اية اكتر حاجة ممكن تكونو خايفين منها حاليا ومستقبلا ولية ؟

احس حالي خايفة اني اروح اقابل ربي و انا ماعندي حسنات تكفيني ادخل للجنة او من عذاب القبر او معرفش اجاوب على الاسئلة او اتعذب في النار لانو كل المصائب و المخاوف الدنيوية ما تتسمى و لاشي قدام عذاب الاخرة و الوقوف بين يدي الله كم سنعيش 50/60/70/80 او في اي لحظة يبقى رح نروح رح نروح يبقى عدو الزاد للاخرة و متضيعوش وقتكم مع ناس مارح تفيدكم لا دنيا و لا اخرة و تزودو بالعلم فان حاجتنا للعلم اكثر من حاجتنا للطعام و سيبكم من العلاقات الغير شرعية و الكلام الفارغ ده

Distracting and lose my self مالحقش احجج ماما وبابا وانقلهم نقلة اعلى ماديا او مااعرفش اعمل كدا واثبت للكل اني وصلت مالحقش اتجوزها او اترفض لانها ماديا اغنى عيلة في بلدها وابقى مش قد وعودي معاها واشوفها مع حد تاني بعدين او حتى لو اتوافق عليا ماقدرش اعيشها في نفس المستوى ومش عايز احس اني اقل ابدا

انا تقريبا كل حاجة خفت منها حصلتلى والحمد لله ربنا اكيد له حكمة.. خايفةواقول انا خايفة من ايه تانى لانة بجد ملصمة نفسي😅😅 بس هقول اكتر حاجة مخوفانى وهى انى اموت لوحدى.. بعد وفاة بابا بقيت بخاف اسيب ماما عشان متحسش انها لوحدها وبقيت بحاول مقبلش باى ارتباط ممكن يخلينى بعيد عنها .. فنفس الوقت انا نفسي يكون عندى حد مسنودة عليه وولاد يشيلونى لمااموت ويدعولى .. الحياة دى غريبة اوى كان عندى احلام جميلة وردية كنت لسة امبارح ي دوب طفلة ولسة جوايا زى م هى .. عمري بقى ٣١ سنة معتش اى حاجة من الى بتمناها معشتش اى حاجة المفروض اعيشها فسنى.. ومفيش اى حاجة مرت عليا قبل كدا كانت زى م بحلم وحتى الاحلام مجرد انى اغمض عينى واتخيل بقى صعب ..الحياة بقت تقيلة اوى وأتقل م فيها الوحدة حتى لو كانت اختيار..

حاجة واحدة ايه دول كتير اووي 😂 اول حاجه في الحياة حاسة انى وصلت لمرحلة كدة من النضج مخلياني رافضة اى حاجة غلط و كل حاجة غلط .. حاسة ان مافيش مجال ولا فيه وقت تاني ينفع يضيع ف اختيار حاجة مش صح بنسبة ١٠٠٪ و اجي ع نفسي في حاجة و الحاجة دي تسود عيشتي تاني و على ايه بقا 🤷🏻‍♀️😂 ف مابقتش بختار اصلا حاجة فيها ١٪ حاجة غلط و ممكن ده يكون غلط فعلا و ان اه مافيش حاجه كاملة بس اللى عاش يحاسب ع المشاريب بتاعته و بتاعى غيره هيبقا فاهم قصدي ايه و انه خلاص مافيش طاقة تانيه بقا لحاجات او اشخاص اقعد اصلحها ف خايفة مالاقيش بقا الحاجة اللى بدور عليها دي مع اني مش عاوزة حاجات كاملة و الله بس عاوزاها تكون مناسبة ليا ( مش حاجات بتشقلب عشان تبقا مناسبة ليا 😂) تاني حاجة بخاف اني اكون فى الوقت ده ضيعت حاجات كان ممكن تمشي او تتظبط شوية تالت حاجه بخاف جداااا اكون من( الذين ضل سعيهم في الحياة الدنيا وهم يحسبون أنهم يحسنون صنعا) الموضوع ده مرعب اووي يجد 💔🥹 رابع حاجة بخاف اني اما اموت مايبقاليش سيرة طيبة و اتنسي كأني ماجتش الدنيا اصلا ماحدش حتى يدعي لى بالرحمة ولا يطلعولى صدقات مثلا ولا يفتكروني بكلمة طيبة 😢 و كمان بخاف كمان انى افضل تايهة كدة مش عارفه المفروض اعمل ايه عشان اكون احسن بحس ان الحياة دي اصلا واسعة عليا اوووي و انا بلأ فيها مش عارفه اجيب اولها من آخرها مش عارفه ابدأ بايه ازاي امتي اروح فين اجي منين كدة

