اي السبب اللي خلاكم تقطعوا علاقتكم مع شخص كان قريب من قلبك؟

Question

احكولنا قصصكم عن سبب البُعد و أثره النفسي عليكم و ازاي اتخطيتم الموضوع

Avocado_21982 🇪🇬 · Answer

عشان حرام 
مع انها كانت علاقة مستقرة وجميلة جدا ومبسوطين مع بعض وعايزين نكمل حياتنا سوى وحبنا كان بيزيد يوم بعد يوم لكن انا كنت متردد عشان عارف ان ده حرام بس اترددت اخد قرار وابعد لكن خدت القرار وعرفت الطرف الاخر وبعدنا بتفاهم وبكل حب واحترام ويارب يجمعنا ببعض لو خير لينا

Coffee_25462 🇪🇬 · Answer

عشان حسيت أني بخسر نفسي جيت على نفسي .
والموضوع متوقفش على كدا كنت بأذي نفسي فعليا حسيت اني بحاول فى حاجه لوحدي... 
فا طلعت فعلا منها بس طلعت خسرانه كتير 
حاسه أني أستنزفت كل حاجه عندي
ومعنديش حاجه تاني حتي أقدمها لنفسي

Biscuit_20744 🇪🇬 · Answer

كان عندي صاحبتي صداقتنا كانت جميلة اوي و كنا صحاب بقالنا 9 سنين بعد كده جت فترة هي اتعرفت فيها على ناس تانين و بقت تتعامل معايا بطريقة وحشة ، و بعد ما كنا بنتكلم كل يوم قعدنا اسبوعين مش بنتكلم و ساعتها كنت تعبانة جدًا و هي مسألتش فقطعت علاقتي بيها و اكتشفت انها شايلة كمية حقد ليا ، انا مش فاهمه سببها ايه ، بعدين جينا نتعاتب طلعت كل اسراري ، انا مكنتش فاهمة كل ده ليه و ايه اللي وصلنا لكده ، انا كنت بعاملها كويس جدا كإنها اختي ، بس الحمدلله ربنا اراد انه ببعدنا عن بعض و حاليا بقول الحمدلله انه ربنا بعدنا عن بعض لانه عوضني بخير كتير جدا من ساعة لما علاقتنا انتهت ، ربنا يبدلها خيرا مني و يوفقها في حياتها 🤍

Coffee_25614 🇪🇬 · Answer

مكانش بينا توافق ، كنت مكملة بس بسبب اني ماليش اي صحاب غيرها، وكان من الصعب اني اكون صداقة جديدة لاني في الطبيعي مش اجتماعية ..كانت دائما بتحب تحكي أي موقف حصل بينا لباقي صحابها بينما أنا كنت شايفه أن دي اسرار ، كان عادي عندها تتكلم مع الولاد ف الفصل حتي لو بدون داعي ، وانا كنت رافضة الفكره تماما ، رجعت مروة البيت لاقيتها واقفه بتتكلم مع أخويا بحجة بتسأله عني ، وهي عارفه اني خارجه واخويا كان بيكلمها بحسن نية، في الآخر واجهتها بالموضوع ،قولتلها أنتِ في طريق وانا في طريق ، اتعصبت في الاول وبعدين لما لاقيتها من حياتي عرفت انها ولا كان هاممها ، والصراحه اكتشفت انها هي كمان مش مهمة بالنسبالي وماخدتش وقت عبال ما اتخطيتها ولاقيت ألف غيرها ملتزمين وشجعوني ع الإلتزام ولحد الآن هما أفضل صحبة بجد🤎 
بحكي القصة دي عموما وانا بقول لنفسي

