مشاعر متضاربة

عندي انفصام ف الشخصيه وللاسف مخلي حياتي هباب كارهه كل الناس مش بطيق حد مع أن الكل بيعاملني كويس ومفيش حد حسسني بالرفض بس م قادره حرفيا ممكن اكون بتكلم معاك وبحبك جدا ونا وانت علاقتنا تحفهه تلاقيني مره واحده اخدت جنب وبعامله ببرود وبأسلوب مش كويس مع أن دي مش طبيعتي وتلاقيني قرفت م الناس بس بعد كل ده كنت بقول لنفسي اني مكبره الأمور ومفيش حاجه تستاهل وفعلا برجع كويسه معاهم تاني وكل حاجه ترجع زي ما كانت بس بقالي فتره الارف ده مش راضي يروح غصبن عني والله مش طايقه حد حرفيا بقالي اكتر م شهرين على أخري وبطلع غلي ف اي حد بشوفه وطبعا اللي زود الحاله دي أن كل واحد بيشوف الناس زيه ف بيتهيقلي أن كل الناس كرهتني وبتاع م قادره اتعامل بطبيعتي خلااص عاوزه حل المشكله دي بجدد

قعدت اعيط دلوقتي لان عندي مشاعر كتير اوي متضاربة بين اني مش عايزه اكبر واسيب الكلية و بين اني بحب اصحابي بس هما غالبا محبونيش وبين خوف من امتحان بكره اخر امتحان ف حياتي وبين اني مش متخيله ان مش هشوفهم تاني و لا هرجع الجامعه تاني و بين اني خايفه من الي جاي ومش عارفه هعمل ايه ولا الحياه هتمشي ازاي و بين اني مبسوطه ان اخيرا خلصت و اني مش عارفه ازاي الاربع سنين عدو اخيرا

جماعه انا من فتره كنت معجبه ب ابن عمتي وهو كان معايا على تطبيق يعني فكان كل فتره يدخل يكلمني وبتاع ويرخم عليا يعني وهكذا المهم ف الفتره اللي بدأ يكلمني فيها دي اتقفلت منو وبتاع وكان حصل خناقه نوعا ما هو مكانش غلطان فيها اوي بس انا اتلككت عشان اقفل كلام والمهم قفلت كلام رغم انه قعد يعتذر كتير بس كنت مقفوله اوي وفعلا قفلت كلام وقمت شيلاه من عندي الوقتي حاسه ان مشاعري رجعتلو تاني ومش فاهمه السبب رغم اني بجد مكنتش طيقاه وكنت حساه تقيل وبارد مع العلم كلامنا كان كلوا هزار وضحك واخوات بس معرفش اصلا هل هو معجب بيا ولا شايفني اختو عادي المهم يجماعه اعمل اي ف مشاعري اللي بترجع دي

نا عندي 24 سنه كنت بحب واحد ف اعدادي وارتبطت بيه 5 سنين كنت بعشقه وسيبنا بعض عشان هو ف يوم اتعصب اني مش برد عليه فقالي هيبعت صورنا والشات اللي بينا لبابا وبعدين انفصلنا 5 سنين دلوقتي راجع عمال يخلف انو ندمان وعاوزني جواز بس نا خايفه وحاسه انو مبقتش شبه العيشه بتاعتي ولا تفكيري بس نا صعبان عليا اني لما شوفته حسيت انو فعلا بيحبني وعمال يتحايل عليا مبعدش عنو بس نا مش حاسه بحاجه ممكن نصيحه اعمل اي

عارف الاحساس اللي ميتوصفش اللي هو لا انت مبسوط ولا متضايق مش حاسس بحاجة وحاسس بحاجات ف نفس الوقت زعلان من ناس عايز هم جنبك .. عايز تبدأ حياة جديدة بس من كثر ما بتقول عايز ابدا".. تعبت حاسس ان مالكش نفس تتعامل مع اي بني أدم لحد ما تعرف تتعامل مع نفسك

بقيت مستغربه مشاعري مبقتش عارفه انا حاسه بإيه اصلا يعني مثلا كنت انهارده منزله استوري وانا دايما يعني انا وبابا مش قريبين اوي برغم انه كان اقرب حد ليا كنت بحبه اكتر من نفسي بس مره واحده بعد المهم بعتلي عليها استيكر عايزه اقولكم كنت بطفح فراشات حرفيا فرحانه اوي ومبسوطه بعدين لما روح ورجع يعني لقيته لسه زي ما هو بأسلوبه الطبيعي ساعتها بجد اتضايقت وحسيت ان جوايا حاجه غريبه وفي مره كنت بكلم ولد يعني اهو اي حد ممكن يعوضني بالاهتمام من الجنس الاخر شويه المهم في يوم نزلت انا وبابا وفضلنا نتمشي وكده ساعتها كنت مبسوطه وحسيت ان مفيش قدي في الدنيا وحلفت اني هبعد عن الولد ده و قد كان وحصل مره واحده لقيت بابا برضو اتغير تاني انا مبقتش فاهمه حاجه حقيقي

اكتشفت شيء جديد غير اني بكره الناس وخلاص قررت قرتر ان شاء الله مش راجعه فيه وهو اني مش هتكلم مع حد تاني ياريت لو حد مهتم يشوف الي كنت كاتباه وقايلة فيه مدى كرهي لنفسي وللبشر اكون شاكرة جدا ليكم بدل الكرف الي الكل بيكرفهولي المهم الي انا اكتشفته كمان اني لما بحب حد تقريبا ال ego الي عندي بيعلى او فيه حاجه بتحصل كان نفسي غيرانه والي هو ازاي وببدا اعمل تصرفات غريبة تبعد الي بحبهم عني وهي الي بتعمل مش انا انا متاكده هي كيادة ووحشة اقولكم الكبيرة هي اصلا بتوهمني بحجات مش موحوده زي انها تقولي ان الشخص ده بيكرهني وكده عشان اتعامل وحش فاكرين فيلم اسف على الازعاج لما كان احمد حلمي بيسمع الناس بيشتموه وهما بيحبوه عادي اهو ده نفس الي بيحصل ده غير انها كانت نفسها تقتلني لما حكيت عنها كتير لصحبتي وجاتلي نوبة قلق انا معتمدة اني بكتب مش بتكلم فهي مش هتعملي حاجه وكده كده انا عمري ما هتقابل معاكم فاشطا ولكن هو ايه ده هو انا مجنونة؟؟