خايفه موصلش لحلمي الحلم بالتفصيل في مخي دا شغفي الحاجه اللي بحبها ربنا زرع حبها في قلبي خايفه بعد كل دا اني ممكن ماخدهوش يكون مثلا ابتلاء من ربنا أو ربنا ميوفقنيش في (ادعولي كلكم أوصله و اكون ناجحه في )

اني افضل زي منا شخص غير ناضج لا املك اي شئ سواء ماديا او معناويا سطحي ، ساذج ، متهور ، عديم المسؤولية واني افضل اماطل وماحققش حاجة واني مايبقاش معايا فلوس ابني نفسي بيها اني مانجحش وافضل فاشل اني افضل بكره نفسي ومعانظيش بجنيه ثقة وتقدير للذات وغيرهم الكثير

خايفه من الارتباط خايفه اختار غلط وفي مواصفات و standars معينه حطاها في دماغي عايزاها تكون في شريك حياتي عشان هبقى مرتاحه معاه كده انا عندي 20 سنه عارفه اني صغيره من غير ما حد يقول وبجد مش مستعجله على الجواز والارتباط خالص بس بجد خايفه واوقات بحس اني هفضل لوحدي وكل ما اتكلم مع ماما واقولها اني مش عايزه اتجوز تقولى متخلنيش اموت وانا خايفه عليكي انا اصغر واحده في اخواتي واخواتي كلهم اتجوزو وبجد دماغي اوقات بتبقى مش راضيه تبطل تفكير في الموضوع دا انا بشتغل وبدرس عشان اشغل دماغي بس برضو ، الوحده وحشه بس اوقات ببقى مرتاحه فيها

١) خايفة مجبش المجموع اللي لازم أجيبو. خايفة أخذل اهلي وأفشل، لاني ساعتها هفقد الثقه في نفسي فعلا ٢) خايفة متجوزش الجوازة اللي في دماغي. مش عارفه فين هلاقي الشخص اللي انا رسماه في مخيلتي، هل هلاقيه أصلا؟ خايفه اعيش بقيت حياتي وأموت من غير م الاقي الحب الحقيقي. ٣) خايفه ملاقيش ذاتي، مقدرش أوصل للنسخة الحلوة مني، مشوفش جمال الحياة، خايفه ملاقيش شغفي، والحاجه اللي أحس اني عايشة عشانها، خايفه أفضل محبوسة جوا دماغي.

خايفه من بعد التخرج من الكليه خصوصا اني مش حابه تربية و مش شايفه نفشي ف تربية ولا مدرسه خالص بعني ف بفكر بعد نا اتخرج انا هعمل ايه و هبقي مدرسة بجد عايزة اعرف ممكن اشتغل ايه تاني غير مدرسه خصوصا ان لاسف بعد التنسيق الداخلي ف الكليه حطوني ف قسم عربي و عملت تحويل لتاريخ و اترفض ف لما اتخرج المفروض هبقي مدرسه عربي ف دي مش انا و مش عارفه ابقي كده رغم ان كل اللي حوليا بيقولولي اني بعرف اشرح لكن انا بشرحلهم و انا ف صاني جغرافيا عشان كنت بحب الجغرافيا و بحب شرح المدرس جدا جدا ف كنت بشرحها و انا مبسوطه و للعلم مدخلتش قسم جغرافيا عشان تنسيقه اخد اعلي مني بدرجه وبردو تحويلي ليه اترفض ف حسيت ان كل الطرق تؤدي الي روما ف دخلت تربية عام عربي و خلاص و للعلم بردو مقدرش احول كليه تانيه عشان عايزة فلوس اكبر من حياتي و مقدرش اطلب من اهلي اكتر من كده