" الـ راح ، بكرة ييجي غيره ، والدنيا مش بتقف علي حد "
بس كدا ودي قصتي 🤎✨

Mango_12825 🇪🇬 · Answer

حب التملك والغيرة الزايه عارفه ان كلكم هتهجمو عليا وتقولو ان دا حب بس مش لدرجه انها تبعدني عن صحابي مش لدرجه لو مردتش عليها في نفس الثانيه علشان في الحمام او كدا تزعل مس لدرجه لو حد سألني عن الساعه مثلا تقولي ليه تردي عليها مبقتش عارفه اتعامل مع الناس عايزة تبعدني عن شلتي اللي مع بعض من اولي ابتدائى كلمتها كتير في الحوار واتهانقنا وقالت دي شخصيتي وانتِ بتغيري فيا وبتاع بعديها اتفاهمنا واتفقنا انها هتخفف بس والله ذاتت وانا بقيت حاسه اتي مقيده المهم طرقتي  اتغيرت ودا مش بمزاجي ما هو مطلعوش الشخص عن شعورو وترجعو تقولو ليه اتغير المهم سألتني في ايه وحكتلها كل اللي في قلبي المرة دي سألتني وايه الحل قولتلعا احنا مختلفين تماما انا بضايقك اني بحب الجروب والشله وبحاول اغيرك وانتِ بتضايقيني علشان عكسي سألتني يعني عايزة تبعدي بصراحه قولت اه وعمونا كتبتها بصعوبه قالتلي ربنا يوجع قلبك زي ما وجعتي قلبي ودعت دعواات كتيير شوفتها ومردتش قولتهوا حاولي تسامحي عموما علاقتنا حاليا اخسن بنتكلم كا زمايل ......

Potato_25946 🇪🇬 · Answer

مكنتش بتكلم عن مشاكلي معاها من كتر ما كنت حاسه انها فيها اللي مكفيها ومينفعش تشيل هم زياده وان اللي حوليها المفروض يريحوها لحد ما انا اللي تعبت لما بقي بيبان عليا تعبت أو زعل ويطول بقيت بتلام ومبقتش عارفه ابقي كويسه معاها أو ارجع زي الاول بقيت تعبانه وهي مش مقدره وفى الاخر سيبتها علشان مش هعرف ابقي معاها زي الاول بس وبقيت وحشه وغداره مش قادره احدد ده علم جوايا ازاي بس انا فى العموم مش فى احسن حالاتي من فتره طويله بقيت بخاف اتعرف علي ناس تاني لاني مبقاش عندي طاقه لحد

Cookies_25972 🇪🇬 · Answer

الخوف 
دايما طول عمري شخصية بتخاف من الي جي أو من عواقب أفعالها وده لاني تلقائية فشخ ومبحسبش ودايما بشوف اني الأحسن محسبش
خوفي من كل حاجة اتحول ضدي خوفي من اني اخسره خلاني اخسر كل حاجة من عير م اخد بالي أن ده حصل

Sugar_26020 🇪🇬 · Answer

الشك كان شخص شكاك اوي وكان دايما يطلعني غلطانة في كل حاجة الفكره انه كان بيخليني اقتنع فعلا اني غلطانة واصدق ده وكانت طاقتي بتستنفز وكنت بتإذي نفسيا ف مشيت بس لحد دلوقتي مش عارفه اعمل موف اون