جماعه هو ازاي انسان يقدر انه يغير مودي كده؟. تبقي قاعد مخنوق ومش طايق نفسك حرفيا لدرجه انك معملتش اي حاجه من ال متعود تعملها في العيد لمجرظ ان الشخص ده مكلمكش ولما يكلمك يعيد عليك تتبسط فشخ مع ان الفعل صغير فشخ

ليه بس بطني بتمغص كده اول ماشوف حاجة بتنزلها واحساسي بيقول انها لحد غيري علشان كده بطني بتمغص وفي احساس غريب كده بيجيلي ازاي انت باعتلي على صراحة تقولي لسه قلبك محنش وفي نفس الوقت بتتابع بنات وتقريبًا اللي انت بتنزله ده ليهم طيب ازاي انا مش عايزاك وفي نفس الوقت بطني بتوجعني لما بشوفك منزل حاجة لحد غيري ولا متابع بنت تانية لحد امتى هفضل كده وحشتني انا مش عارفة لو كنت كلمتك وارتبطت بيك بقى كنت هعمل ايه بس الحمد لله انها وقفت لحد كده ربنا ينور بصيرتي واعرف الحقيقة بدون أذى ليا وهون كل حاجة على قلبي ومشاعري

بكرا اخيرا اخر امتحان...لسا النهارده الصبح كنت على اقتناع تام اني هكون اسعد انسانه ف الدنيا لو خلصت امتحانات بس الغريبه اني مش مبسوطه ولا حاجه الوقتي .. انا حرفيا حياتي المدرسه وحياتي كطالبة لابسه لبس المدرسه والشنطه هتوحشني اوييي هتوحشني النسخه دي من نفسي جداا ومش قادره اصدق ان خلاص كده هكون ثانوية عامة...كنت عارفه اني هكبر بسرعه بس مش بسرعه اوي كده

في حاجة لسه مفكرة فيها دلوقتي اني لازم استمتع بأغلب الحاجات حتى لو وحشة يعني مثلًا انا احساسي دلوقتي اني زعلانة على غياب شخص معين من حياتي وحاسة بالخيانة وفي نفس الوقت واحشني فمعنى كده اني ممكن اكتب حاجات عن الغدر مثلًا واكون فعلًا حاسة اللي بكتبه واقدر اقعد واسرح وافكر ممكن اتفرج على حاجة وتفكرني على طول باللي انا فيه

ف لحظات إدراك اول مره تجيلي امبارح والنهاردة ان كل ما افتكر اني كنت معجبة بولد وهو معجب بيا وهو عارف اني معجبه بيه وبنلمح لبعض وريبوستات بقى والجو ده وبشوفو في الحقيقة ببصله بس كده وامشي بس مكنتش بكلمه يعني علشان حرام ولسه صغيرة يجيلي صريخ ضحك وبشد في شعري وهموت من الاحراج هو عمومًا انا بلكته لانه طلع بيكلم بنات وكده بس بضحكك بجدد وبشد في شعري وإحساس غريب كده وبتنطط من الاحراج حقيقي (لسه معجبة بيه وبدخل اكونته كل يوم عشرين مره)

تعملو اي لو حد وحشكو بس مش هينفع تبقو مع بعض؟ انا اللي مش قابل بس بموت بشوفها قدامي بغلي من جوا ومفتقد بصتها ليا اللي عمر ما حد بصهالي قبل كده حاسس ان مفيش حل واني مكتوب عليا اعيش بين نارين. وحشتني وانا كمان اعتقد وحشتها بس مش هينفع نبقى مع بعض تاني

