هل انت فعلا زي ما انت معتقد

الموضوع بيقف على انت شايف نفسك ازاي ومعتقد فيها ايه كل واحد عارف قدره وطاقته فمتعتقدش وتحمل نفسك فوق طاقتها ساعتها هتحس انك عاجز وانك مش زي ما انت معتقد في نفسك وهتكره نفسك لكن خد على نفسك الفكرة المنطقية انا مثلا معتقد في نفسي اني شخص كويس اه لازم اغلط واقع واتعلم لأن انا في الاخر بشر مش معصوم من حاجة ومش بقيس نفسي على حد واقول هو وصل وانا لا لكن بقيس نفسي على نفسي وطالما انا النهاردة احسن من امبارح يبقى في تطور وكدا انا ماشي صح في حياتي وزي ما انا معتقد في نفسي

الحقيقة انا مش عارفة انا مين!!.. زمان كنت لما بغمض عينى وبدخل احلام اليقظة كان عندى رفيق هناك عارف انا مين كويس.. كان حابب طبيعتى جدا وشايف ان كل شئ فيا جميل وانى ماليش شبهة وانى كلى خير وان روحى مختلفة وانى انسانة ناجحة فكل حاجة بعملها وانى أستاهل ان انا أتحب بكل المعانى وهو كان بيحبنى الحب الى عمري م قابلته من اى حد قريب ولا من بعيد هو كان بيزود ثقتى فنفسي.. بس اول م بفتح عينى الدنيا بضلم ومببقاش عارفة انا مين..

عامة اللي بيبقي مش حاسس انه ممكن يتحب او قلقان انه ممكن ميتحبش تلقائي بدون شعور و دون وعي ممكن يحصل منه حاجات عكس المشاعر اللي جواه للشخص تبين انه هو رافضه او يتفهم غلط و كده ف القلق من شئ هو اول خطوة للشئ لأنه ممكن يبقي عنده خوف من انه يوصف المشاعر اللي جواه بصوت عالي او يتكلم عنها او يقول رأيه او يتكلم بصراحة ف العموم ف هيكون للناس شخص مش مفهوم حتي لو بيموت ف الحد ده و الحد ده مثلا عارف انه ممكن ميقدرش يتكلم او يعبر عنه مشاعره بشكل مريح ف يبدأ يشك ف مشاعره و يتراجع و تبدأ يكون في مسافة بين الاتنين و نقطة صعبة الوصول بس يعني ده كان رأيي

انا شخص محبوب جدا ، مُبتلى بإن مفيش شخص عوزته الا وجالي يعتبر ، اكتر من شخص اعترفلي انه كان بيحبني من سنين ، لا سنين حرفيا اكتر من 5 و 3 مع ذلك عمري ما حبيت نفسي بجد يمكن اه عارفه مميزاتي بس ضئيله جدا قدام عيوبي! مع مدح الناس ليا سواء أهل صحاب أو حتي لو شخص كنت معاه ف ريليشن بشوف نفسي مش قد المدح دا رغم اني بظهرله عكس كدا ، يعني اه يبختك والله انا فيا كل الحاجات الحلوه دي بس مش عارفه بجد العيب ف عيونهم ولا عيوني

انا عندى مميزات كتير فعلا بس مش فاهمة ازاى فى نفس الوقت بتعامل على انى عبئ مع انى بقدم كتير إلى قدامى يمكن علشان اتعودت اركز على السلبيات اكتر من الإيجابيات بقيت بحس اصلا أن لوحدى احسن لان مقابلتش حد شبهى مش عارفة هل علشان انا عندى مشاكل ولا علشان هما اللى كدا بس مقابلتش حد كدا حسيت أنه مش بيحسبها بالواحدة أو يمكن اصلا علشان انا مش بقدم اللى قدامى محتاجه فمش عارفة ازاى حد ممكن يقابل صحاب ويبقو شبها لأن معنديش اى علاقة صداقة عميقة ممكن برضو علشان انا اللى بحط حواجز بينى وبين الناس دائما حتى لو عارفة أنهم كويسين ومش بقدر اتخطاها حتى لا عاوزة ولو حاولت بحس بالقرف كل ما بفكر انى هكون قريبة من شخص أو مش بالقرف بس احساس مزعج بس ساعات بقول لنفسى انو علشان مش متعودة على كدا واكيد مع الوقت هتعود اتعامل مع صحابى بأريحية بس برضو مش بقدر

ولله انا معرفش، بس انا ببص لنفسي بنظره ان لسه في أحسن ممكن الواحد عشان اكتر حد عارف نفسه وقدراته هتوصل لفين فكسله وإنعدام الشغف والطاقه المعدومه اللي هو فيها مش مخلياه عارف يوصل للي هو عايزه، ديه حاجه مؤزيه لأبعد الحدود ..

معرفش ليه انا شايفه نفسي كده شايفه كل سلبياتي و بقعد اقولها لنفسي طول الوقت و بلاقي ان انا اكتر حد بيدمر ف نفسيتي مع اني لو بصيت لنفسي من منظور تاني هلاقي اني بحاول و اني جميله و بشتغل ع نفسي و مسؤوله و جدعه و مستسلمتش رغم أن كل حاجه كانت تدعو للاستسلام و فيا مميزات كتييير ولو وثقت ف نفسي شويه هبقا شخص تاني بس مبعرفش اقول لنفسي كلام حلو ولو قولت مبعرفش اصدقه دايما بقول لنفسي كلام سلبي بيدمرني و بيدمر اي نقطة ثقه موجوده فيا و مبقدرش حتى اصدق الكلام الحلو الي بيتقال عليا و بستغرب لو حد قالي كلام حلو الي هو ازاي انا فيا الحاجات دي ؟؟انا مش شيفاها! مبقدرش افتكر الحاجات الحلوه الي فيا غير ف بوست كتباه ف 3 ثواني و بنساع بعدها و ارجع للكلام الي شيفاه و مصدقاه ..

معتقدش خالص بس الي عرفاه ان دايما معرفش انا فين ولا دا مكاني الصح ولا لا بس ساعات بحس اني غريب عن المكان الي انا في وانو م مكاني ولا الناس شبهي تيجو ندور ع اماكن تشبهنا وناس زينا ونفس حياتنا

ياريت لما توصلوا لازاي بتعرفوا دا تقولولي عشان الموضوع زايد عن حده في دماغي انا جربت مرة اطلع فكرة زي دي احد اعرفه و اتقالي انه دا وسواس و مفيش كدا و بتاع بس الموضوع مرعب تخيل تبقى ماشي في حياتك كلها مفكر انك طيب و بحت الخير للناس و دايما انت المظلوم و بتعمل الخير و بيتردلك بوحش و كل الحاجات الحلوة دي و تطلع في الآخر انا اللي غلط و عايش دور الضحية!!! تخيل هتبقى موت كام انسان بالحيا و اذيت كام حد بخداعك لنفسك دا و تخيل بقا و اسرح بخيالك..!!! الموضوع مش انا ممكن اكون شايف نفسي وحش من جوايا و كدا بس دا مش حقيقي و انت احسن من كدا و الكلام دا لا دي تتحل الازمة اما تبقى شيطان و شايف نفسك ملاك..!! فكروا فيها حرفيا مجرد التفكير فيها مرهق بدرجة مش طبيعية...!!!