Marshmallow_26006 🇪🇬 · Answer

كان ليا صاحبه وكنا نعرف بعض من اولى اعدادى ولكن صداقتنا بدأت بجد من ثانيه ثانوي واحنا كنا حاجه مش طبيعيه هدايا بينا وخروجات كلام سبحان الله كانت صداقة مفيش فيها حاجه وحشه ابدا لحد ما دخلنا الجامعه وكل واحده فينا كليه مختلفة بس طبعا مع بعض في سكن واحد وبقينا اقرب اكتر كان بينا لحظات متتوصفش من جمالها بجد الاكل والخروجات والضحك حتى لما واحده فينا كان بيكون معاها مناسبه او حاجه مهمه تبع كليتها لازم التانيه تحضر كان حرفيا ملناش غير بعض لحد ما بدأ التغيير(فى اختلاف فى شخصيتنا هو انى انا شخص هادي جدا مع اى حد غريب ولكن بمجرد ما اتعرف عليه بتعامل معاه بكل عفوية وضحك على عكس صاحبتي اللى كانت اجتماعيه وجريئه شويه )التغيير بدأ يظهر لما بدأ يكون عندي اصحاب فى الكليه وعايزة انزل معاهم او حتى لو صورة نزلت في استورى بلاقيها تتضايق وتزعل وحسيت انها مش عايزة حد يكون معايا غيرها وانا بصراحه مفهمتش دا ابدا وقتها وكنت بتعامل عادى لحد ما وصلنا لسنه التخرج وقررت وقتها انى اكون معاها في السكن وبعد ما سافرت مفيش كام اسبوع وهي سابت السكن وراحت سكن تانى فانا طبعا زعلت والوقت دا نفسيا كنت تعبانه جداا للدرجه انى ممكن اكون بضحك مع اصحابي ولوفضلت لوحدي احس انى مخنوقه وافضل اعيط بشكل مش طبيعي ودا كان بيأثر عليا جداا لحد ما اتعرفت على واحده صاحبتي فى السكن عرفت ازاى بجد تطلعني من الحالة النفسية اللى كنت فيها وكانت بتهتم بيا وكل الحاجات اللطيفة لحد ما ظهرت غيره صاحبتي الاولى تانى لحده انها كانت بتكره صاحبتي اللى كنت معاها وكانت بتبعتلى رسايل وتدعى عليها لما كانت تعبانه وقتها كرهت صاحبتي بجد بشكل مش طبيعي وتقريبا متكلمتش معاها تانى لحد ما اكتشفت ان كمان صاحبتي التانيه بتستغلنى وتاخد منى فلوس ومبقتش فاهمه هى عايزة لحد ما خلص اول ترم في السنه وسبت السكن خالص وكهرت يعنى اى صداقة وفضلت فترة الاجازة مش بكلم حد منهم ابدا وقررت انى هفضل فى البيت وكفايه كدا لحد ما تعبت وكنت هعمل عمليه خطيرة وحالتى النفسية الحمدلله معرفش ازاى بس رجعت اصلى واقرا قرآن من تانى وكانت نفسيتى مليون مهتمتش لوجودهم اصلا والحمدلله بعد اسبوعين اكتشفت ان التشخيص غلط والحمدلله وطول الفترة دى محدش منهم سأل وانا مهتمتش انى اسال عليهم كفايه علاقات مؤذية فى حياتى بجد وسبحان الله فهمت وقتها ان سبب وجود صاحبتي التانيه علشان اسيب الاولى وافهم انها مش صاحبتي بجد ومن وبعد وقت فكرت انى اكون فى سكن مش مع اى حد منهم واعيش اخر ترم ليا فى الجامعه مع اصحابي وهما ميستهلوش كل الحزن اللى انا فيه وبعد كدا لو اقولكم عن الصحبه اللى ربنا رزقنى بيها فى السكن الجديد حاجه متتوصفش فضلت معاهم تقريبا شهرين بس كانوا اجمل شهرين فى دراستي الجامعية كلها وهونوا عليا فترة الحزن اللى مريت بيها وزى ما كنت متوقعه محدش منهم سال لحد اللحظه دى غير بس لو فى حاجه مهمه او طارئة دا بالنسبة لصاحبتي الاولى بحكم اننا من نفس المدينه اما التانيه معرفش عنها حاجه ولما انا بعدت اكتشفت مين الصحاب الحقيقي بجد واكتشفت انهم بيكونوا معايا وقت ما هما عايزين بس الحمدلله بجد مر لحد دلوقتى سنتين من تخرجي وانا مش بتواصل معاهم ولا اتصل واحكي واهتم زى الاول لانهم ببساطة مش فارقين معايا .