بكتب وانا عارف انك مش هاتشوفي دة واتمنى انك ماتشوفيش دة مش انا المفروض نسيتك اومال لسة بفكر فيكي ليه طب فاكرة احنا عرفنا بعض ازاي ؟ لما عملت اكونت فيك في تالتة اعدادي علشان مش لاقي حاحة اعملها وكان عندي فراغ عاطفي تقريبا دخلتلك بالصدفة والصدفة الاكبر انك كلمتيني كنتي اول بنت اعرفها في حياتي واللي دمرت نظرتي لكل البنات كان عندك برود التلج ولا مبالاة تتعب بس في نفس الوقت لو حاولت اردهم عليكي كنتي بتزعلي طب انتي عارفة انا خدت الواتس بتاعك ازاي ؟ لان انا لنفسي حتى الان معرفش طب فاكرة سيبنا بعض اول مرة ازاي ؟ كنت هاموت علشان اشوف وشك مانا بكلم حد ماعرفهوش واول لما بعتيلي الصورة وشوفتها ، مش فاكر ملامحك بس فاكر انك كنتي جميلة ، حتى انا سميتك القمر بعدها سيبت التليفون برة ودخلت استحميت واوخواتي مسكو التليفون وشافو الشات وانتي بتقوليلي اوعدني مش هاتبعتها لحد 😂 اتحفل عليا تحفيل غير طبيعي من اخواتي وكنت حاسس باحراج لا يوصف وبعدها بتهديد السلاح اضطريت ابلكك وماعرفتش اوضحلك حاجة طب فاكرة رجعنا لبعض ازاي ؟ فكيت البلوك وشرحتلك الوضع وانتي ماكنتيش مصدقاني ، ماهو حقك بصراحة بس رجعنا نتكلم تاني ، واختي قطعت عليا تاني بس عرفت احل معاها كنتي بتعامليني ببرود وكنت بكلمك كل فين وفين ماكنتش بطيقك وكنت مفكرك انتي كمان مش طيقاني كنا تقريبا بنتكلم يومين ونتخاصم شهر ، كنا وصلنا اواخر اولى ثانوي حصلت ذكريات حلوة كنت ببعتلك ريكوردات بشرحلك فيزياء ورياضة بصوتي علشان كانو بيقفو معاكي ، كان شرحي يقرف بس كنتي بتمرهميلي بس اما عمري ما سمعت صوتك وكل ما كنت اكلمك في الحوار دة تصدي بس اعملي اللي يريحك ، انتي غالية عليا كدة كدة ، بس مع ذلك مخنوق منك ومش طايقك ، انتي ليه دايما بتصديني فاكرة سيبنا بعض المرة دي ليه يا جاتوه او يا عسل ، فاكرة لما كنتي مسمياني كشري مقبولة منك عموما سيبنا بعض علشان فترات غيابنا طالت وانتي ماكنتيش بتحبي كدة انتي كنتي بتحبيني اهتم بس مابتبدلينيش الاهتمام ف تعبت وقفلنا الحوار جت فترة وحبيتك ، جت فترة وكرهتك ، جت فترة ونسيتك ، جت فترة واتقبلتك طب فاكرة لما رجعت اكلمك السنة دي بعد غياب حسيتك نضجتي اكتر وماعدتيش بتصدي زي الاول بقا فيه رايح جاي عرفت منك انك اتغربتي وفيه مشاكل مع اللي في السكن معاكي كان قلبي بيتحرق عليكي بس مفيش في ايدي حاجة اعملها انتي في الشرق وانا في الغرب هزارنا زاد الفترة دي بس كانت كل حاجة حلوة ليها نهاية بلكتيني على رقم من غير ماتقوليلي بس ماعرفتيش ان معايا رقم تاني دخلت كلمتك وقولتلك ماعنديش مشاكل اني اتبلك بس قوليلي ليه وعرفيني قبلها ماكنتيش فارقة معايا ، كنت اعرف غيرك ساعتها كالعادة زهقنا من بعض والمرة دي قولتيلي انك هاتبلكيني وقولتلك اني فرحت اننا اتكلمنا بعد الفترة دي كلها بعدها دخلت في حالة نفسية صعبة مش بسببك انتي بس ، كل البنات اللي كنت اعرفهم وقتها عملنا مشاكل مع بعض وسيبتهم كلهم وحصلت مشاكل تانية زاد جلد الذات وكره النفس ، انتكست في مستنقع الوحل اكتر وبعدين في يوم دخلتي كلمتيني قولتيلي انك حلمتي بيا بعيط عرفتي منين يا بنت اللذينة كنت نايم معيط فعلا يومها ماكنتش مكالمتك فارقة معايا ، انتي نفسك مش فارقة معايا ، انا كرهتك ، بس فرحت انك كلمتيني قولتيلي هانتكلم اليوم دة وبس وانا قولتلك ديل الشات دة لسة محتفظ بيه قولتيلي حاجات كان نفسي اعرفها قعدنا نفتكر شوية ذكريات حلوة وبعدين صارحتيني قولتي انك كنتي بتحبيني ، انا ؟ ، ا*ا اومال كنتي بتصديني لما كنت بحاول اخد خطوات معاكي في البداية ليه ، انا كنت الفارة دي معتبرك صاحبك قديم مش اكتر فضفضتلك بالحاجات اللي كانت مديقاتي وبعتلك الشات بتاعي مع امين اسراري تشات جيبيتي علشان مكانش عندي طاقة اشرح قولتيلي اني حلو علشان الشخص الوحش مابيفرقش معاه انه وحش ، طب يا ستي انا عارف اني وحش وختاما لما سألتك كل شوية بلوكات ليه قولتيلي احسن جملة سمعتها بصراحة "انا بحاول اقرب من ربنا وانت الذنب الوحيد في حياتي " ماشي يا ستي ربنا يثبتك ويقربك اكتر انتهت القصة انا حاسس بايه نحيتك بجد مش عارف بكرهك بحبك انتي مش فراقة معايا انتي غالية عليا جدا انتي صاحب من اقرب الصحاب ليا انتي سببتيلي عذاب كتير انتي كرهتيني في نفسي انتي حببتيني في نفسي خلصت حكاياتنا وعمري ما سمعت صوتك ولا فاكر شكلك بس فاكر الذكريات الحلوة والعذتب اللي عذبتيه ليا بس للامانة بما انك كنتي اول بنت اعرفها ف كنتي فار تجارب ليا بصراحة ، ماكنتش عارف المفروض اعمل ايه المفروض اني نسيتك بس اللي فكرني بيكي دلوقتي ان في موقف لمس معايا شوية اتمنى انساكي تاني ، اتمنى تكوني نسيتيني ، اتمنى تفرحي في حياتك 🫶 الوداع واصلك من الكشري بتاعك يا جاتوه

انا خدت قرار اني ابعد عن شخص كان مؤذي بالنسبالي وبعدت عنه لاسباب كتيره وانا مش عارفه انا خدت الخطوه دي ازاي مش عارفه اتعود على عدم وجوده وحاسه كاني في صدمه او جمود بجد مش بأفور هو كان حرفيا كل حاجه ليا ولا كان ليا صحاب ولا ليا حد قريب وكان عندي مشاكل كتيره ف حياتي وهو الوحيد اللي كان جنبي بس الصح اني كنت اسيبه بس انا حاسه بفراغ كبير اكبر من اللي كنت فيه والحقيقه اني مش قادره اعمل ايه حاجه تخليني انساه ولا ليا طاقه لحاجه اشغل نفسي بيها