في البداية انا ولد ١٦ سنة عندي مشاكل الدنيا والآخرة مع الاهل والصحاب والارتباط وكسرة القلب والجواز انا اكتر حاجه مخوفاني هيا الجواز انا دلوقتي ببقا ماشي في اي حتة بلاقي دة ودة ودة بيتكلم عن الجواز انا حاليا مرتبط ببنت هيا بتحبني وانا بحبها وحيات ورد ع عسل جيت كلمتها عن الجواز وكدا فا قلتلي انت دخلتك عجباني وفعلا انا كنت بدور ع البنت الي عايزة اي جد مش بتتردد مش خايفة من اي قلبها ميت في كل حاجة وانا بحب كدة الصراحة فا المهم قلتلي انا هديك رقم بابا وانت كلمو وشوفوا هيقولك اي قلتلها ماشي هيا قالت لأمها وانا عرفت اهلي وكدا فا اهلي وافقوا وقالو كلم اهلها ولو حصل نصيب نخطب وبعد ما تخلصو التعليم خالص تتجوزو ع الاقل تكونو كونتو نفسكو براحتكو وانا عجبني الكلام وعرفتها عشان تقول لامها ع الي اهلي قالو فا المهم انا كلمت ابوها خودو المفاجأة بقا قلي بص يبني انا عايز 50 جرام دهب وشقة اربع اوض وصالة ومطبخ وحمام كبار وتكون الدور التاني أو التالت عشان راحت بنتي انا وفقت بس بقا لما نيجي نتجوز اكيد الكلام هيتغير هيقولي 100 جرام أو 120 جرام دهب وانا معلش انا مش شغال تاجر مخدرات ولا حرامي عشان اجيب كل دة وانا وافقت عشان هكون مجهز نفسي وجايب دهبي ومخلص كل حاجة و لما جيت قلتلو انا عندي بيت ميلك وربنا يطول في عمر ابويا و هورثو من بعد ابويا و للعلم البيت اربع ادوار وكل دور اضتين وصالة ومطبخ وحمام ودلوقتي ابويا كان قايس البيت من اسبوع البيت ٦٦ متر عامل مليون سبعمائة وخمسين ألف مش وحش وللعلم المتر بـ 32 ألف مش وحش خالص قلي فعلا مش وحش قلتلو وهكتبو بإسم بنت كمان مرضي هوا فرح اوي قلتلو بس بشرط مش هنكتب قايمة وافق انا واحد مدي لبنتو كل ما املك من حقو ميكتبش قايمة المهم اتخطبنا سنة وعدت السنة ولا في مشاكل ولا في اي حاجة جه مرة واحدة كدا بيقولي انا عايز زيادة في الدهب 25 جرام كمان قلتلو لاء كدة كتير اوي انت كدة بتنتقم مش بتجوز بنتك قالي بقا معلش ومش عارف وبرطم شوية انا وافقت قلت يا عم فكك اهم حاجة تكمل عمرك مع الإنسانة الي انت حبتها عدت سنة وكانت كل حاجة حلوة المهم حصل مشكلة بيني وبينها وقلت لابوها لقيتو بيرن عليا وبيقولي تعالالي رديت قلتو انا مشغول والله في شغلي مش هعرف اجيبك دلوقتي اخلص واجيلك المهم قلي يلعن ابو الشغل لابو صحابو انت مزعل بنتي لي قلتلو يا عمي بنتك رنت عليا وانا في الشغل بتقولي هتلي شوكولاتة وانا في الشغل وانا قلتلها شغل السهوكة والمحن متعملوش الا لما اكون فاضي عشان اعملها الي هيا عايزاه قلي انت تيجي تاخد حجتك ودهبك وتبعد عن بنتي قلتلو لاء انا بعد كل دة اسيبها مش هسيبها وبنت مش هتقدر تبعد عني لقيتها ردت تقولي لاء هقدر قلتلها خلاص براحتك الدنيا مش هتقف عليكي يعني وقفلت في وشها كل دة اهلي لسة ميعرفوش حاجة دلوقتي انا اعمل اي بعد ما حب عمري سبتني ودمرتني وضحيت بكل حاجة عشانها تقوم هيا تعمل فيا كدة يا جماعة والله احنا الشباب مدمرين بسببكو خفو الحمل عننا الله لا يسمحكو ارحمونا انتو الأهالي عايزين نتجوز ونخلف ونعيش حياتنا لي تنتقمو مننا لي انتو كفرة حسبي الله ونعم الوكيل في كل أب وأم يظلمو شب في جوازتو (امين🤲)

