اهلك عملوا معاك ايه مش هتعمله مع عيالك؟

Question

شارك تجربتك مع اهلك و ايه الحاجات اللى متحبش اطفالك يعيشوها زي ما انت عشتها

Carrot_62530 🇪🇬 · Answer

الخوف اسوأ حاجه ممكن تزرعها في ولادك بسبب التربيه الغلط الخوف هيفضل معشش في عقلهم ووجدانهم لحد مايكبروا والافه اللي ممكن تقتل اي ابداع فيهم أو حتي انجاز ممكن يحققوه عشان كدا مهم جدا العيال بعد سن معينه ابدا ميحسوش بالخوف لكن ممكن استبدله بشعور إيجابي زي الاحساس بالمسئوليه ومهم اوي يتربوا لما يكون عندهم درجه كافيه من الوعي أن ليهم كل الحريه في اختياراتهم وانهم لوحدهم هيشيلوا مسئوليه الاختيارات دي وافضل ناصح و داعم ليهم مهما حصل

Cherry_55189 🇪🇬 · Answer

لو هتكلموني عن اهلي اللي هما بابا وماما ف هقولكو حقيقي معرفش مفيش اي مشاعر اللي هو مش الحب اللي متقدريش تستغني عنهم .لا عادي يعني مش فارقه بس عارفين احساس لما تكون مش قادر تنسى ضرب امك ليك ولا اهانتها عشان حاجات تافهه ولا عقابها اللي ممكن يوصل بيها اني اقعد شهر من غير دروس يااما ادفعهم من معايا حتى لو انا مش معايا عشان مثلا نزلت اجيب حاجه من غير مااقولها ولا كلامها دايما لما اكلمها واحاول اخليها تحس بيا وتقولي لو مش عاجبك روحي لمرات ابوكي فأكيد مش هخلي بنتي طول ماهي عائشه تفكر هي عملت ايه طول اليوم خوفا من أن هي تروح على عقاب ولا كلام ولا ضرب ولا بابا اللي بحس دائما أنه بيحبني بس بالكلام بس يعني هو شاطر اوي في أنه يثبتلي أنه بيحبني ومعندوش غيري في حبه كلام لكن مفيش مره اتعب أو اتكسر وجيه معايا المستشفى من الاول غير بعد ايه وفي نفس الوقت انا حاسه فعلا أنه بيحبني  عشان انا بنته بس هو عامه مش بيحب خلفه البنات بس عارفين ؟ربنا بيعوض انا عندي اخويا وعمي بالدنيا كلها هما دول اللي فعلا اقدر اسميهم بيخافوا عليا وعلى زعلي ودايما محسسني ملكه والحمد لله في النهاية

Blueberry_64034 🇪🇬 · Answer

غالبا كل حاجة 
اولا مش همارس عليهم صمت عقابي هاتكلم معاهم و افهم منهم ليه غلطوا و هافهمهم ان الغلط ده اضراره ايه مش هاعاقبهم و خلاص 
ثانيا مش هاقارنهم ببعض و بغيرهم و اخليهم كارهين حياتهم و دايما عاوزين يشوف منى نظرة رضا هافضل على طول راضية عنهم و بحبهم عشان هما ولادي مش عشان هما اجمد ناس عالمجرة 
ثالثا مش هاخليهم يخبوا عني حاجة و مش هذلهم باللى غلطوا فيه اذا كان انا بتعلم و بغلط 
رابعا مش هقولهم احمدوا ربنا اني بعمل معاكوا كذا انا اهلى ماكانوش بيعملوا معايا كذا ده و ابقا شايفة اني بمن عليهم بحاجات طبيعي اعملها 
خامسا هاعلمهم اني امهم مش عبده عندهم و ان العادي اني ابقا مدفونة بالحياة عشانهم لا ليا حياتي زيهم عشان ماجيس فى يوم الومهم على اى حاجة تخص اختياري لنفسي 
سادساً مش هعرفهم مشاكلى مع باباهم و افضل منكدة على كل البيت 
 اعتقد كفاية كدة عشان فكرة الجواز اساسا مش انسب حاجة لشخصية كارهة البني ادمين زيي و حاسة انها كبرت بشكل مش الاصح إطلاقا بس قدر و لطف  😂

Pineapple_64792 🇪🇬 · Answer

هسيبلهم مساحتهم الشخصيه ويكون ليهم خصوصيه ورأي في حياتهم عالاقل زي الدراسه والشغل هيكون في حريه اكتر من غير تحكم مش هحسسهم دايما انهم وحشين او قليلين بالعكس هسمعهم دايما وهحبهم قد بعض من غير م افرق بينهم مفيش فرق بين ولد وبنت كل واحد مسؤول عن نفسه