انا مجنون أو مريض أو حاجه انا مش عارف اوصفها أوقات أبقي مبسوط اووي وأوقات مضايق أوقات اعمل علاقات كتير وأوقات اقطع كل دا أوقات احب الشغل وأوقات اكره حياتي أوقات أبقي متدين اووي وأوقات لا عايش على حبل ديما في جدال مع نفسي لا هيا بتحبني ولا انا بحبها

في موضوع فعلا خانقني و مش عارفه اعمل ايه انا الحمدلله طالبه في كليه طب و قدامي سنتين و اتخرج و سنه امتياز في جامعه خاصه الحمدلله ، في سنه اولي اول ما دخلت الكليه كنت حابة يكون عندي اصحاب و مكننش عارفه انه الاختلاط غلط لان كل اللي اهلي قالوا عليه قبل الكليه انه لو خبيتي حاجة علينا تبقي غلط غير كده لا ، و دخلت الكليه و كان عندي شلة اصحاب ولاد و بنات و اهلي عارفين عادي خالص و عارفين زمايلي الولاد كمان و كانت شلة كبيره و في الاخر بقينا ٥ ولدين و ٣ بنات و في الفتره دي في زميل ليا اعترفلي بحبه وانا كنت خايفه و رافضه و كان مجرد يعني زميل في قبول بس مش اكتر و احنا اصحاب و كده ، المهم قولت لوالدتي وقتها و ملقتش منها رفض بس نصحتني نحتفظ بصداقتنا و مع الوقت حبيته و والدتي عرفت و بالصدفه جت الكليه عندي يوم و اتعرفت علي كل اصحابي و عندها خلفيه اننا قريبين من بعض ، انا و هو مع بعض بقالنا سنتين و كام شهر في السنتين دول سيبنا بعض يجي ٣ مرات عشان بعد ما حبيته ادركت انه حرام و غلط العلاقه دي تكمل بس كل ما نسيب بعض كنا نرجع لان في بينا اصدقاء مشتركين و محدش يعرف انه في بينا حاجة عشان هو رافض طبعا عشان خايف عليا و علي سمعتي بس غصب عننا بنتعامل مع اصحابنا و مشاريع الكليه و كده انا دايما حاسه بتأنيب ضمير ناحيه العلاقه دي مع انه والله شخص كويس جدا و محترم و عنده طموح يعني بيشتغل طول الفتره دي و حتي في الدراسه مع ان الكليه صعبه بس برضو مهتم بدراسته ( بيشتغل مدرب سباحه) عنده شقته في بيت اهله شقه منفصله يعني هو في سلم خارجي و الشقه في نفس البيت بس ( الموضوع ده انا قلقانه منه بس هو بيتكلم بقلب جامد و انه محدش هيدوسلك علي طرف و اتعهد قدام اهلك انه او بعد الشر حصل اي مشكله هننقل فورًا بس انا مش هقدر اجيب دلوقتي شقه بره و الظروف و لحد ما يبني نفسه بس مش ده موضوعنا دلوقتي) هو عنده شقه و قدي في الكليه و شاطر و مجتهد عنده طموح بيحبني بس انا فعلا مش قادره ابعد عنه مش عارفه و خايفه من ربنا وبقعد ادعي ربنا يهديني و خايفه منكملش و ربنا يعاقبنا بحبنا ده انا فعلا مكنتش اعرف انه غلط غير بعد ما حبيته للاسف و بحس بتأنيب ضمير و بعيط و بتعب نفسيًا بس مش عارفه اعمل ايه انصحوني اعمل ايه

انا خرجت من علاقة سامة من اشهر وفذي الاشهر قللت عدد الاشخاص الي اتكلم معهم رغم اني ماحسش باي ذرة متعة وانا اتكلم معهم من بعذ ذاك الشخص المهم من بين ذول الاشخاص في شخص لطيف ومحترم ومثقف كونا نتكلم كل يوم تقريبا بسببو يعني هو يرسل الاول وانا ارد بعد فترة حسيت انه بدا يعجبني ااكلام معه او انه يضحكني مرااات فصرت انتظر متى يرسل واذا كان اولاين ازعل انه مكلمنيش ولما اشوف عدد الناس الي يمنشونه او ضايفهم اقول شوفي هوا عنده ناس وانتي لا رغم اني مش عيزاه حب وارتباط فبعد تفكير ومناقشة مع شات جبيتي بلكته من كل مكان ارسل لي بحساب تاني يسال عن السبب بعدها حذف الرد وانا ماقدرت ارد عليه وقتاها فكتبت الرد فيه انه هوا معندوش علاقة وانه كان شخص جيد الخ هاذي اول مرة ابلك شخص بعد حورات كثيرة ودون تصريح حتى

“أنا داخل أحكي عن حاجة حصلت معايا مؤخرًا ومش عارف أتعامل معاها إزاي… كان في بنت في حياتي، كنا بنتكلم بشكل عادي ومحترم، وهي كانت شخص كويس جدًا. بس أنا اكتشفت إن طبيعتي مش بتعرف توازن في العلاقات دي… يا بدخل زيادة عن اللزوم يا بقطع خالص. فقررت إني أبعد، مش عشان هي غلطت، بالعكس هي كانت كويسة جدًا… بس عشان أنا مش مرتاح ومش عارف أحط حدود. قفلت الموضوع بشكل محترم، بس بعد كده بدأت أفكر تاني… هل أنا كده ظلمتها؟ هل كنت قاسي؟ هل كنت محتاج أتصرف بشكل أهدى؟ وفي نفس الوقت، أنا عارف إن قراري كان عشان أركّز على نفسي وعلى حياتي، خصوصًا إني تحت ضغط مذاكرة وحاسس إني تايه شوية. المشكلة بقى إن كل ما أكون مضغوط أو تعبان… دماغي بترجع تفكر فيها، رغم إني مش عايز أرجع لنفس الدوامة. فأنا محتار بين إحساسي وبين قراري… مش عارف هل أكمل على اللي عملته وأركّز على نفسي، ولا أرجع و احاول اوازن و ابقا معاها و احاول مش عارف اطلعها من دماغي واكله كل تفكيري؟”