في شتاء ١٨٤٤ الجميل قبل ما اتولد نزلت اكل اندومي في مسمط زرجينه في وسط ما باكل الاندومي قالتلي انت اتغيرت جامد انت اكيد بتخوني مع المكرونه بتاعه عمتك قولتلها انتي ازاي بتفكري فيا انا كده (انا فعلا خونتها مع مكرونه عمتي) مستحيل انا بحبك قالتلي مفيش منه لاقيت الاندومي اتحولت وحجمها بقي ضخم وبتجري ورايا وانا بجري ومرعوب طلعت البيت فا قاعد بحكي لابويا لاقيته فجأه طلع من بوقه اندومي كتير وبتجري ورايا روحت مديله واحده هوك طيرته من الشباك وطلعت اجري من الاندومي بس فجأه لاقيت البيت كله اتملي اندومي وعماله تكتر وانا بغرق وسطها مرعوب روحت مفعل تقنيه الشيف شيربيني شارينجان وفاتح بوقي وشافطها كلها ومن ساعتها وانا بخاف من المكرونه بتاعه عمتي

خايفه من لحظه المواجهه بيني وبين بابا خايفه من اللحظه اليهيرجع فيها ندمان ويقولنل نرجع حاجه زي ما كانت بس مش فاهمه ازاي ممكن يرجع بعد. كل الي عمله دا ويطلب نصلح حاجه انكسرت لما افكر في الموضوع اقول مستحيل اسامحه وأوقات تاني بحس اني مجرد ما اشوفه بس هنسي كل حاجه ..... وفي النهايه كل دي مجرد تخيلات لأن هو اكيد نساني

أنا خايف مني خايف اتغير وابقى نسخة اسوء من نفسي ولاسيما اني شايف نفسي بالفعل بتحول خايف اكون انسان غليظ وفظ مع ان عمري ما كنت بس بجد الفترة الأخيرة كل المؤشرات بقت بتقول كدا الآية بتقول و لو كنت فظاً غليظ القلب لإنفضوا من حولك وانا مش عاوز اكون وحيد وف نفس الوقت مش عارف ايه الي موصلني لكدا فربنا يهديني الانسان بقا وحش بجد

الناس اكتر حاجة بخاف منها كل ما العمر بيجري بيا كل ما بيكون صعب عليا اتعامل مع الناس الفكرة اني بحس الكدب والنفاق بشكل واضح بسهولة بفهم دا وانفر ومع الوقت بقي تقيل عليا حتى اني انزل الشارع اجيب حاجة لنفسي او للبيت حتى الكلام معاهم صعب بحس ان محدش فاهمني مهما اتكلمت

خايفه من الجواز ، عمتا انا 20 سنه الخوف اللي عندي من الجواز دا بسبب بابا لانه بخيل في مشاعره في فلوسه في كل حاجه بجد خايفه اتجوز وبعد الجواز اكتشف انه شبه بابا في كده وكمان خايفه يكون بصباص مفيش حاجة بتملى عينه من فتره كان في واحد مركز معايا وعمال يحاول يجر كلام معايا وانا بصده وبعدين اكتشفت انه خاطب اصلا ف بجد خايفه من النوع دا وخايفه عمتا ادخل علاقه او يكون في حد في حياتي وصحيح حد يقولى اكتب بوست ازاي من غير ما اختار من التوبيك عشان غيرت التلفون والاك دا جديد والابلكيشن اتحدث كتير عن زمان ومش فاهمه حاجة 😂❣️

اخاف أأذي حد مع ان اللي بيتكلم دا (انا) ممكن يكون اكتر حد مؤذي تشوفه في حياتك بس عشان انا مبحبش اوجع حد بس غصب عني بعمل دا اما بتعصب او كدا فاخاف في المستقبل دا بزيد اكتر...!! وقت ما بعمل كدا سعات بيبقى في بالي مش فارقة و مش مشكلتي و ممكن اهدا في وقتها و اصالح اللي قدامي و ممكن اهدا بعدها بحبة من صغري و انا بأذي اللي حواليا و بتنمر و عندي احساس ندم بس مقدرش اصلح دا غالبا محدش في حياتي سمعني بتكلم عن الموضوع دا بالطريقة دي و عندي احساس اني مش هتفهم صح