغفك اوعي تثقي ف حد وتحبيه خليكي لوحدك مش لازم حب اعملي الحاجات اللي بتحبيها ومتتمنيش اللي انتي بقيتي عليه لانك طلعتي مش فرحانه ودايما حزينه خليكي واثقه من جبر ربنا متضعفيش

انت كنت دايما شاطر وشبلت مسئوليات اكتر من اللي عقلك يقدر يستوعبها ارتاح شويه عشان تعرف تكمل معافره واوعي تبطل تبقي شاطر ومصلحتك اهم من اي شخص مفيش حاجه اسمها صحاب! هتكتشف في اخر المطاف ان محدش هيبقي فاضي لحد

عاوزه اقولها انك مش لازم تعملي كل حاجه عشان الناس هما كده كده مش هيرضوا فأعملي اللي انتي عايزاه واللي هيرضي ربنا بس رأي الناس ارميه في الزباله هما كده كده هيتكلموا ، وحبي نفسك وتقبليها مش محتاجه تتغيري عشان حد انتي حلوه وجميله ذي ما انتي ، و الوحده شعور طبيعي وجميل مش مؤلم ذي ما انتي متخيله مش محتاجه تدخل في علاقات ملهاش لزمه عشان بس متحسيش بالوحده وتثبتي انك شخص كويس فعلا .. مش محتاجه تثبتي حاجه لحد ..

محتاجة اقول لنفسي حاجات كتير اوي عيشي سنك والعبي عادي انتي طفلة واعملي ذكريات حلوة مش لازم تهتمي بالكل على حسابك انتي مش مسؤولة انك تصلحي حياة كل الناس ولا تخبي حزنك وانت بتواسيهم عيطي عادي وانتي بتواسي مامتك وباباك عشان هيفضلوا طول عمرهم فاكرينك مش بتتوجعي والكل هيبقى كويس وبيضحك وانتي بتعيطي في اوضتك ومحدش هيهتم وماتهلكيش صحتك وانتي بتذاكري مش لازم تعملي انجازات عشان تلاقي حد يحبك اهلك مش مهتمين هما مش وحشين ومش بيكرهوكي هما بس معتمدين عليكي وسايبينك تواجهي كل حاجة لوحدك لانك قولتي انك قدها وحطي حدود مع صحابك عشان انتي مش صاحبتهم ماتفضليش تاخدي كل الخطوات واحضني عمو كتير عشان هيوحشك اوي وقربي من احمد ابنه هو طيب اوي عشان مالحقتش اقعد معاه غير وقت قليل ودلوقتي بنتكلم معاه في قبره وقضي وقت اطول مع تيتا عشان تسمعي حكاياتها عن جدو قبل ماتسيبك وتروحله هي كمان وماتتعلقيش بخالتوا عشان هي نسيت ان كنت بعتبرها ماما ومش بتكلمني وبنتها مش صاحبتك الوحيدة ولا اختك عشان هتتخطب وهي مخصماكي ونسيت كل الحاجات اللي قولنا هنعملها سوا وابعدي عن اخوها عشان هتفتكري كل الهزار والضحك والمشاوير وانتي بتعيطي عشان شوفتيه بالصدفة وماسلمش عليكي وخبى ولاده عشان مايشوفكيش ومتثقيش اخواتك ولا تشيلي مصايبهم هم الكبار مش انتي ومهما حصل ماتوقفيش صلاة ولا تفكري انك وحشة وصلاتك مش هتتقبل عشان انا بعاني اوي بسببك ومش عارفة اعوض اللي فاتني

اقول لتفسي خدي بالك و احذري مش اللي حوليكي بيحبك زي ما انتي بتحبي مش كل اللي قالك انه سامحك علي حاجه انتي اصلا مش قاصده تغلطي فيها انه سامحك فعلا دا مستني لما تقعي تحت ايده اقول لنفسي بلاش تحكي لحد اي حاجه عنك بلاش تبقي كتاب مفتوح بلاش تعرفي حد نقط ضعفك..... 💔

اعملي اي حاجة عشان نفسك طالما محتاجاها و عافري عشانها متسيبيش نفسك ولا تقتنعي بكلام انتي مش مقتنعه بيه متخليش حد يلعب فدماغك انتي شايفة الموقف كله و عارفة مين الغلطان و مين الصح اي حد يأذيكي و فيه طبع الاذي دا ابعدي عنه و اقطعي معاه مترجعيش تاني و تعملي فيها الطيبه و انتي بتتغفلي فيهم للمرة المليون متسكتيش عن حقك خليكي باردة الباردة هي المتحكمة في الموقف لما بتتعصبي انتي الضعيفة انتي عصبية جدا انا عارفة بس حتي لو جواكي نار و توتر و قلبك بيدق بسرعة اظهري ادامهم البرود اوعي تبيني ضعفك

كنت هقولها انا اسفه عشان انا كبرت ومخدتكيش للشخصيه اللي دايما حلمتي بيها كنت هقولها اسفه عشان خليتك تتوجعي كتير من الناس واسفه ان الاب ده هو اللي عندك مش اب تاني بيحبك بجد.. كنت هتاسف ليها واقولها بجد اني لسه بحاول رغم اني من كتر ما عكيت ف حياتي مش شايفالها دلوقتي ملامح بس مكمله علي امل يحصل جديد واوصل ليوم اقولك اني اخيرا بجد وصلت