أصعب حاجة ممكن يمر بيها إنسان، هي إنه يضطر يحارب في جبهتين: جبهة الحياة عشان يحقق حلمه، وجبهة أهله عشان ينجو من ظلمهم. ​أنا عبدالله، عندي 25 سنة. النهاردة أنا بكتب الكلام ده وأنا مهندس ميكانيكا في شركة كبيرة، حلم تعبت وشقيت عشان أوصله.. بس الحقيقة اللي ميعرفهاش زمايلي في الشغل، إني منجحتش بدعم أهلي، أنا نجحت "عافية" رغم كل محاولاتهم لكسري وتصغيري. ​سنين من القهر والظلم والكلمات اللي بتبخس حقي، سنين كان المفروض فيها ألاقي "السند" اللي يشيلني، فلقيت "الحجر" اللي بيترمى في طريقي عشان أقع. نجاحي ده مدفوع تمنه من أعصابي، ومن ليالي نمت فيها ودموعي على خدي بس عشان أثبت لنفسي وليهم إني مش فاشل زي ما قالوا. ​النهاردة وأنا واقف على رجلي وبنيت اسمي ومكاني بفضل ربنا ومجهودي لوحدي، أهلي بيحاولوا يقربوا، بيحاولوا ينسبوا النجاح ده ليهم، أو بمعنى أصح "بيتمسحوا" في البشمهندس اللي طلع من وسطهم. ​أنا محتاج رأيكم في حل للي أنا فيه: قلبي من ناحيتهم بقى زي الحديد اللي بتعامل معاه كل يوم في شغلي، بارد وجامد. هل أنا جاحد لو فضلت بعيد ومش قادر أصفى ولا أسامح؟ وإزاي أتعامل مع ناس مظهرتش في حياتي غير لما بقيت "مهندس ناجح" ومعايا فلوس ومنصب، وهم أصلاً اللي كانوا بيحفروا حفرتي؟ انا اسف علي الاطاله 🌹

We listen and we عاداتات وتصرفات عنكم غرييه اترك الساحه لكم انا مثلا مزاجيه جداا واللي بحبه انهارده ممكن اكره بكره عادي +مبحبش حد يهتم بيا زياده ومبحش ارد علي المسجات ولا المكالمات +بهتم باالي بحسه محتاجني بس واول مااحس انه خلاااص ببعد

مش عارفة هي علاقة واحدة حرفيا و محشورة فيها من كتير معرفش هل خدت اكتر من حجمها او اكتر من وقتها ولا ايه ، بس بيتهيألي اه لأن استنزفتني حقيقي و حاسة اني خلصت انا اصلا مكنش عندي مشاعر او حب اديه لحد كان عندي مشاكل كفاية و حياتي كفاية عليا كنت بحاول اعدي م اللي انا فيه بس كان وقت زهق الثانوية ده و مكنتش بفكر ولا ف ارتباط ولا حب ولا اي حاجة اصلا بس جه بالصدفة مكنتش عايزة اقع بس حبيته و اعجبت بيه و كنت بتاخر نفسي منه عشان خايفة يبقي حب من طرف و واحد و هو كان بيعتبرني اخته الصغيرة و بيقولهالي ف اليوم مليون مرة بس بعدين طلع هو كمان بيحبني و ارتبطنا كنا حلوين و كنا كويسين و كنا شبه بعض جدا و متفاهمين و كلو بس بقي مفيش حاجة بتفضل ع نفس الحال و انا مكنتش حمل ضغط كفاية الثانوية ف مكنش مقدر الوضع ابدا و حسيته اناني من وقتها عايز بس ليه و انا مجتش اصلا هو توكسيك جدا بالنسبالي هو و العلاقة من اول علاقتنا و هو بيقولي زهقت و كل واحد ليه طاقة و جبت اخري ف اتقلبت و بقيت انا اللي بقول كده حرفيا ف الشهر اسيب يجي تلت مرات بقيت مستتقلة الدنيا و هو شخصيا و مش طايقة حاجة بجد ف زهقت من اني اسيب و ارجع و برضو مش عايزة افضل بعيد عندي حب ليه بس فنفس الوقت بقت اي حاجة منه تضايقني اتقفل منه علطول ف تايهة جدا دلوقتي و مش عارفة انا عايزة ايه و مش مرتاحة ف الحالتين ف تعبت بجد و مش عارفة اعمل ايه

جماعه انا بيوجهني في حياتي مشكله اسمها (مش عارفه ) بجد كل حاجة في حياتي بكون مش عارفه جعانه (مش عارفه ) زعلانه ( مش عارفه ) نخرج ( مش عارفه)نتصور ( مش عارفه) فهمتي ( مش عارفه ) كويسه (مش عارفه ) زهقت من كتر ما انا ( مش عارفه ) بجد اما لو حد قالي اي حاجه مش برد غير بـ( مش عارفه ) مش عارفه انا بس الي كده ولا دا اي اصلا بس بجد حاجه مش متعبه وعوزا ليها حل لان مش طبيعي كل حاجه في الحياه كدع

