سيطرة

انا في صراع مع نفسي بسبب عدم قدرتي على السيطره عليها، وعلى دماغي وافكاري، ممكن اقعد اتخيل موقف في. دماغي وانعزل تماما عن الواقع، لدرجة اني اتخيلت اني نزلت بوست هنا وبحكي فيه عن المشكله ورد عليا كذا شخص برد معين وانا رديت كمان عليه، ممكن اسرح واغفل عن الواقع تماما، بقعد اتخيل بالساعات اني مع بنت اعرفها واتجوزنا او اتخطبنا او بنحب بعض واقعد اسرح كتير معاها مش بنت معينه لا اتنين يمكن خمس ست بنات، مش بعرف احدد شكل البنت المميز الي فعلا احبها بيه او شخصيتها مشوفتش بنت ابهرتني وانها وخلاص هي دي، ودا سبب لي اني اشوف كل البنات مناسبه وتوهني، مش قادر اسيطر على مخيلتي ممكن افكر في موضوعين في وقت واحد وفي مره قاطعهم. التالت ووقتها حسيت ان دماغي انصعقت بصدمة كهربيه خلتني ادوخ

مشكلتي مع ماما أن هي ساعات تربينا اوي و ساعات تسيب الدنيا فاهمني يعني مثلا الخروج النهارده لحد ١٠ بس النهارده هي متعصبه مفيش نزول يعني انا بقولها دي حدود وانا بسمعها بس مش ههتتحكم في حياتي علي حسب هي رايقه ولا متعصبه

حاجة مستفزة جدا ان حد يتحكم بيكي عشان بيحبك او عشان خطيبك يعني ايه بجد وليه تقبلي بكده اصل حضرتك شحطة معدية ال ٢٠ وييجي يقولك ممنوع ترجعي بعد الساعة كذا او تستأذني مني لو عايزة تخرجي في يوم مع صحباتك طبعا اللي حابة كده ف هي حرة لكن متمنعش اني بستفز من الحاجة دي المفروض الحب انك تطمنيه انك هتتأخري مش تستأذنيه تتأخري ليه حضرتك طفلة خلاص مرحلة التربية كانت على ابوكي ومامتك مش جوزك ولا خطيبك الحاجات دي لازم يكون متفق عليها من البداية طبعا وكل واحد يشوف اللي يعجبه يعني لو انت عايز بنت متروحش متأخر او لبسها بطريقة معينة اسلوبها يكون بطريقة معينة ف كل ده بيكون اتفاق من البداية او الافضل تدور على البنت دي جاهزة وانتي برضو لو هو بيدخن او اسلوب حياته بطريقة معينة متبقيش عايزة تغيريه طب ما تدوري على اللي جاهز مش بيدخن وتقوليله مبحبش اللي بيدخن

بقالي حوالي سنه نفسي اقلع الحجاب، اعمل ستايلنج لشعري واوريه للناس زي باقي البنات، البس اللي انا عايزاه من غير ما حد يقولي حاجه..من رابعة ابتدائي وانا لابسة الحجاب، ملحقتش استمتع بإني اظهر نفسي، كبرت وابويا مخبيني عن الناس ومبيخلنيش اخرج في اي حتة.. حتى لما كنت بعوز دروس كان بيجيبلي مدرسين اونلاين عشان مخرجش برا البيت، كل الناس قالتلي ده بس خايف عليكي، لو هو خايف عليا هيخليني اعمل ابسط الحاجات من غير ما يحسسني اني بعمل مصيبة.. كل ما اقوله عايزة اخرج مع صحابي يقولي لا، ربنا شاهد اني ولا مره واحده في حياتي كلها خرجت مع صحابي، بيقولي احنا كده كده بنخرج ك عائلة مش لازم صحاب (مبنخرجش غير مرتين في السنه وأوقات مره واحده بدون مبالغة) ف انا تعبت وحاسه اني محبوسة ومش عايشة حياتي وكل حاجه مقفلة عليا وحتى الخاتم اللي هو ابسط حاجه ممكن البسها بيمنعني ويشك فيا ويقولي بتتزيني لمين ما تلبسيش اكسسوريز. جاسه اني مخنوقة لدرجة اني بقيت امسك وشي واغرس ضوافري فيه واقطعه من التعب اللي جوايا

