بلوك قصص حقيقية - 49 تجارب، ونصائح، ودعم

صباح الخير انا اسف لو البوست بس هتكلم عن حد صاحبي واتمنى اسمع نصايحكو وارد يكون حد منكو قرأ قبل كده بس الموضوع تاعبني نفسيا. اول حاجة أنا عمر في حياتي محد اهتم بيا ولا ارتبطت وكل ده ووالدي منفصل عن والدتي وعايش اغلب الوقت لوحدي. كان ليا صاحب، والله ما بهزر، كان بالنسبة لي أكتر من أخ، العلاقة بينا كانت غريبة شوية، كنا حرفيًا على الموبايل طول اليوم، هو يصحى يتصل، ينزل من بيته يتصل، وهو في الطريق يتصل، يوصل الشغل يتصل، وأنا كمان نفس القصة، ده غير الشات اللي مبيخلصش، لو راح يجيب حاجة من تحت البيت يتصل وهو رايح وهو راجع، الموضوع كان أوفر شوية بس بصراحة كنت مبسوط بيه لاني عايش لوحدي وعمر محد سأل عليا وعمري مقربت من حد كده وكنت مبسوط اوي اول مرة اعرف يعني اية اهتمام. وجت فترة امتحاناتي، ودي كانت أسوأ فترة عدت عليا، كنت ناقص مادة ولو وقعت فيها هعيد السنة، كنت مرعوب حرفيًا، وهو بقى وقتها كان عامل شغل عالي جدًا، حافظ مواعيد امتحاناتي أكتر مني، يتصل قبل ما أنزل، وأنا في الطريق، وأنا داخل اللجنة، بعد ما أخلص، لحد ما أروح البيت، كلامنا مكنش بيخلص، يا إما حد فينا ينام يا إما حد يتشغل. ولو حد فينا اتضايق من حد تالت كنا نقطع معاه، من غير تفكير، كنا قريبين إنه مرة كلمني يقولي يعني إيه متسألش عليا، هو أنا شيفت إمتى بكرة، وليه مكلمتنيش غير مرتين بس النهارده. بدأ يتغير معايا بطريقة مش مفهومة، وأنا كنت بعزه جدًا جدًا، لدرجة إن أمي كانت بتقولي طب ما تعزمه ييجي البيت بما إنه قريب منك كده. فضل بقى داخل في مود غريب، يوم كويس ويوم لأ، مرة يرجع يكلمني طبيعي، ومرة يتكلم بأسلوب وحش جدًا، لدرجة إنه مرة اتصل بيا الفجر، وقاللي أنا بكرهك اقسم بالله العظيم وعمري ما حبيتك وبح.. قد عليك دايما. قولتله إيه اللي غيرك كده، قالي عشان مش عايز أكلمك، قولتله خلاص براحتك، بعدها بكام يوم رجع يقولي تيجي نخرج، قولتله ماشي، خرجنا، جابلي حواوشي وأنا جبتله حاجة من بلبن، وقعدنا على القهوة. حاولت أفتح معاه الموضوع، أفهم إيه اللي حصل، قولتله إحنا كنا إيه وبقينا إيه، قالي فجأة هو أنت ليه دفعت، قولتله عادي، أنت كنت بتقول عندك التزامات ومش عايز أتعبك، أنا الحمد لله معايا فلوس وواقف على رجلي ابويا وامي بيدوني مصروف وشغال شغلانتين وعايش لوحدي مليش اي التزامات، راح قلب الموضوع وقاللي يلا تكلف إيه، ده أنت موبايلك وحش وأنا معايا آيفون، وابتدى يفتح مواضيع حساسة عني واسرار محدش يعرف عنها حاجة. اتضايقت وسكت، قالي عايز تعيط عيط، وأنا فاتح الأكل بتاع بلبن قالي هو أنت محروم للدرجة دي، قولتله اتكلم باحترام، راح قالي ده أنا كده، وأنت أصلاً عيل متو،،، حد وفي نص الطريق قالي أنا مش عايز أعرفك تاني، بعدها اختفى شهر من غير كلام. بعد شهر كلمته عشان أفهم، رد بأسلوب سيئ، عملتله بلوك، فضل يتصل كتير لحد ما فكيت البلوك وده بعد اسبوعين اعتذر شوية وسكت، وبعدها قالي ساب الشغل وقعد يعيط وخدو منه