الســـلام عليــــكم عايز اتـكلـم معـاكـو شويه عن موضوع كده دلوقتي انا كنت بحب بنت وانا كنت في اولي اعدادي كده كنت بتدرب اسكيت وشوفتها وفضلت افكر فيها وبقيت بفكر فيها طول يومي وهي مش معايا خالص ولا واخده بالها مني اصلا بس كنت كل شويه اشوفها في كل حته زي تلاقي ارواح كده وكان معايا رقمها بس كنت خايف ادخلها تحرجني ووالله انا محبتهاش بشكلها حبيتها بطيبتها باحترامها مبتكلمش ولاد المهم فضلت كاتم ده كلو جوايا وحبيتها من بعيد بس لحد ما وصلت تانيه اعدادي واختفت من حياتي خالص لمدة سنه ووصلت تالته اعدادي الترم الاول وكنت خلاص قربت انساها ويعتبر اتخطيت حبها . فيوم بقي شوفتها وانا في الجيم كانت واقفه بره بس ملامحها اتغيرت وبقت اجمل من اخر مره لما شوفتها . رجعت فكرتني بكل حاجه بكل حبي ليها ودورت لقيت لسه رقمها عندي وحاليا انا في تالته اعدادي الترم الثاني وخايف اخش اقولها اني بحبها علطول تعملي بلوك وفي نفس الوقت مش عايز اكتم جوايا تاني عشان نفسيتي بتتأثر . اسف لو طولت عليكو والسلام عليكم
وعليكم السلام انا من رأيى متكلمهاش ليه علشان انت لسه صغير ومشاعرك مش مستقره لسه انت متعرفش عنها حاجه يعتبر انت شوفتها مره اتنين عشره انت معجب بطيبتها وشكلها واخلاقها دا اسمه اعجاب مش حب كمان هى مبتكلمش ولاد ومحافظه انها متعملش حاجه حرام اهو انت لو كلمتها وهى معجبه بيك هتخليها تعمل حاجه حرام + لما تكبر وتكون قد مسئوليتها اتقدملها وتكون اتأكدت من اعجابك
ركز ف دراستك ومتشغلش بالك بحاجه دلوقتي لو بتحبها متسحلهاش معاك ف طريق انت متعرفش رايح ع فين لو بتحبها هتخاف عليها من الذنب وتخاف عليها من التوهان دوامه الحب ف السن دا متعبه لو بتحبها اشتغل ع نفسك ع تبقي راجل مسؤول قادر يحافظ عليها وياخدها بالطريقه الشرعيه اللي ربنا أمرنا بيها
لا خليك كاتم احسن لو اكتر حاجه في دماغك حصلت وارتبطو ماذا بعد بتحرق في مشاعر وفي الاخر بتسيبو بعض للأسف مفيش الأحلام الورديه دي في السن ده وانا بقولك عشان مريت بنفس التجربه ولحد دلوقتي بعد اكتر من خمس سنين لسه بحاول اتخطى متقنعش نفسك انك هتقعد ثانوي وجامعه وكل ده مع بعض وتكون نفسك وتشتغل وتتجوزها احسنلك والله خليك كاتم وامسك نفسك لحد ما تبقى جاهز وفكر سعتها تبقى تعمل ايه ونصيبك كدا كدا هيجيلك
هههههههه تالته إعدادى 🙂 طب لو فرضنا قولتلها بحبك و هى كمان قالتلك بحبك و بعدين يعنى هتخطبها هتقراى فتحه مثلا ي حبيبي ركز انك تتفوق فى دراستك علشان تشوفك يوم لما تدخل طب ولا هندسه هتاخد بالها منك غير كده انت واحد زيك زى اى واحد معجب بيها و بيعاكس و يلطف
وعـــليكم الســـلام حقك انك تعبر عن مشاعرك الحقيقة تجاه شخص هو مش عارف انك بتحبه.. جرب تصارحه كدة كدة انت مش خسران حاجة لو هى عملتلك بلوك فإنت عرفت إن ملكوش نصيب وهترحم نفسك من التفكير الزايد فى شخص هو اصلًا مش من نصيبك ولو وافقت يبقى انت اول واحد اخدت الخطوة دى، وجايز لو اتأخرت وكتمت جواك حد تانى ياخد الخطوة ويسبقك وتكون انت الندمان لإنك متكلمتش