Pear_65018 🇪🇬 · Answer

الحمد لله اهلي ما قصرو بس الشي الممكن اني اضيفه لعيالي اني اكون مايل للشريعة و القرأن في التربية .
بعلمهم ركوب الخيل .
الرماية.
السباحة.
اثبت فيهم انو لو حسو انهم ضايعين يمشو المسجد .
بنتي بعلمها الطاعة . 
الستر .
الحياء .
و اول شي و قبل اي شي الصلاااااة الصلاة اهم شي .
كلنا يا جماعة محتاجين نتقرب من الله .
احنا ضايعين بسبب اهمالنا و عدم تقربنا لله .
مركزين مع الدنيا جامد ناسيين الحاجه الاهم من دا كلو .
بنعمل في الغلط بسبب بعدنا .
فلازم لازم عشان نضمن لجيلنا الجاي العيشه و البيئة المناسبة اننا نعلمهم التقرب لله .

Banana_65004 🇪🇬 · Answer

هبقى سند ليهم مهما غلطوا ومهما عملوا مش هخليهم يحسوا بالخوف انهم يجوا يحكوا ليا انهم عملوا حاجة غلط 
مش هتريق على اختياراتهم في لبسهم أو في طريقتهم أو في اختيار حاجة بيحبوها 
مش هجبرهم يروحوا أماكن هما مش حابين يروحوها ومش هجبرهم يتعاملوا مع ناس بتأذيهم حتى لو دول ناس كبيرة ومتنفعش 
هشبعهم حب والمع مميزاتهم قبل عيوبهم

Mango_58735 🇪🇬 · Answer

هخالي عيالي يثقوا في نفسهم وعمري ما اقلل منهم قدام حد ولا ااذيهم نفسيا عمري ما أميز بين عيالي عمري ما اقارنهم بحد عمري ما احسسهم وبذات في سن صغير ان في علاقه .. بتحصل بيني وبين وباباهم واذيهم نفسيا بسبب الايحاءات الي ممكن يشوفوها هربيهم علي الحب وهبين ليهم حبي قدام الكل مش هحسس عيالي باحراج بسبب قسوتي عليهم قدام الناس عشان ميطلعوش زي امهم بتتعصب كتير وخلقها ضيق زياده ربنا يقدرني واحميهم من كل الي حصلي

Biscuit_50330 🇮🇹 · Answer

إنهم مش قادرين يفهموني، مش عارفين، وبيفضلوا يقولوا إنهم حاسين بينا، وإنهم عاشوا اللي إحنا عايشينه، بس لأ، إنتو ما عشـتوش اللي إحنا بنمر بيه، زمنكم كان أرحم بكتير من الزمن اللي إحنا فيه، على الأقل كنتوا بتتكلموا، كان في لغة حوار، دلوقتي مفيش حوار أصلاً، أنا لما أكون أم، هعلم أولادي إنهم ما يخافوش يتكلموا، ما يخافوش مني، بالعكس، هكون صاحبتهم، وهشاركهم كل حاجة الوحش قبل الحلو، هكون معاهم، وهشاركهم زعلهم وفرحتهم، وهشجعهم يكونوا أفضل نسخة من نفسهم، هفهمهم قبل ما يغلطوا، وهشرح لهم عواقب كل حاجة، وهخليهم ييجوا يحكولي من غير ما أقولهم “احكوا”، ولو هما مش هيقولوا، أنا هخليهم يحسوا بالأمان الكافي علشان يقولوا، وهعرفهم إني في يوم من الأيام كنت مكانهم، وحسيت بكل اللي هما بيحسوا بيه، وعدّيت بنفس الطريق، هفهمهم إن الحياة عاملة زي لعبة، لازم نكسب كل مستوى علشان نوصل للجائزة الكبرى: الجنة، وهعرفهم إن الغلط هو الغلط، مفيش فرق بين ولد وبنت، لأن الغلط في الآخر واحد، وإن مفيش فرق في القيمة، كل واحد فينا بيكمل التاني في حاجات، في حاجات إحنا نقدر نعملها وهم ما يقدروش، وفي حاجات هما يقدرو عليها وإحنا لأ، وعلشان كده ربنا خلق الولد والبنت علشان يكملوا بعض، مش يتفوق واحد على التاني

Mango_66883 🇪🇬 · Answer

اهلي مش بيسمعوني ولا بيتكلمو معايا طول ال٣٠ سنه اللي عايشهم ف لو ربنا كرمني واتجوزت وخلفت هصاحب عيالي فعلا وهسمعهم ف كل حاجه وهبقا ليهم اقرب حد وميخفوش مني أنهم يحكولي اي حاجه وياخدو راي بجد