كل فلوسه قدام الناس وأنا رغم كل اللي عمله رشحته عندي في الشغل، قولت لمديري إنه شاطر واشطر مني بدل المرة الف. بعدها راح هو شغل تاني وبقى يطلب مني مساعدات فيه وأنا أساعده، ولما أنا طلبت منه حاجة بسيطة، قالي بلاش صياح ومش هديك حاجة، وقطع معايا أسبوعين، رجع طلب مني مساعدة، رديت عليه بنفس الأسلوب، شتمني وقفّل. وفي الفترات دي، أنا كنت بمر بحاجات صعبة جدًا، أخويا خطب وهو مش موجود، وقعت في الشقة وأغمى عليا وقمت لوحدي وطلبت لنفسي إسعاف لاني عايش، كنت لوحدي، مفيش حد جنبي، دكتورة زعقتلي في التليفون لدرجة إني قعدت أعيط، سافرت يومين ماكلتش فيهم حاجة، رجعت البيت منهار، أخدت إجازة من الشغل، وجالي ارتكاريا. ومرة كلمني وسألني صوتك ماله، قولتله تعبان متشخص ارتكاريا قالي إيه ده أنت جربان واتصل بيا كنسلت قالي رد نفسي اسمع صوتك وانت تعبان، في رمضان حاولت أفتح صفحة جديدة، قولتله أنا بحكي عنك لوالدتي كتير وتعالى البيت عزومة الوقت ده انا مش لوحدي وهي معايا دي فرصة تعالى على فطار قالي هو انت شايفني جعان وأنا مش بدخل بيوت، وبعدها قالي مش معايا فلوس وزعلان قولتله عايز كام قالي هو انت شايفني شحات؟؟؟ انا استغربت انه قالي نفسي اسمعك وانت تعبان وكل ده وحاليا انا بعيد عنه بعد ماكان مهتم جدا جدا ومش بيخلي حد يفكر يقولي كلمة ولو شم بس اني متضايق بقى كده وحاليا انا عملتله بلوك وقريب كان هيوقعني في الز.. نا انا لما قطع معايا شهر كنت بعيط ولحد دلوقتي بعيط ليا صحاب كتير اه وبخرج بس مهما حكيت وهزرت معاهم مش برتاح قد مكنت يرتاح معاه ولا كأنه خطيبتي وكل محكي لحد يقولي ده لو خطيبتك مش هتعمل كده خرجت مع ناس كتير كلمت ناس كتير بس برضو مش برتاح حاسس بالفراغ متعلق اوي بالنسخة القديمة منه خصوصا اني عندي حرمان من الاهتمام بطريقة كبيرة اوي كل مبص في الشات بيننا اقعد اعيط مش عارف اتخطى متعلق بالنسخة القديمة حد عوزت ادخله شغلي وبيتي ونفسى أعرفه على امي وعمري مدخلت حد من صحابي البيت وهو كده اقسم بالله كنت بقوله انت اغلى صاحب ليا وبوصفله قد اية هو غالي عندي وعمل كده رنلي امبارح من رقم تاني بعد معملت بلوك قالي لي البلوك تعالى نخرج رفضت لحد دلوقتي قلبي متعلق بالنسخة دي وانا نفسي بستغرب ده انا حبيت بنت قعدت رغي معاها كل يوم لمدة سنتين مكناش كده وهي مهتمش بيا انا اول حد في تاريخ حياتي يهتم كده طول الوقت حاسس بفراغ بفكر اعمل ايه مش عارف أخرج مع الكل اهزر انكش في كله برضو الشعور اللي جوايا مش بيتشبع ببقى نفسي اقوله عشان خاطري رجع النسخة القديمة اللي عرفتك عليها الأخ اللي في ضهري اللي كنا قدام اي حد وفي ضهر بعض ازاي هو قل مني وهان كرامتي وجه عليا وفرح في مرضي وقالي مش عايز اعرفك وقطع معايا وكل ده انا متعلق كل محكي لحد يقولي انت ازاي مكمل في العلاقة دي بس انا عندي حاجة مش كاملة مش عارف اية هي نفسي الاقي النسخة القديمة من صاحبي واخويا وحبيبي بحس أن ده مش هو كانه أتغير مش مصدق أن ده اللي كان بيكلمني بالساعات فون..

