السلام عليكم ورحمة الله وبركاته. أنا متجوز عن حب من صاحبة أختي، وفي حاجة عايز أعرف رأيكم فيها، ومن غير قلة أدب بعد إذنكم، لأني تعبت من اللي حواليا وملقتش حل غير الجروب ده. المهم، أنا متجوز عن حب، وصاحبة أختي بقت مراتي. علاقة مراتي بأهلها كانت غريبة من أول يوم، ومكنتش فاهمها. مرة كنت عندهم أيام الخطوبة وكنا بنتكلم عادي، لقينا أخوها الأصغر منها زعق وقال لنا: خلاص. وأنا طبعًا اتكلمت مع أبوها، وأبوها زعق له. ولما كنت بروح، كان بيكون موجود أمها بس، وكانت كل ما تشوفنا قاعدين بنضحك أو نهزر تقول لي: "هي مش كده مع إخواتها ولا معانا، البنت دي كئيبة ونكدية"، والكلام ده كانت بتقوله من وراها مش قدامها. وأنا كنت بسمع من هنا وأطلع من هنا. هي كانت محبوبة من الكل في الشارع، ومحبوبة من عيلتي، وحتى جدتي اللي مكانتش بتحبها. ولما شفت إنها بتتعب من كلام أمها عنها، قررت أرحمها من اللي عايشاه ونتجوز. فعلًا مكملناش خطوبة 6 شهور واتجوزنا. بعد الجواز، أخوها كان عندنا كل يوم. وأنا معنديش مانع ييجي وينور، بس ييجي ساعة ويمشي، مش يقعد 23 ساعة. كانت لسه عروسة ومحتاجة نخرج وندخل ونروح عند أهلي شوية، وهي يا عيني مكانتش بتلحق ترتاح. وبقيت أشوف إن كل كلام أمها عنها كان غلط، لأنها كانت شاطرة في البيت، والبيت نضيف، والأكل حلو، وكل حاجة كويسة. المهم، جدتي الله يسامحها خلتني أمضي على وصل أمانة وسط أوراق تانية، وبعدها هددتني بيه وقالت لي: يا تسمع كلامي وكلام حماتك، يا الاتصالات دي هتروح للشرطة. بمعنى أصح، اتعرضت لتهديد. وكان طلبهم إني أتجوز مرة تانية. حماتي مكانتش مختارة حد، لكن جدتي كانت عايزة أجوز بنت عمي. وفعلاً اتجوزتها. مراتي عرفت وهي حامل، ومن ساعتها مش قادرة تسامحني، رغم إن عدّى سنتين. دلوقتي مش قاعدة معايا، وراحت عند واحدة صاحبتها وقاعدة في البيت اللي اشتريته. بنت عمي كانت بتحب شخص تاني، واتجوزته بعد كده علشان جدتي متأذيش الشخص ده، وهو جوزها الحالي. أنا جربت كل الطرق مع مراتي، وبعتلها بنت عمي تحكيلها الحقيقة، وبرضه مصدقتش. وجبتلها ورد وشوكولاتة وحاجات كتير بتحبها، لكنها رجعتهم كلهم حتى الدبلة.