Mango_51652 🇪🇬 · Answer

الحب المشروط 
اتربيت دايما انه هتحب لو كنت شاطره الناس هتحبني لو  سمعت الكلام اهلي هيوافقوا بيا وسطهم لو بقيت زي ما هما عاوزين وبقيت دايما وحده عاوزه كل حاجه مظبوطه 100% اي تقصير بيحسسني اني مش مرغوب فيا 
عمري ما هعود اولادي ان هحبهم وقت ما يكونوا بيسمعوا الكلام وبس هعرفهم اني هفضل احبهم حتي لو ماعملوش حلو

Pineapple_66533 🇪🇬 · Answer

ربوني على الأدب والاحترام وتقدير واحترام الكبير واني مجادلش حد اكبر مني سابولي الحبل زياده عن اللازم وهملت نفسي ف الدراسه لدرجة مكملتش جامعه وبأمر الله هربي ابني على الأدب والاحترام وتقدير الأكبر سنا وبأمر الله يتعلم احسن علام واشوفه شخص مشرف ومؤثر ف حياته

Nutella_66996 🇪🇬 · Answer

اللي اتعمل معايا مش هعمله مع عيالي اني مش هضربهم هعقبهم مش هحرمهم من حاجة بس مش هخليهم يشترو علي الفاضي و المليان هصحبهم و نحكي سوا عشان ميخبوش عليا حاجة مش هجبرهم علي حاجة بس هنتناقش علي حاجات الصح و اللي تنفع و الحاجات الغلط اللي متنفعش هدخلهم النادي يتعملمو رياضات كتير هنمي مهاراتهم هخليهم يثقوا في قراراتهم و يبقوا عارفين هم عايزين ايه من غير توتر

Nutella_67175 🇪🇬 · Answer

مش دايما الاهل صح عادي هما بشر مش خارقين وارد نظرتة للموضوع تكون غلط لازم يتقبلو النقاش وان اي إنسان مهما كبر بيفضل يتعلم جايز زمنا غير زمنهم فده علمنا حاجات هما ميعرفوهاش فيوم ما هجيب عيال هتناقش معاهم واقنعهم مش هقولهم انا صح وخلاص 😊

Ice Cream_66949 🇪🇬 · Answer

حلو السؤال دا جداً ودا ال دايما بكلم نفسي فيه اني بإذن الله لو ربنا أراد وارتبطت وتزوجت اول حاجة هشوف هما عايزين يبقوا ايه اي مهاره عندهم هساعدهم ينموها وتكون مهاره ذات فائدة عليهم معنوياً ومادياً بعني مثلاً انا هويت إقتناء العمله القديمة زي اهلي ولكن مش بحب ابيع واشتري فيها بحسها حرام عشان مفيهاش تعب ولا إرهاق ولا مجهود مفيش حاجه إسمها محاسبكش ولا اسئلك وديت فلوسك فين لازم اتابع لو من بعيد وانصحهم يعملوا بيها إيه معلمش فرق بيني وبينهم زي مثلاً كنت اجي اعمل اي مصلحة بجانب شغل والدي ف مكانه يقولي لاء لما يبقى ملكك ومن فلوسك اعمل ال انت عايزه لو لقتهم عايزين ينفصلوا عني ف كيان لوحدهم اشجعهم واخد بايديهم مش افرض لهم عوائق وحواجز تعجزهم التعليم انا عكس اخواتي كلهم تعليم عالي إلا انا رغم اني كنت اشطرهم لكني دمجت بيني شغلي وبين تعليمي وكفه التجاره ال كسبت عشان كنت بحبها جداً الكلام بالتفاهم مش بالغصب ولا الامر الا في حالات معينة لو خارج نطاق المألوف والمعتاد اسمعهم جداً مديش لحد الافضلية عليهم طالما مدخلوش دائره الغلط اسمعهم اسمعهم اسمعهم اسمعهم اسبهم يجربوا لو جربوا وفشلوا مقولش شفت وقلت لك بدون نقاش واني افهمهم مش أقطمهم واحسسهم اني دي نهاية الدنيا وإن خلاص جربت فشلت يبقى خلاص مكبرش فيهم إحساس الذنب عشان دا هيخليهم يحسوا بالذنب تجاه اتفه الامور ودا غلط جداً يعود عليهم بالضرر ف حياتهم عموماً ودي ملهاش علاقة بالثقه بالنفس لكن الإنسان الحساس زيادة بيتعب ويجي ع نفسه كتير ف كل حاجة