انا بجد مبقتش فاهمه شخصيتي بقيت عاوزه افرض سيطره علي اي حد وعلي اي حاجه مبقتش شايفه حد وبرد علي الكلمه 500 ده بس بيطلع قدام اهلي اي حد غريب فكرتو عني اني هادية رذينه محترمه ف حالي ويشهدولي بالخير قدام اهلي بس ببقي انسانه تاينه محلوظه:حاسه ان اهلي لو بينت اني ضعيفه قدامهم هتظلم جامد رغم انهم ناس محترمين جدا انا بس مش عارفه اعمل ايه

هو مرض ال ADHD مالوش علاج يعني كل الفوضى الداخلية دي مش بتنتهي ملهاش حل مش عارف هو ميزة ولا عيب مش قادر احدد من كتر كمية الأفكار والمشاعر المتداخلة في بعضها حاسس اني جوه عالم غريب مليان حاجات كتير اوي وكلها شغاله في نفس الوقت مع بعض مش عارف اتخلص من الموضوع دا . لو حد عندو نفس المشكله ياريت يقولي اسيطر علي الموضوع دا ازاي

طبعا كلنا اما بنتدايق او نتوتر او كدا بيبقي عندنا عادات او تصرفات بنعملها بتهدينا او تريحنا ممكن نكون متعودين عليها عمتا ، بس حد جرب ان هو يبقي العاده اللي بيعملها دي تبقي الاكل بس زيادة عن اللزوم، هو انا لما ابقي كل ما بتوتر او بزهق ممكن اكل كميات كبيرة جدا لدرجه ان بطني توجعني و ابقي هرجع بس اكمل اكل لاني حاسه اني محتاجه كدا؟ انا المشكله دي مكانتش مأثرة فيا اوي لاني كنت بلعب رياضه كتير جدا (ساعات في ايام كنت بتمرن مرتين في اليوم) بس في تغيرات حصلت في حياتي و رفضت الرياضه اللي كنت بلعبها من و انا صغيرة جدا لاني كنت بكرهها اصلا و مضغوطه اني العبها ف قللت عدد التمارين و بقيت بلعب رياضه تانية تمارين اقل ف بدأت المشكلة تظهر و زدت في الوزن حبة بس مش كتير و بدات اعمل دايت مع ان كل اللي يشوفني يقولي اني مش محتاجاه اساسا، بس انا اصلا ببوظ الدايت دا اوي يعني و مشكلة الاكل لسه معايا، بس انا حاسة اني مكبرة الموضوع، الاكل عامل معايا مشكلة كبيرة جدا مش قادرة اسيطر عليها، ممكن تقولولي نصايح علي ازاي اقدر اوقف دا؟ ولا المفروض اروح لاخصائي نفسي ولا لا؟ ولا انا مكبرة الموضوع و دي عادة و خلاص؟

غالبا اكتر علاقه سامه في حياتي هي علاقتي بمامتي، مفيش علاقه عرفت او هتعرف تاثر عليا نفس التاثير اللي بتاثره عليا علاقتي بمامتي، و من اصعب العلاقات اللي اخرج منها هي شخصيه نرجسيه جدا صعب تتغير و كل ما احاول اني اغيرها انا اللي بتأذي و في نفس الوقت صعب ابعد عنها لان من جهه انا متعلقه بيها لان ليه في جزء جوايا نفسه يحس بالدفا و بشعور انها تحضني و تبتسملي و من جهه تانيه لانها مش هتسيبني بره سيطرتها مهما حصل و كل ما بحاول اكون رأي خاص بيا ده بيحسسها بالخطر فبتكسرني انا و ارائي و شخصيتي و كل حاجه و في الاخر ترجع تدعي عليا و تظلمني و تدعي انها مظلومه و تعيش دور الضحيه و مبتفكرش تسمعني و لو حاولت اتكلم بتخرسني انا بس كان نفسي احس بالدفا بتاع العيله و احس ان ليا ام اروحلها وقت ما اكون تعبانه و اشتكي من الدنيا ليها بدل ما اشتكي للدنيا منها

