انجذاب

مساء الخير.. هحكي عن مشكلة انا تعرضت لإساءات طفولة كتير خصوصا بعد طلاق اهلي ابويا اتجوز واحدة متسلطة بجد كانت بتعاملني اسوء معاملة لكنها بردو كانت بتحبني و بتخاف عليا و محدش يسألني ازاي .. المشكلة دلوقتي مش في الماضي على قد ما انا بميل احيانا للبنات المتسلطة الي زيها حتى بحس اني بنجذب لنفس البنات الي شكلها

هو طبيعي انو انا عندي مشاعر تجاه ولد زميلي في الجامعه هو معايا بس اكبر مني بسنه وبالنسبه لأهلي هما عامه وجهه نظرهم أن فرق السن الصغير مشكله وهما رافضين دا تماما بس الولد نفسه علي الرغم أن ليه تصرفات انا مش راضيه عنها وهو عامه مش سوي ميه في الميه وانا مش عارفه ليه انا منجذبه له وبحب اتكلم معاه وهو انا شايفه فيه حاجات جميله كتير وبجد بحس انو من جواه كويس اوي وحنين بس هو محتاج يغير في نفسه حاجات وانا عارفه أن جزء من انجذابي بسبب أن عندو كدا daddy attitude وانا عندي daddy issues . وانا حاسه بالذنب وحاسه اني كارهه جداا المشاعر دي وحاباها في نفس الوقت،ومش عارفه هل هو يستاهل فرصه بجد ولا لأ وهو نفسه اصلا متلخبط يعني احنا صحاب وهو بيحكي لي مشاكله وهو حياته مش متظبطه ميه في الميه المفروض اعمل ايه وبجد انت مكسوفه وانا بقول الكلام دا بس حسيت اني المفروض أخرج مشاعري دي

جماعه هو الحب حقيقي؟ انا اه بحب اهلي جدا جدا بس ليه حاسه مش عارفه احب بسهوله، اعجبت مره ولا مرتين مع نفسي لكن بردو لما اتخطبت سنه وشهرين معرفتش احب خطيبي، هو بالنسبه ليا متقبلاه بس مفيش انجذاب هل ده طبيعي؟ انا من اسرة محافظه جدا والحمد لله في حالي وانسانه بشهادة الجميع كويسه لكن كل ده مزعلني + مفيش حد بيدخل دماغي بسهوله والفكره ان الفرص قليلة مش كتيره + انا مش عايزه حد بيطير والله انا بس عايزه اتزوج انسان صالح واحبه ويحبني بس حاسه الامر صعب

أول مرة ارتبط كانت من ٣ سنين أنا حقيقى فعلا moved on بس الفكرة ان محستش نفس الحاجة ناحية اى واحدة تانى محستش بنفس ال انجذاب اللى مش طبيعى ده تانى يعنى آه بشوف بنات جميلة و لطيفة و كل حاجة بس الانجذاب اللى بحسه جوايا ده مقدرتش احسه تانى و ده هو أللى فعلا مش عارفة اتجاوزه

حاسس بالوحدة انا 29 سنة حاسس ان انا كبرت حاولت اخطب كذا مرة بس الموضوع كان بيبوظ في فترة التعارف قبل حتى م نلبس دبل مبحسش بانجذاب اوي غير لبنات معينة و دة مصعب الموضوع وخايف اخد بنت اظلمها معايا .. القبول مهم ف مش عايز اخد بنت مبقاش عارف اعبر عن مشاعري ليها او ابقى بقول اي كلام من غير م اكون حاسه للأسف بحاول اشتغل على قد م اقدر عشان طموحي عالي شوية ف مش لاحق اتعرف على بنت والصالونات اغلب البنات اللي اهلي اقترحوهم معجبونيش شكلا ف مبكملش هل في حد زي كدة ؟!! ولا انا لواحدي