Sugar_49832 🇪🇬 · Answer

كل حاجة عملوها معايا مش عايزة اعيدها مع ولادى فى يوم وبدعى ربنا انه يقدرنى على دة.. لان الانسان ابن بيئته.. وانا اتربيت فى بيئة لا تفقه شىء عن الاحتياج المعنوى والنفسى 
*ديما عندى نية انى اول ما اقدر اشيل مسؤولية نفسى هتواصل مع دكتور واحاول اعالج اى اثر للبيئة دى جوايا 
*معنديش مانع طول فترة طفولة ومراهقة ولادى ان كل خطوة تكون باستشارة اخصائى نفسى للطفل 
*مش هقصر ابداا فى انى اظهر حبى وامومتى ليهم 
*هركز معاهم، مع زعلهم، مع الكلام اللى ورا الكلام والكلام اللى مش بيتقال 
*هعلمهم حدودهم كويس وازاى محدش يكسرها مهما كانت درجة قربه 
*رااحة ولادى فوق اى حاجة فى الدنيا، مش هجبرهم على حاجة طول ما هى مش حرام ولا هتضرهم او تضر حد.. 
*عمرى ما هجبرهم على مكان مش مرتاحين فيه.. ولا ناس مش بيرتاحوا لتعاملهم.. راحة ولادى رقم وااحد طول ما الحاجة اللى عايزينها دى فى ايدى انى اعملها
*هعلمهم يطوروا من نفسهم وشخصيتهم ويحبوها، هقوى ثقتهم فى نفسهم عشان مفيش حاجة فى الدنيا تهزهم 
*اى حاجة فيها جهاد هشجعهم عليها بس مش بحاجات مادية.. عشان يتعودوا ان الهدف تقوية الرابط بينهم وبين ربنا فى قلوبهم مش حاجة تانية 
*هحاول يكون التشجيع بان كلنا نساعد بعد وهعودهم لما حد يكسل عن طاعة التانى يشجعه عشان الهدف الاول اننا نمسك ايد بعض للجنة 
*هحبب بنتى فى الزى الشرعى من صغرها ومش هكتمها فى البيت وهعلمها تهتم بنفسها وانوثتها صح 
*عمرى ما هضرب ولا هعلى صوتى، هعاقب ايوة، بس هعاقب بحب وقبل اى عقاب لازم يعرفوا هما بيعاقبوا ليه وافهمهم ان العقاب دة عمره ما يقل من حبى ليهم ابدا 
*فى وسط كل عقاب هقف جنبهم لحد ما يعدوه، العقاب تقويم مش تفريغ غضب 
*عمرى ما هعاقبهم بانى اخد منهم حاجة انا او باباهم جبناها كهدية او ليها ذكرى حلوة فى قلوبهم.. الذكرى الحلوة هتفضل حلوة 
*قواعد البيت هتكون واضحة ومكتوبة واى حاجة جديدة زى التاب او التليفون هيكون ليها حدود فى استعمالها ووقتها وعقاب واضح لو الحدود دى اتكسرت 
عشان يكون هو اللى بيختار الفعل وهو عارف رد الفعل عليه 
*مش هقول كلمة وارجع فيها ابدا حتى لو هزار عشان ميتعودوش على كدة منى ولا يتعودوا على الكذب
*مش كل يوم وكل ساعة هفكرهم انا قد ايه بضحى واحرم نفسى عشانهم.. التضحية لما نذكرها بتدخل عقولهم وقلوبهم من باب ذل مش حب ابدااا
*اى لحظة توتر او ضغط فى البيت هحضنهم واطمنهم انها هتعدى.. مش هتجاهل خوفهم وقلقهم اللى هيتحفر فى عقولهم لو ملحقتوش واحتويته صح 
*عمرى ما هكلمهم عن تقصير باباهم فى اى واجب من واجباته ولا غلطه فى حقى انا كامهم.. حتى لو اضطريت انى اصلح وراه 
لازم الاب يكون القدوة والمثال الصح لولاده واى فكرة من دول هتتكسر عنه هتشوه نظرتهم ليه  
*هعود باباهم يحضنهم كل ما يدخل البيت عشان يتعودوا ان وجوده ليه تاثير مش زى عدمه 
والكثير والكثير من الحاجات اللى محتاجة اغيرها 
ادعولى ربنا يقدرنى واكون انا البداية اللى توقف دايرة الاذى فى تربية بتتورث بدون وعى ولا تفاهم 
وربنا يهدينا ويقدرنا ويهدى امهاتنا واباءنا جميعا اللهم امين 🍃🌿❤️‍🩹

Mango_68159 🇪🇬 · Answer

هفضل صديقه لاولادى مش هخوفهم منى هخلى بينا حب واحترام مش خووف ورعب 
هحضنهم واطبطب عليهم وادعمهم وعمرة ما هقلل منهم ومهما غلطو هكون سندهم وهسامح من قلبى ومش هزلهم باي غلطه .
هفضل ادلعهم واتباهى بيهم

