تجربه كسرتك بس فهمت انك كنت محتاجها عشان متبقاش نفس الشخص مره تانيه

كنت ف اول سنة كلية وكنت شاطر ف ثانوي وطلعت الاول ع مدرستي وجبت مجموع عالي ودخلت الملية الي نفسي فيها لما ببص ع نفسي وقتها ادركت اني قد ايه اتغريت والكبر اخد مكان جوايا مع اني عمري ما تعاليت ع حد بس حاجه ف قلبي كانت مخلياني حاسس اني كويس واحسن من ناس كتير لما جيت دخلت سمر ف اول سنة ودي اول مرة تحصل ف حياتي انا انهرت بمعنى كلمة انهرت لقيت ان البنيان الصلب الي بنيته ف مخيلتي كله اتهد و وقع فوق دماغي ودخلت ف أصعب مرحلة عدت عليا ف حياتي من اكتئاب و نوبات هلع و صاحب الموضوع آلام عضوية وجاتلي أعراض زبحة صدرية وانا كنت وقتها لسه عيل مكملتش ١٩ سنة لما عديت الفترة دي حسيت ان شوكتي اتكسرت و فوقت لنفسي بصراحه لأني كنت ماشي ف سكة غلط طريق مش طريقي وعرفت ان ربنا أراد بيا كدا خير ليا وايقنت اني فعلا كنت محتاج شوكتي تتكسر ولله الحمد والمنة كانت فترة عصيبة لكن حسنت ف السنتين الي بعدها وجبت جيد جدا وامتياز بفضل وكرم ربنا قبل اى شئ

الثقه اكبر حاجه ممكن حد يمنحها لحد، ولو منحتها للشخص الغلط بتفضل طول عمرك تفكر الف مره قبل ما حتي تتوقع الخير من، وعلي قد ما الشخص الي وثقت فيه دا يكسرك علي قد ما بتفضل مش عارف تثق في حد من بعده، الكسرحه الحيقيقيه مش في الشخص الي كسرك لانه بيمشي، الكسره في بصتك لنفسك وعتابك ليها انو ازاي انتي كنتي غبيه للدرجه دي، ازاي يضحك عليكي وبمنتهي السهوله، ازاي يوم ما تختاري تدي مشاعرك لحد تختاري حد بالغدر دا، الكسره في لما تيجي تتعامل مع حد بعد كدا وتلاقي نفسك هترتاح في المعامله تقوم عامل يوتيرن وتحاول تظهرله انك قاسي فتتحول من غير ما تحس لحد ناشف وبيجرح الي حوليه كتير اوي ومش عارف تتحكم في دا علشان ببساطه بتحمي نفسك

لما ملقتش تقدير لما لقيت كلام يوجعني ولما خسرت كرامتي بدل المره الف لما اتكسرت كتير واتزليت لحد ميستهلش كنت كل مره يسبني ويرجع ع مزاجو المرادي بس فوقت واقتنعت انه م خير ليا مبقتش استراحه محارب المحارب ساب الحرب تولع ب الي فيها وواقف يتفرج عشان اقتنع لا دي حربو ولا دا مكانو

لما اتخدعت ف كل صحابي مرة واحدة حرفيا كلهم اللي هو يعني اي ٢٥ سنة وكل صحابي مرة واحدة كدا كانت صعبة اوي ابقي لوحدي ف زعلي وفرحي ولحد دلوقتي مفيش صحاب بس عرفت اني كنت محتاجة دا عشان اقف لوحدي وانجح ومبقاش مستنية ان حد يقولي برافو

انا مثلا كنت بحب بنت فالجامعه ، البنت ده حبيتها كدا ، بيسموه حب حقيقي انك تحب شخص ومش عارف حبته ليه ومفيش سبب واضح لحبك ليه زي شكله حلو او شخصيته حلوه او لبسه ، لا مكنتش بفكر اني الاقي الحاجات ده فيها ، كان نفسي احميها اسعدها ونكون سوا ، بس حصل موقف وحش جدا ، كنت بصور الكلام بتاع الدكتور من عالسبوره ، ف هي جات فالصوره بالغلط ، حرفيا مكنش موجود فالصوره غير الجاكت بتاعها حتى الطرحه بتاعتهت مكانتش باينه عشان كانت سانده عالبينج وقتها ، حد قالها اني بصورها ، راحت للامن ، وده الصدمه ، كنت فاكر ان من نظراتي ليها المتكرره ومحاوله اني اكلمها واجر معاها كلام فالسكشن هتعرفها اني معجب بيها ، بس لما راحت للامن قالت ف حقي كلام وحش ، ثبت التهمه بدل ما تدافع وتقول اني مش هعمل كدا ، قالت اني مالاول اصلا وانا بتعرضلها وعايز اكلمها وهي بتصدني ... بس اتغيرت ووعيت لنفسي وعملت تغيير مدروس ف حياتي مش مجرد هنزل جيم عشان اطلع ماللي حصل دا وفتره وابطل ، لا كان تغيير ، بس الصدمه انها حتى مشافتش التغيير دا ، بس بالنسبالي مكنش صدمه ،لاني كنت بعمل التغيير دا لنفسي