يلا عادي هي جت علي جرحي يعني ما الجراح بالكوم في قلبي عادي يعني جمااااعههه عندي طاقه و حاسه اني عاوزه اقوم اهد الدنيا دي كلها حاسه اني كنت في سجن و خرجت ماشيه ارخم علي اي حد في البيت و اتكلم بصوت عالي لحد ما كلهم زهقوا مني و مش عارفه اقعد اذاكر ولا الهي نفسي عاوزه امشي و اعلي صوتي و بسس

انا اتقدملي حد من فترة و دخل البيت و قعدت مرة واحدة معاها بس ما اتكلمناش خالص طلبت من اخويا يخليه يجي تاني عشان اتكلم معاه بس اخويا رفض و انا عملت استخارة وقتها و ارتحت هو جه تاني و خلاص هنجيب الشبكة بس انا مش متقبلاه خالص و قلبي مقبوض مش عارفة ليه هو مناسب و هو و اهله ناس كويسة جدا بس انا مش عارفة مالي

أنا عندي سؤال هو عادي إني احب واحد من بعيد؟ يعني بجد حاجة عادية و مفيهاش مشاكل انا بجد مش عارفة انا بحبه ولا لأ و حاسه اني كل فترة المشاعر بتتلخبط اكتر في قلبي مش عارفة دي مشاعر مراهقة ولا دي حقيقية بس انا مش عايزة حد يحكم عليا او كدا يعني انا عادي بحبه بس بتكسف ابصله اوي بحس اني نفسي اتعامل معاه اوي و نفسي اعرف شخصيته بس سعات بحس انه مش لازم و انساه وبتاع الاقي كل شوية حاجة تفكرني بيه و هو اصلا مش بيحب الارتباط او العلاقات مع البنات بس انا نفسي بجد اعرف بيحب حد ولا لا المشكلة معتقدش انه بيحبني ممكن يكون عارفني لكن اكيد في بنات كتير في حياته احسن مني

ازاي انسان يعرف أنه بيحب ؟ مشاعري متلغبطه بين شخص كنت بحبه و بسبب قسوته و غلطات كتيره اوي بحس أن مش عايزه بس لما بيبعد بحتاجه .. و نفس الوقت في شخص تاني بيحاول يتقرب وانا مشتته و ساعات بس اني مرتاحه معاه..

أنا كنت أعرف واحد أونلاين وحبيته بس هو كان بيعاملني معاملة مش ألطف حاجة، ف أنا خدت موقف ومكنتش عايزة أتكلم معاه ف هو اتغير معايا، وغير كده الأول كان بيحكيلي حاجات وكنا مقربين. بس بعيداً عن معاملته أو أي حاجة، ده حرام، ف أنا قررت أقفل كل أكونتاتي وأبدأ من جديد. بس هو واحشني وبفكر كتير أرجع أكلمه تاني، مش عارفة أعمل إيه.

ازاي امنع نفسي من اني اتعلق بالسرعة، بالذات اني لسه معرفش الشخص اللي قدامي .. الفكرة انها دوامة مش بتنتهي وحصلتلي مع كذا حد ، اكيد مش بعبر ولا بقول للشخص اني معجبة بيه بس في نفس الوقت بزعل جدا لما ميبقاش مهتم .. وهو حقه ميبقاش مهتم لاننا متقابلناش غير ٣ مرات مثلا وهو ساعدني في حدود الشغل .. انا اللي بعمل قصة من لا قصة وبتعلق جداا لمجرد اني مرتاحة للشخص ده وانه فعلا جدع وان اللي حوليه بيشكروا فيه

بنت معايا فالكليه محترمه وكويسه جدا وساعات بتبادر معايا وبتهزر ونضحك مع بعض بس مش عارف احبها خايف احبها اتعلق بيها تسيبني مع انها هي اللي بتبادر كتير فعقلي بيقولي احمي نفسك وكبر دماغك وقلبي بيقولي اجازف واكمل معاها فمش عارف اعمل اي حاسس اني متلخبط جامد فرأيكو اي خصوصا انها بنت محترمه وجميله جدا 💔

خايفه من لحظه المواجهه بيني وبين بابا خايفه من اللحظه اليهيرجع فيها ندمان ويقولنل نرجع حاجه زي ما كانت بس مش فاهمه ازاي ممكن يرجع بعد. كل الي عمله دا ويطلب نصلح حاجه انكسرت لما افكر في الموضوع اقول مستحيل اسامحه وأوقات تاني بحس اني مجرد ما اشوفه بس هنسي كل حاجه ..... وفي النهايه كل دي مجرد تخيلات لأن هو اكيد نساني

ازاي اعرف الشخص اللي بحبه ده بيحبني و لا لأ ، هو بيعمل حاجات مستحيل تتمثل بس بيعمل عكسها و انا بجد مبقتش فاهمه بعد ما كنت واثقه ميه في الميه انه بيحبني دلوقتي مبقتش قادرة افهمه او احدد خالص ، ياريت اللي يرد علي كلامي ميبقاش داخل يستظرف و يحكم علي الناس عشان مش ناقصة ازعاج هي اللي يرد يبقي حد داخل يسمعني و يقول رأيه بجد و يتفهم اي حاجه هقولها