Pear_68730 🇪🇬 · Answer

اهلي دايما بيمدحو اي غيري طول الوقت بس عشان احس انه انا مش كافيه  ، ما عمرهم تقبلو شكلي او جسمي لان وزني زايد ، كان بابا كل ما يشوفني قاعده معاهم يقولي انتي ازاي مستحمله القرف اللي انتي فيه برغم ان كان وقتها عندي 13 سنه بس، وماما بدأت توديني لدكتور تغذيه بدون حتى متسألني لو كنت حابه او لا ، وللاسف كل اللي خسيتو زدت أضعافه وبقى من الصعب أن انا اتقبل فكرة الدايت والرياضه من تاني وبقى عندي اضطرابات في الاكل يأما بجوع نفسي لدرجه صعبه او ان انا اكل فوق طاقتي.
فمستحيل اغصب عيالي انهم يغيرو من نفسهم او حتى اقول ليهم كلام جارح او اقارنهم بحد لان انا ما عمري كرهت الشخص اللي بيقارنوني بيه انا كنت بكرهم هما

Cookies_68867 🇪🇬 · Answer

اتنمروا على وزني و كرهوني ف نفسي لو مسحولي الذاكرة عمري ما انسي حاجات بابا كان بيقولي يا عجلة بقي شكلك وحش و تخينة و بغلة و مع ان انا اصلا وزني مش زايد اوى انا 80 كيلو و يشهد ربنا اني حاولت اخس كتير بس من تنمرهم عليا و انهم مش متقبليني زي ما انا تعبني جدا و عملي breakdown و فيه جملة بابا قالها لما كان هو و ماما عندهم مشاكل كالعادة من لما كان عمري شهور و عايزين يتطلقوا و وقالي انا لو طلقت امك هرميكم في الشارع ، يشهد عليا الله اني عمري ف حياتي ما هنساله الجملة دي ابدا لانه عمره ما شاف مني حاجة وحشة تستاهل الجملة دي حاسه انها اتحفرت ف قلبي بحروف من نار غير قابلة للشفاء و انا عمري في حياتي ما هعمل كدا ف اولادى

Strawberry_69449 🇪🇬 · Answer

حاجات كتير.. اهمهم اني مش هضرب عيالي علشان اربيهم او اعاقبهم و مش هقارنهم بحد بحجه اني عيزاهم احسن و مش هشتمهم و اطلع كل غضبي عليهم علشان هما ملهمش ذنب اني متدايقه و مش هعاقبهم انا هعلمهم، في الاخر هما اطفال و مسؤوليتي و مش هربيهم التربيه القديمه اللي تجبلهم عقد نفسيه ولا التربيه الجديده اللي بطلعهم دلوعين اوڤر و مش بيسمعوا الكلام، هربيهم بطريقتي، علي طول هشجعهم في كل حاجه و مش هقول اني مشغوله لو احتاجوني في اي وقت مهما كان موضوع تافه علشان مش تافه بالنسبه لهم

Ice Cream_69497 🇪🇬 · Answer

مش همد ايدي عليهم مهما حصل! العقاب لابد منه بس الضرب مستحيل يكون جزء من العقاب الخصام اسوء منه بكتير 
مش هحرمهم من اي حاجه اتحرمت منها 
الحنيه شئ لازم حتي لو من الراجل 
كاب لازم اكون حنين 
وانتو؟

Croissant_69571 🇪🇬 · Answer

محدش كان قريب منى ولا حتى حنين عليا لدرجه سابوني ادور ع الحنيه دى بره غلطت كتير وتعبت كتير ولحد دلوقتى من أقل تصرف اللى قدامى بيشوف دى عقده عندى لدرجه بقيت اتعاير بيها  كانت الاول بتتقال ف ضهرى دلوقتى عادى اى حد ممكن يقولهالى ف وسط الكلام عادى 💔

