أنا بكتب الكلام ده من غير تجميل. للأسف أنا موجوع من مديري، يمكن الناس تشوف إن الموضوع عادي أو طبيعي في الشغل، بس الحقيقة إن وجع المدير مختلف.. الكلمة منه بتوجع أضعاف، والنظرة أو الظلم بيكسر من جوّا. في لحظة غضب وضيق، وأنا مش قادر أتحمل الضغط اللي عليا، خرج مني دعاء عليه. كنت فاكر إن ده هيريحني أو يخفف من اللي حاسس بيه، لكن اللي حصل إن الندم شدّني أكتر، وحسّيت إني تقيل على نفسي. أنا بطبعي مش عاوز أكون سبب في أذية أي إنسان، حتى لو ظلمني. يمكن هو مش واخد باله إنه بيجرحني، ويمكن عارف وبيعمل كده.. الله أعلم. بس أنا مش عاوز أشيل ذنب إن قلبي يدعي على حد. كل اللي نفسي فيه إني أرتاح، وربنا يجيب حقي بطريقته العادلة، من غير ما يخليني أشوف حد بيتعذب قدامي أو أبقى سبب في تعبه. يمكن ده مش ضعف، بالعكس.. ده يمكن يكون قوة. قوة إني أقرر أسيب الحكم لربنا، وأركن الضيق على جنب، وأركز إزاي أبني نفسي بعيد عن أي ظلم. أنا بكتب الاعتراف ده عشان أفضفض وأخفف من حملي، وأقول لنفسي قبل أي حد: أنا محتاج قلبي يفضل نضيف من الغضب، وربنا هو الكفيل بكل شيء

1

3