يا جماعة والله العظيم في راجل غريب أوي أنا عارفه وكل مرة يلزق فيا ويخضني بطريقته. أول مرة كنت بعت رسالة في جروب الشغل، لقيته اتصل بيا الساعة ٤ الفجر وقالي: "فلان الفلاني معايا؟؟" قولتله أه خير؟ قالي بسرعة: "اغسل وشك وقوم في مصيبة كبيرة عندك!" اتخضيت جامد وعملت اللي قاله وأنا مرعوب. بعدين قالي: "إيه رأيك في العيال اللي بتحدف صواريخ في الشارع؟" قفلت في وشه على طول رغم أنه معاه لغتين. مرة تانية اتصل وقالي: "أنت جاي النهاردة المكان الفلاني؟" قولتله أه. قالي: "هاتلي قميص بسرعة واركب عربية وتعالا". مردتش عليه. نزلت من الميكروباص رايح أصور شغل، أول ما نزلت لقيته قدامي في وشي، وشعر صدره طالع من القميص كله. اتخضيت أوي، والمنطقة كانت مليانة أمن، حتى الظابط قالي: "عندك حق تتخض، أنا شايف اللي أنت شايفه". قولتله يا فندم والله أنا مستغرب جداً. وبعدين كنت طالع مداخلة في برنامج صباحي، صاحي بدري أقول كلمتين وأنام، لقيته رن عليا وقالي: "سامعااااك.. سامعااااك.. رسالة عايز أوجهها لك.. أوعى تشرب حاجة مسكرة على الصبح" وكررها تلات مرات وقفل في وشي رغم أنه معاه لغتين. يوم ماتش قالي: "اسم القهوة اللي بتقعد فيها إيه؟" قولتله اسمها. قالي: "أنا راكب وجاي". قولتله مش هقدر أستقبل حد أنا جاي من سفر. قالي: "بقولك أنا جاي ولا أنت بخيل؟" جه فعلاً، معرفش عرف المكان إزاي أصلاً، أنا بس قولت اسم القهوة وفي مصر مليون قهوة بنفس الاسم. قعد ورايا وسط تلات رجالة: واحد أسمر وبدقن ونضارة، واحد دقنه صفرا مصبوغة وبجلابية، وواحد أسمر وبشنب وعنده مكنة. والراجل ده معاه لغتين، بيتكلم فرنساوي كمان، كلم الناس فرنساوي وكله اتضايق. طلب حلبة حصا سكر برا، وكنت قليل الذوق معاه ومحاسبتش رغم أنه معاه لغتين. مشي، قولت أكيد مش هيتصل تاني. لقيته بعتلي على الواتس "مانجا مانجا مانجا مانجا مانجا" وبعدين اتصل بليل. عملت بلوك من المكالمات. كلمت صحابي قالولي: "عارفينه، دماغه تعبانة، ابعد عنه" وأنا مشيت على كلامهم. مرة تانية قالي عايز كورس في مجال معين، دليته على المكان. قالي بكام؟ قولتله 6000. قالي: "عندي بـ7000 عسل، ينفع أبدل؟ اتوسطلي عندهم". قولتله لا مليش علاقة. عملت بلوك واتس ومن كل حاجة. بس هو بيدخل من أرقام تانية وبيتكلم عادي، حتى مسألش عن سبب البلوك، وبيبعتلي رسايل منفردة زي "محمد" "أحمد" "أشرف" وأنا مش عارف أعمل إيه. دلوقتي عملت بلوكات كتير أوي وبيخش من أرقام جديدة كل شوية. مش عارف أعمل إيه تاني يا جماعة، نصيحتكم إيه؟