فيه موقف انهاردة، انا والله م قادرة احدد حتى شعوري تجاهه؛ أسف ولا حزن ولا صدمة، ولا ايه بالظبط..؟ وانا داخلة الدرس، لقيت طفل، لا يتعدى ال٧ سنين بالكتير اوي، ومتبهدل طبعا وحالته حالة؛ انتوا عارفين اطفال الشوارع.. المشكلة انه كان بيشرب فيب. انا زعلت واتضايقت اوي من المنظر، وكنت داخلة الدرس، بس معرفش ايه اللي خلاني بجد اروح عنده. قربت منه، وهو كان نايم على الرصيف، لما لقاني باصاله وبقرب منه، اتفزع وقعد يعتذر كتير اوي رغم انه معملش حاجة غلط، ومع اني كنت بقربله بابتسامة. المهم، سألته ايه اللي ف إيدك؟ قالي ده بتاع اخويا. قولتله اخوك عنده كام سنة؟ قالي اكبر مني مش عارف. المهم، قولتله طيب فين بابا؟ قالي بابا ميت. اقسم بالله انا مع الكلمة دي قلبي اتقطع، والمشكلة الولد صوته واطي وهادي اوي وانا مش سامعاه كويس، ف خليته يعيدها تلت مرات، وانا بجد مختلة الواد على حافة الانهيار، بس انا بجد مكنتش سامعاه. قولتله طيب فين ماما؟ شاور على ست قال دي صاحبة ماما. فاا قولتله طيب ممكن آخد ده؟ وشاورتله على الفيب اللي ف إيده، ف قالي خديه وكان هيديهولي، وبعدين سحبه تاني وقالي بس اخويا هيزعل، ف قولتله خلاص ممكن توعدني متشربش منه تاني؟ قالي حاضر، فسلمت عليه، وقولتله وعد؟ قالي وعد. الولد والله قمر ما شاء الله، شعره اصفر وعيونه ملونة واسمراني كده شوية، ومؤدب اوي، او خايف مش عارفة. انا مش عارفة اذا كان تدخلي صح ولا لا، ولا اذا كان هيبطل يشرب ولا لا، بس نوعا ما حاسة بشعور حلو اني اول مرة اتدخل واحاول اصلح حاجة مش عاجباني، مش اتفرج عليها واسكت. ارجوكم بجد، لو شفتوا ناس زي دي، حتى لو شاكين انهم بيمثلوا.. اجبروا بخاطرهم، مش الابتسامة الحلوة ولا العشرين جنيه اللي هتدوهالهم هيفرقوا معاكم ف حاجة والله.. بلاش نقول ده بيمثل وده مش عايز ونحكم على الناس، طب مهو لو بيمثل ربنا هيحاسبه، بس لو لأ، ف تخيل أجر جبرك لخاطره كبير اوي عند ربنا ازاي؟ تخيل بس.. احنا للأسف ف مجتمع غير عادل، طفل زي ده ممكن لو بس اتعلم واخد فرصته في الحياة يطلع طبيب يعالجني ويعالجك، ممكن بكلمة حلوة بس يتغير للافضل لو فضل فاكرها، بس احنا بنستخسر، انا نفسي مكنتش هتدخل، لولا ان لقيت رجلي والله كانها بتتسحب سحب كده ليه. فاا بس والله، ربنا يوفق الولد ده ويهديه، ويارب ما يشربه تاني بجد.