Sugar_49832 🇪🇬 · Answer

ديما كنت بقول انى عمرى ما هكون زى اهلى 
كنت شايفاهم جامدين وقلبهم جامد علينا.. مش بنصعب عليهم حتى 
لحد امبارح.... استوعبت ان الموضوع مش جمود لا.. هما قاسيين.. قاسيين بجد والقسوة من الاهل بالذات تقهر 
يمكن دة سببه الضغوط اللى مروا بيها.. بس على الاقل لو مش هيقدروا يفهمونا يسيبونا نعييش 
عمرى ماهعامل ولادى زيهم... هحااول عشانهم... هداوى نفسى بايدى عشانهم.. هعرفهم المعنى الحقيقى للام.. هبينلهم حبى وامومتى.. هديهم وقتى، هركز معاهم، مع عنيهم ودموعهم 
هركز مع كل يوم يرجعوا فيه من المدرسة واحس انهم مطفيين 
انا اتعرضت لتنمر ووحدة وكنت فى بيئة وسط ناس مش شبهى كل دة فى المدرسة واهلى ميعرفوش عنه حاجة... ثقتى بنفسى معدومة 
هزرع جواهم تقدييير كبييير لنفسهم.. 
هكلمهم... هكلمهم كتييير فى كل حاجة..هعودهم يشتكولى منى..مش هخلى العجز اللى انا عشته يتنقلهم.. هحاول افهمهم ويفهمونى ويغيرونى للى يطمنهم منى 
المانع الوحيد لاى حاجة عايزينها هيكون انها تكون حرام.. طول ما هى حلال حتى لو مش على هوايا يعملوها.. بحدود طبعا 
فى المقابل هزرع جوااهم حب ربناا اووى مش واجب وفرض لا حب.. اهلى اتعاملوا مع علاقتى بربنا انه واقع لحد ما بعدت اووى 
هختارلهم اب حنين وانا واثقة ان ربنا مش هيخيبنى فى دى بالذات لانه عليم بيا وعارف انى مش هقدر على دة لوحدى 
مش هتجوز واحد بيسافر.. انا عايزة باباهم يكون ليه دور فى حياتهم مش مجرد بنك 
هختار اب حنين، هختار اب حنين، هختار اب حنين 
 مش هعاملهم انهم تجارب بجرب فيهم ايه ينفع وايه يفشل فى تربيتى ليهم 
هعمل كل حااجة واى حااجة فى سبيل ان يوم ما الدنيا تضيق بيهم يرموا نفسهم فى حضنى ميدوروش على غريب 
هعمل اى حاجة عشان حضنى يبقى امان بجد مش حاجة تخنق او ملهاش تاثير 
هقدر خوفهم، هفهم قلقهم، مش هسمح انهم يضحكوا وجواهم وجع.. كل ضحكة مخنوقة بتقطع فى القلب من جوا 
امى قالتهالى اكتر من مرة ويمكن دة كان بيعطينى امل برغم كل حاجة قالتلى حضنك حنين كلمتها طمنتنى ان يمكن فيا حاجة حلوة مش قادرة اشوفها 
بدعى ربنا من قلبى ان ولادى يشوفونى ام.. بس ام بجد، حضن وطبطبة وحنية... بدعى ربنا ان ولادى ما يشوفوا منى قسوة... وان ميجيش لحظة يقولوا ماما قست قلبها علينا 
بدعى ربنا يصبرنى ويثبتنى ويهدينى ويدلنى لطريق يعوضنى ويجبر خاطرى 
اخر كلمة... ولادكم امانة.. حافظوا عليها🍃🌿❤️‍🩹

Cherry_68541 🇪🇬 · Answer

بابا وماما احن ناس بس مشكلتهم انهم مكنتش بيعرفوا يعبروا عن حبهم لينا بالكلام كان دايما يظهر دا فى خوف مبالغ او ردود فعل عنيفه ودا بحكم ان سننا صغير مكناش بنعرف نترجمه فكان بياثر فينا جدا كل طفل غير التانى انا كشخصيه بتغذى على السمع فكنت بحب دايما اسمع بحبك من بابا وماما او كل اشكال الحنيه تكون سمعيه بالنسبالى قعدت فترة مش بعرف اعبر لأى حد ف دايرة علاقتى بحب او مش بعرف اعبر عن نفسى لانى متعلمتش دا من صغرى بس واحده واحده لما دخلت الكلية بداءت اتعلم كل حاجه بنفسى وصممت انى اعوض دا مع اولادى فبقيت دايما بكلمهم انى بحبهم وانا شايفاهم احسن ناس حتى لو غلطوا وانى سند ليهم وأننا نتعلم الغلط والصح مع بعض وبحاول دلوقتى اخليهم يعرفوا يعبروا عن نفسهم سواء غضب او حزن او فرح ضرورى الطفل يتعلم انه يترجم مشاعره

Olive_69415 🇪🇬 · Answer

ابويا الله يرحمه كان قاسي عليا جداً ومكنش صاحبي ولا قريب مني.. مقربش ليا الا قبل ما يتوفى بكام شهر (الله يرحمه) 
انا عندي ولد وبنت وقريب ليهم ومصاحبهم من اول ما اتولدوا بس ابني في اول سن المراهقة وبقاله فترة بيبعد عني وبيختلق مشاكل بيني وبينه.. انا منفصل عن والدته بس الحمدلله مفيش أي مشاكل بينا وعلاقتنا الى حد ما كويسة.. بس موضوع ابني ده مش عارف اعمل ايه معاه