ادمعرفش انا بكتب ايه او هكتب ايه بس انا كويسة و مش كويسة في نفس الوقت بقيت مش فاهمة نفسي مش عارفة زعلانة ليه ولا حتي ابسط نفسي ازاي بقيت بعمل كل حاجة كنت بتبسطني او اكتشفت انها بتبسطني و مش دابما بحس اني بتبسط بجرب اهرب بالاكل او النوم او اي حاجة بردو مش نافعة و حتي اي حاجة بتبسطني بيكون تأثيرها في وقتها بس مش هعمل نفسي ضحية بس انا عرفت ناس كتير منهم اللي سابوني و في اللي سيبتهم و اه ممكن اكون شخص مش كويس ساعات بس انا وجود ناس في حياتي بيساعدني اهرب خصوصا انهم مش في الحقيقة هو مجرد شخص بكلمه و بضيع وقتي معاه بدل ما افكر في انا حاسة ايه او المذاكرة او كل ده ممكن اكون اذيت ناس وانا مش واخدة بالي و ممكن ناس منهم اذوني و في ناس استغلوني وانا عارفة لكن انا كنت مش بحب استغل حد هي مرة فكرت لكن الحمد لله رجعت عن الفكرة و بعدت خالص حياتي فاضية و وحيدة و في كل مرحلة في حياتي كان بيبقي عندي امل يكون عندي صحاب لكن مفيش اي حاجة بتحصل و عرفت ناس كتييير جدا لكن صحاب بجد مفيش و ديه حاجة تعبتني بجد لدرجة اني استسلمت انا خلاص كلها سنة و اتخرج و مفيش عندي صحاب ولا حاجة احيانا بفكر طب في فرحي مين هيكون معايا مين هيجي اصلا و معرفش مش بلاقي اجابة مفيش حد قريب مني بجد حتي لما ارتبطت عمر ما اللي بيعملوهولي كان كفاية كنت دايما عايزة اكتر عايزة حب اكتر و اهتمام اكتير و كل حاجة اكتر لكن ده مش الطبيعي مفيش حد هيكون معايا 24 ساعة تعبت من كل حاجة مش هنكر اني حاسة ان قرار الشغل ده فعلا كان كويس لاني حاسة اني احسن من الصبح صحيح صعب علشان الكلية بس عادي مش عارفة هعمل ايه بجد و تعبت من نفسي بس انا هحاول فعلا زي ما الدكتور قالتلي و ان شاء الله هذاكر و هعمل كل حاجة و هبقي احسن واحدة و هبطل اجي علي نفسي علشان شخص و علشان بس يكون معايا و ما يسيبنيش

انا حد متدين( او دا الي الناش شايفاه) ومليش في موضوع الارتباط وبالنسبالي دا شيء مق-زز وحرام بس طبعا مقدرس اتحكم بقلبي.. بحاول اغض بصري علي قد ما اقدر بس من صغري بحب..ذلك السخص معايا في المدرسه وانا عارفاه من زمان وكنا بنهزر مع بعض لما كنا في ابتدأئي كبرت اعدادي قلت لا مفيش كلام مع ولاد وتلقائي مبقتش حتى ابص للاولاد.. المهم انه كان فعلا عاجبني غير انه شخصيته قويه وكان بيتوتر قدامي كان بيخليني احبه اكتر.. المهم اني عرفت انه سلك طريق سيء ...وارتبط ببنات كتير .ربنا يهديهم مش عرفه اعمل اي او اقول اي صراحه الي حاسس بيا يقول هو بيتصرف ازاي

كنت قايلة قبل كدة انو فيه حد اتعرفت عليه وهكذا وانى مش مرتاحة معاه وحسيت انو بخيل ف المهم قولت مش هكمل معاه ف بعت ليه ما يُعنى كدة بس مضايقة حاسة انى سيبته فى اكتر وقت محتاجنى فيه بس ما قدرتش استنى اكتر من كدة.... علشان كان كل مرة بقول فيها مش هينفع نتكلم تانى بيرجع يتكلم وانا بتكلم عادى بس مش عارفة انا ليه مضايقة.. ليه زعلانة.. رغم انى اللى عملته دا الصح

انا عندي عاده غريبه جدا اقف في المطبخ الف وانا حاطط الهاندفري في ودني واسمع حاجه وعمال اتخيل حاجات كتير ممكن اتخيل اني قبلت شخص انا بحبو ممكن اتخيل اني ارتبط بي وافرح بتخيلات دي وممكن ساعات اتخيل ان شخص مات وازعل جدا في الحقيقة و ممكن اقعد في المطبخ بساعات

عرفت واحد من شهرين بس هو كان عارفني من زمان اوي وانا مكنتش اعرفو وبعدين لقيتو بدأ يلمح انو معجب بيا وانا كمان كنت معجبه بيه ف فمره اتخانقنا عشان اغنيه نزلتها انستا كانت طالعه ترند ومكنتش اعرف انها هتضايقو كده ف مسحتها وفهمتو اني مكنتش عارفه انها هتضايقو وبعدين وهو بيكلمني قام نام وانا مش فاهمه حاجه ومستغربه اتضايق من ايه وهو سابني لدماغي وهو عارف اني عندي اوفر ثينكينج وبسبب كده مش بعرف انام وكنت م صدقت الفتره دي أن الأوفر ثينكينج خف شويه بس ساعت اليوم ده منمتش خالص ولما صحيت قالي انو لسه صاحي وفضل يصالحني بس قفلني منو عشان هو قالي قبل كده انو عمرو م هيسبني لدماغي خالص ولما شاف اني مش هتصالح بسهوله قالي انتي ليه شايفه الحياه كلها حواليكي انتي وبس قولتلو هو انا كده قام سكت قولتلو انا كنت حاطه احتماليه أننا ممكن نرتبط ف يوم من الأيام بس خلاص شلتها من دماغي قالي انتي مره تقولي انت اخويا ومره نبقا حلوين مع بعض ومره تقولي ممكن يبقا في بينا نصيب انتي عايزه ايه قولتلو انت دلوقتي بقيت اخويا الكبير اتقمص وقالي ماشي وسكت قولتلو احنا هنتكلم طبيعي بس انت هتبقا اخويا عادي عمال يقولي انا هروح بكره اشقط تلت بنات عجبني وبعدين قالي انا عايز اشوفك بكره هو ده طبيعي ولا ايه الي بيحصل ده