Ice Cream_20764 🇪🇬 · Answer

كنا شله اربع بنات علاقتنا م مجرد صحاب كنا اكتر من اخوات يومنا مكانش بيعدي غير لما نتكلم او حتي نبقي سوا ف الدروس المهم ان كان في واحده مننا كانت غيرنا ف بعض المباديء وبتتأثر باللي حواليها بطريقه فظيعه انا وهي كان دايمًا بيننا مشاكل سواء بجد او بهزار بس جينا ف يوم اتخانقنا خناقه كبيره اوي قدام بنات فصلنا فقعدنا اربع خمس شهور تقريبًا مبنتكلمش انا وهي لكن باقي الشله بنكلمهم عادي وساعات بنكون قاعدين كلنا سوا بس برضو انا وهي متجاهلين بعض، بصراحه الخناقه دي اثرت عليا جامد لأني كنت مصدقت خلاص بقي عندي شله وصحاب بحبهم وبيحبوني بجد وبعتبرهم اخواتي البنات اللي م عندي ومكنتش متخيله حياتي من غير واحده فيهم لأن كل واحده منهم ليها غلاوه خاصه عندي مع اني مؤمنه جدًا ان كل الناس مجرد فتره ف حياتنا، المهم اننا رجعنا نتكلم تاني بس طبعًا بعد الخناقه دي حبها وغلاوتها عندي قلو وفي حاجات كنت دايمًا بعديها مبقيتش بعديها او بمعنى أصح مبقيتش بحبها لدرجه ان انا اعديلها كل حاجه حتي لو هي اللي غلطانه وكنت شايفه انها مبقيتش تستاهل ان انا اجي علي نفسي تاني عشانها المهم بقي هي جات مره واحده كدا بقيت متغيره اوي معانا و مبقيتش هي صاحبتنا اللي كنا عارفينها من سنتين اللي بترد علينا علطول وتضحك معانا حتي لو في ايه معاها وبقيت تغير كل المدرسين اللي بناخد عندهم سوا مع انها مكانتش تقدر تروح حصه من غيرنا ف استغربنا انها عملت كدا مره واحده وكانت في واحده صاحبتنا قريبه منها اوي وكانت دايمًا بتحكيلها اي حاجه معاها دونًا عن الباقي يعني ف اتكلمت معاها وسألتها ليه بتعملي كدا ف طبعًا قالت الحِجه اللي كانت دايمًا بتقولها ان في مشاكل عندهم فالبيت واحنا عشان كنا عارفين ان فعلًا هم دايمًا عندهم مشاكل ف قدرنا دا وحاولنا نهون عليها علي قد ما قدرنا، لما بدأت المدارس بقي انا وهي كنا فنفس المدرسه والفصل من غير بقينا يعني المهم اني اكتشفت انها قربت اكتر من شله المدرسه وبقيت بتروح معاهم هم الدروس وطبعًا عشان بقيت بتمشي معاهم ف اتطبعت بطباعهم اللي غيرنا خالص وكنت بلاقيها بتهزر وتضحك معاهم لكن تيجي عندنا لا بقي هي عندها مشاكل وكل الدنيا جايه عليها ف تنكد علينا وتروح تفك معاهم وطبعًا احنا مبقيناش مستحملين علاقتنا بيها عشان حقيقي كانت مرهقه نفسيًا كانت دايمًا تلوم علينا حتي لو م غلط كانت بتحسسنا قد ايه احنا وحشين واحنا معملناش حاجه ف خدنا القرار اننا هنبعد عنها والقرار مكانش سهل علينا نهائي عشان مكناش عايزين نبقي إحنا والدنيا واهلها عليها بس بكل بساطه خرجناها من الجروب بتاعنا ومن حياتنا كلها، وطبعًا يعني متخطناهاش بسهوله وبالذات انا عشان كنت بشوفها كل يوم فالمدرسه وهي بتهزر مع صحابها نفس الهزار اللي كانت بتهزرو معانا وبتحكيلهم الحاجات اللي احنا كنا عايشينها معاها وكان بيجيلي احساس إللي هو ليه ليه وصلنا لدا ليه ف يوم وليله رجعنا اغراب عن بعض لدرجه اننا مبنسلمش علي بعض حتي بس اهو دلوقتي وبعد سنه ويوم بالظبط من البعد بقول الحمدلله ان ربنا بعدنا عنها وان دايرتنا صغرت ونضفت م عشان هي وحشه لا هي فيها حاجه حلوه بس م حاسه بيها لكن عشان هي م شبهنا، بسكدا ربنا يهديها ويصلح حالها واحنا يفلفل *عشان عارفه انك هتقرأيه* ف ربنا يخلينا لبعض وميحرمناش من بعض ابدًا ونفضل دايمًا سند وفضهر بعض☝🏻