النهاردة أنا موجوع وجع ملوش وصف، التروما اللي كنت فاكر إني دفنتها صحيت من تاني وهجمت عليا بكل قسوتها. لما بفتكر اليوم ده، وبفتكر الموقف السخيف والظلم اللي اتحطيت فيه، بحس بخنقة في صدري كأني بموت. ​أنا مش زعلان على الشغل، داهية تاخد أي مكان مبيحترمش كرامة البني آدم.. أنا اللي واجع قلبي بجد "الخذلان". كنت بحبها، كنت فاكر إن ليَّ قيمة عندها، لكن في اللحظة اللي كنت فيها محتاج حد يرفع عني الظلم، أو حتى يقول كلمة حق، هي اختارت السكوت. وقفت تتفرج عليا وأنا بتنهش، وكأن مفيش بيننا أي مودة أو عيش وملح، سابتني أحس إني ملوش لزمة، زي ما أكون نكرة في وسطهم. ​دلوقتي أنا في مكان جديد، وسط ناس كويسين، بيعزموني على أفراحهم وعايزين يقربوا مني.. وأنا من جوايا بمثل إني تمام، بس الحقيقة إني لسه محبوس في نار اليوم داك. لسه بسأل نفسي: "ليه؟". ليه اللي حبيتها مدافعتش عني؟ ليه الدنيا اسودت في وشي بسبب تفاهة وظلم؟ ​بس أنا عارف إن وعيي ونضجي هما اللي هيعدوني. أنا قررت أبعد عن أي علاقة تستنزفني أو تقلل مني، وده اختبار لثباتي. أنا مش هسمح لذكرى ناس "قليلة الأصل" إنها تهد اللي بنيه دلوقتي. أنا استاهل أتحب من حد يشوفني غالي، مش حد يتفرج عليا وأنا بتظلم ويسكت.

2

1