حاسه إنى ضايعه رغم ان سنى كبير بس فعلا مش قادره اسيطر حتى ع نفسي .. يمكن ده ناتج عن انى سيطرت سنين كتير اوى وف النهايه بقيت لوحدى دماغى رافضه كل حاجه حتى وجودى ف الدنيا .. مش عارفه ايه الحل علشان اكون سويه .. او بمعنى اصح ارجع زى م كنت .. يعنى اكبر المشاكل عندى حاليا انى مش قادرة اموڤ اون من علاقه وهو سابنى وحتى لما بعتله ماسيدج شافها ولا حتى فكر يرد عليا .. المشكله دلوقتى مش فيه انا مشكلتى ف نفسي انا متعلقه تعلق مرضي .. انا الا حد ما متدينه وطلبت من ربنا كتير انه يرجعلى أو حتى يرد عليا وعملت كل حاجه حلال ممكن تتعمل بس اللى فكرت فيه أو اللى ظهر قدامى فكره جلب الحبيب ف البدايه كنت مترددة وخايفه من ربنا بس دلوقتي الفكره كلها اللى مسيطره عليا إنى عوزاه يرجع ب اى تمن وقولت ممكن اعمل كده وبعدين اتوب بس هو يكون معايا .. عارفين طبعا إن مجرد م بنفكر ف الحاجه بنلاقى اعلانات ليها ف كل مكان ده اللى حصل معايا بقا بيظهر قدامى وللاسف كلمت واحده منهم معملتش اى حاجه ولا قولتلها اى حاجه بس انا بالنسبالى الخطوه دى صعبه ع شخصيتى اصلا حسانى بخسر كل حاجه بما فيهم نفسي .. اعمل ايه احل المشكله دى ازاااااى؟!!!

انا وحماتي متخانقين هي قويه ومسيطره وانا نفس الشيء ف مش بنتفق مع بعض خالص كان راجعين من البلد وانا اشتريت فسيخ فهي قالت لي نظفيه فوق ولكن بزعيق كدا وكررتها كذا مره .. واحنا المفروض هناكل مع بعض ف انا كسلت اطلع وفي نفس الوقت رخمت و قعدت ف هي قعدت تزعق وطلعت غضبت ونزلت بليل زعلانه وتقول أنا اللي هحطه في دماغي مش هقعده .. ف انا من وقتها وانا مش بكلمها انا عارفه اني من الاول كان لازم اطلع فوق ولكن الكلام اللي هي قالته وقت العصبيه والجمله الاخيره دي اظن ضيعه وحقها ما كانش ينفع ان هي تقول كده ماما قالت لي اتجنبها خالص وما انزلش تحت عندها الا في الضروره بس المشكله ان احنا بنتجمع مع بعض يوم الجمعه بيجي اخو جوزي ومراته واحنا بننزل وانا لو منعت نفسي عن يوم الجمعه ده يبقى قطعت معاها تماما ولو نزلت مش هعرف اتعامل زي الاول لانها بتتعامل بجفاء قوي فانصحوني اعمل ايه

السلام عليكم اريد فقط شخص يعطيني نصائح واش اسوي في مسيرتي لأنو اهلي دائما هوما لي يحبو يسيطرون واش راح ندير فالمستقبل تاعي انا ، كي نحب نقوللهم واش راني حاب انا ماشي كيما حابين نتوما يقولولي لالا نحنا نعرف مصلحتك اكثر منك ، لي راهم يقولولي عليه حلمهم هوما ، بصح انا عندي حلم اخر بصح هوما في طريق حلمي مايخلونيش اوصل ليه

انا شخصيه عصبيه للاسف وكمان أم جديده شويه .. ازاي اقدر اسيطر علي عصبيتي وغضبي خصوصا لما ابني يعمل حاجه تعصب .. ازاي امسك نفسي عن اني مبقاش مع كل حاجه بخبطه ولما يكبر ابقى ام بتضرب .. محتاجه جدا نصيحه لاني مش بقدر اقاوم دا