Broccoli_69651 🇸🇦 · Answer

كأنو بيخافو علي زعل الناس اكتر من زعلنا احنا وكأنو بيعملو حساب للناس علي حسابنا خال بقا عم او عمه بس كنا بنتحرج ويكسفونا وميردوش عننا
لدرجة في موقف مش بنساه
كان جدي واحنا صغيرين بيوزع العديه في العيد فا كان بيدي لأخواتي الولاد وانا البنت الوحيده فا جه دوري قال معندناش بنات تاخد عديه وماما وبابا كأنو واقفين فا قالولي قوليله شكرا 
شكرا ع ايه مش فاهمه
اتعلمت اني ما اخليش حد يزعل ولادي أبدا ولو كان مين وبعمل كده فعلا
مبخليش حد يدوس ليهم ع طرف

Strawberry_69629 🇪🇬 · Answer

مكنوش قريبين ليا للدرجة إللى تخلينى مكونش خايفة من الدنيا ومن الناس وبقيت يعتمد ع نفسى ف كل حاجة وقوية قدام الناس لكن وبعد ٢٧ سنة لقيت نفسى زيرو ف الناس معرفش جواهم ايه ويتعامل معاهم بنقائى

Strawberry_69121 🇪🇬 · Answer

علمونا الاحترام والادب بزياده مع كل الناس مع ناس متستاهلش حتى اللي بيغلط في حقنا منردش عليه وده طمع الناس فينا وخلى ناس تستغل الموضوع ده ياخدوا حقنا وينهبونا ويتعدوا على حقوقنا حسبي الله ونعم الوكيل بس كبرنا واتعلمنا اه لسه فينا شويه مما تربينا عليه طبعا ولكن الدنيا والناس علمتنا كتير وبنحاول نعلم اولادنا تميز بين الناس وازاي ياخدوا حقهم وبردوا بالادب للاسف مع ان في ناس مينفعش معاهم غير معاىله بالمثل ..

Corn_68719 🇪🇬 · Answer

اللي انا متأكد منه انهم بيحبونا اكتر من نفسهم وكانوا عايزين يشوفونا احسن منهم بس نسيوا ان الزمن غير الزمن وان اللي عيشينه انهارده اكيد احسن من اللي هما عاشوه زمان لكن مش الأحسن لينا ولمستقبلنا.. ودا مش ذنبهم لكن كان لازم يفهموا.محدش علمنا يكون لينا شخصيه في اختيارتنا وده هو اللي هعلمه لأولادي.

Blueberry_59831 🇪🇬 · Answer

ياااااه مش عارفة اعد .... يارب ربنا يقدرني و اكسر دايرة الالم دي بجد.. بالذات قسوة و خذلان و غياب الأب .. و قلة حنية الأم .. حتى لو مكنوش عارفين اوي اثر دا و حاولوا يكونوا كويسين و يدونا حب بالطريقة اللي هم فاكرينها صح او بالطريقة اللي هم عارفينها و اللي هي مش صح ..  او جرحوا بدون قصد.. بس دا لا ينفي انه جرح و اثر دا موجود و محتاج مجهود كبير للتعافي .. ربنا يسامحهم و يساعدهم و يعافيني من اني اعمل كده في اطفالي ان شاء الله
و يقدرني اتعافى بجد

Orange_66539 🇪🇬 · Answer

مكنوش بيهتموا باي حاجه غير درجاتي و مذاكرتي و للامانه هما كانوا موفرين كل شئ هما يقدروا عليه ليا بس برده مكنوش بيهتموا انا كويسه او لا يعني لو تعبانه و مذاكرتش او هغيب يوم مش بيهتموا و ممكن يعملولي مشكله اكبر من التعب اللي عندي او يوم الغياب اي نجاح بحققه طالما مش 100% هو مش نجاح اي حاجه عايزه اعملها لو مثلا عايزه اخرج او اجيب حاجه لازم تتاجل لبعد الدراسه حتي لو عندي وقت و حتي لو انا مذاكره تمام 
بعد سنتين من التخرج الحمد لله انا حققت حلمي و بقيت دكتوره بس لسه حاسه ان فايتني حاجات كتير نفسي اعملها منها اللي مينفعش اعمله دلوقتي و منها اللي نسيته بس انا متفهمه هما عملوا كده ليه بس عمري م ههتم بدرجات اولادي علي حساب صحتهم النفسيه ✨️

Corn_71708 🇪🇬 · Answer

هعلمهم يعرفو قيمتهم و ان الدراسة و التفوق فيها حاجة كويسة لكن مش نهاية الكون 
هعلمهم ما يخافوش من حاجة طول ما هما صح و ايا كانت النتائج 
هعملهم اني عمري ما هتخلي عنهم مهما حصل منهم هزعل و هغضب لكن عمري ما هسيبهم و امشي 
هعرفهم انهم اغلي ما عندي و بحاول اكون اب احسن كل يوم
عايز علي قد ما اقدر اطلعهم شبعانين حنية و دفا و اي حاجة تانية هتبقي سهلة بعدها