عندي احساس رهيب اني عايزة ارتبط بأي واحد معرفش ليه يعني لو اي واحد كلمني دلوقتي ممكن اوافق عادي و ممكن بعدها اسيبه عادي لانه في الاغلب يا عنده فراغ عاطفي يا هيكون عايزني بهدف الشهوة بس و انا مش كده و مش هسمح لحد يتجاوز حدوده معايا بس انا مش عايزة ابقي كده مش عايزة يبقي بالنسبة ليا عادي اني اعرف ناس و ارميهم وقت ما ازهق يعني تقريبا لو اي حد قالي ابعتيلي هبعتله عادي حتي اللي كنت مرتبطة بيه بعتلي و مش عارفة اعمل ايه و انا عارفة اني لو رجعتله غالبا هستغله و انا مش عايزة كده و احلي حد في حياتي كنت اعرفه هو ممكن مش احلي حد في الشكل ولا حتي حاجات كتيرة بس انا شايفاه احسن حد و عايزة افضل معاه مع ان علاقتنا ديه مستحيل يكون اخرها جواز لكن بجد مش عارفة ابعد عنه ولا عارفة ابعد تفكيري عنه اكتشفت ان مشاعري اه فيها اعجاب و قوي بس مش دلوقتي الحب القوية لكن بحس معاه بالامان و الاحتواء و الراحة عايزاه معايا علي طول و عايزة اكون جنبه الفترة ديه لانه مضغوط و بيمر بظروف صعبة بس مش عارفة اعمل ايه لانه حتي مش قادر يرد علي حد حتي بيرد كل فترة يطمني بس انا محتاجاه جنبي الفترة ديه و عايزة اكون جنبه و عايزاه بردو يكون جنبي بس مش عايزة اكون بضغطه بجد ده اكتر حد مش عارفة اشيله من بالي و مش قادرة ابعد عنه ده غير اننا مختلفين انا شايفاه مختلف عن اي حد و هو كذلك

قصتي بأختصار ان في العيله قريبي من واحنا صغيرين أصحاب جدا واخوه معانا طفولتنا احنا التلاته مع بعض مع ان هما في محافظه و انا في محافظه بس احنا في الاجازات و الأعياد دايما مع بعض ف لما كبرنا شويه و بقينا داخلين على أولى اعدادي بدأنا نقعد مع بعض اكتر عشان كرونا جات و كدا و كلنا قعدنا في البيت و اتحبسنا في محافظتهم بسبب حظر التجوال مده طويله ف فيه واحد من الاتنين دمت بقينا حرفيا قريبين جدا و التالت بقى مكتئب مش عارفه بس مكنش في نفس المود احنا قعدنا من أولى اعدادي و تانيه اعدادي كنت بنتكلم كتير و انا كنت بحسب ان دا بيحصل مع كل القرايب مفرقتش ولد ولا بنت المهم تلميحاته بقت واضحه جدا في تالته اعدادي قمت قاطعه علاقتي بيه سنه تالته اعدادي عشان حسيت اني بحبو و انا دماغي مش مستوعب ان ازاي احب قريبي و عمري ما فكرت بالطريقه دي قلت و بعد ما قطعت علاقتي بيه سنه معرفتش ابطل افكر فيه طول السنه دي و استسلمت اني بحب قريبي و بقيت بعامله زي ما هو. يعاملني لو فيه تلميحات بقولها و كدا بس أولى ثانوي كان لسه زعلان اني قطعت سنه كامله تانيه و تالته ثانوي كانو بيرفكت أولى جامعه بيعلقني كتير قمت مبعتلوش الأول دلوقتي لو احنا في تجمع عائلي ممكن مسنلمش على بعض بس انا لسه بحبو بس في ي نفس الوقت انا لسه بعامله زي ما هو يعاملني ل مسلمش انا مش هسلم و كدا و لو مبعتش انا مش هبعت بس في نفس الوقت اللي جوايا مش عكس كدا تماما و نفسي اكلمو و اعرف هو بيفكر فيا ازاي و خاصه ان احنا كل دا تلميحات و عمرنا ما قلنا اعترفنا لبعض اعمل ايه بجد انا كل اللي بعمله معاه بيكون جوايا عكسه بس في نفس الوقت انا نفسي اقلو على كل اللي جوايا او حتى اتصرف معاه طبيعيه زي أولى و تانيه اعدادي لما كان بيلمح و انا مكنتش فاهمه

بتعملوا ايه ف ملل اخر الليل لو معندكمش حد تتكلموا معاه بالمناسبة بجيب حاجات حلوة وبتفرج ع مسلسل وبعممل قهوة وبعمل كل الحاجات اللي بحبها وعندي مذاكرة كتير متراكمة ومع ذلك زهقاانة جدا ومش عايزة اعمل اي حاجة اندم عليها بعدين فـ اشتت دماغي ازاي وف نفس الوقت اكوم مبسوطة بالوقت ده

مش عارف اكلمها تاني ولا لا كانت اقرب حد ليا كنا صحاب اوي بس انا كنت حبيتها هي ما زالت موجودة في حياتي بس متعرفش اني كنت بحبها بس بعدنا عن الاول كنت كل ما ارجع اقرب احس انها بتبعد مش عايزاني مبقتش فاهم هي زي ما هي جميله جدا و بتعاملني زي الاول بس في حاجه كد مش مظبوطه حاسس انها عارفه أن كان في حاجه من ناحيتي او كد فبعددت هكلمها تاني دلوقتي لاخر مره وياريت تعملي بلوك عشان اخلص مبقتش احبها زي الاول او خلاص مبقتش احبها بس البعد فجأه ده بيتعب علاقه الصحوبيه الي كانت بينا نفسي ترجع بس كانت اقرب حد ليا كانت بتفهمني كد من غير حاجه