Marshmallow_70902 🇪🇬 · Answer

عمري ما هحسسهم انهم لوحدهم او يتملكهم الضعف وبردو مش هدلعهم هعلمهم المسؤوليه ومش هقسى عليهم هكون معاهم دايما وهحتويهم علطول واصاحبهم وابقى بير اسرارهم مش هخليهم يحتاحوا لحد هخليهم دايما خاسين بالقوه لاني في ضهرهم ومعاهم.
عمري ما هقارنهم بحد لان هم مش زي حد ولا اي حد زيهم هعلهم يحبوا الخير ويعملو الخير وهبعد عنهم مبدا المقارنه ده خالص واخليهم دايما حاسين بالرضا .
هعلمهم ان الدنيا فانيه وان اهم حاجه فيها تكون سوي نفسيا وراضي عن الي بتعمله .
عمري ما هتخانق مع امهم قدامهم حتى لو هي غلط لينا مكانا الي نتناقش فيه الخناق عمره ما بيحل مشاكل هعلمهم مبدا النقاش واختلاف الاراء ميفسدش للود قضيه .
هعلمهم الاحترام المتبادل وده عن طريق احترامي ليهم ولخصوصياتهم واحترامي لوالدتهم وتعزيزها دايما .
هحاول اكون مثلهم الاعلى الي يفتخروا بيه دايما واخليهم دايما فخورين انهم شايلين اسمي .
ربنا يرزقنا جميعا الزوجه الصالحه والذريه الصالحه الطيبه

Banana_72221 🇪🇬 · Answer

معامله زي الزفت وتعنيف لفظي وجسدي من الاب ودائما اهانه وزعيق تربيه مجتمع شرقي منحط لا يفقه أي شيء في تربيه اولاد ولا ازاي نتعامل معاهم 
عشان كدة انا اخدت قرار في حياتي مستحيل اخلف طفل ابدا عشان مش يعاني دي منا وملايين غيري بيعانوا في حياتهم

Jackfruit_53658 🇪🇬 · Answer

١-الضرب
 
ضرب الطفل او حتى المراهق على فِعل هو مكنش ليه يد فيه
يعني ايه اتضرب عشان وقعت حاجه يعني ايه اتضرب اصلا
انا احيانا بحس اني قلبي اسود عشان مش بنسى بس لما افتكر ازاي اتضربت لمجرد اني بذاكر لاختي و هي مش عارفه تحفظ و حاله الرعب اللي كنت فيها او ازاي اتضربت لمجرد اني خبطت فيها بالغلط و انا طفله مكملتش ال١٣ سنه مش بقدر اسامح امي
او ازاي اتضربت لمجرد ان صوتي على على ابويا من عصبيتي و من الظلم اللي بسمعه من ناحيته
 
٢-التقطيم و رمي كلام يسم من تحت لتحت

دي تاني حاجه توجع بعد الضرب و تقهر و كلمه واحده تخليني مش عارفه انام 
او كلمه ابويا وقت نتيجه الثانويه و هو بيقولي انه مكنش متوقع مني اعلى من كده
رغم اني طلع عيني و كمان والدتي كانت تعبانه و كنت متأثره بتعبها و محدش كان جمبي ساعتها

عمري ما هوري عيالي اذى من اللي شوفته خصوصا ان انا اللي طلبتهم من ربنا مش هما اللي طلبوا انهم ييجوا الدنيا

Chocolate_52370 🇪🇬 · Answer

كل حاجه
انا ممكن اكون انا اللي غيرت نفسي للاحسن شكل و النظفه الشخصيه و اسلوب هو اه مش احسن حاجه بس هما السبب مش عارفه ابقي احسن في اسلوبي انتقادات كتيره وبيقللوا مني بالذات قدام الناس اول مره نشوفهم لازم يتكلموا عليا وانا ببقى قاعده ساكته والناس شايفاني محترمه بس بيغيروا فكرتهم دي خالص والناس بتبدا تعملني بطريقه تانيه دي حاجه من الحاجات الوحشه اللي بيعملوها واول حاجه مش هعملها مع عيالي

Donut_81952 🇪🇬 · Answer

هحاول مقارنهمش بأي حد من اخواتهم وصحابهم، هحاول اخليهم ميخافوش يحكوا لي أي حاجة وميخبوش عليا حاجة، ولو عايزين يعلموا حاجة في حياتهم مادام مش ضد الدين اشجعهم وادعمهم ومحبطهمش يعني وكدة احاول يعني مخليهمش محتاجين لحد