أنا فاهم كل حاجة تقريبًا وده فـ حد ذاته بقى المشكلة انا مش محتاج شرح ولا نصايح ولا إعادة ترتيب للأفكار الصورة واضحة زيادة عن اللزوم لدرجة إنها فقدت أي تأثير تحفيزي كل مسار معروف مسبقًا وكل نتيجة محتملة متوقعة وكل اختيار في الآخر بيبان كأنه اختلاف شكلي في نفس النهاية فيه وقت كان فيه إحساس إن في حاجة ممكن تتبني أو إن فيه معنى بيتشكل مع الحركة ده انتهى من غير سابق انذار مفيش نقطة تحول واضحة مجرد تآكل بطيء للفكرة نفسها لحد ما بقت فكرة زيادة عن اللزوم دلوقتي أنا بعمل اللي لازم يتعمل لما مفيش بديل واضح مش عن اقتناع ولا عن رفض لكن عن استمرار تلقائي في نظام شغال كأنك سايب حاجة تشتغل لأنها شغالة بالفعل مش لأنك شايف سبب يخليك توقفها أو تطورها المشاعر اللي كانت بتدي أي اتجاه اختفت من موقع القيادة وبقت في الخلفية موجودة كذكرى تشغيل قديم مش كحاجة لها تأثير على القرار والفرق بين الاتنين مش بسيط ده بيحدد هل الإنسان بيختار ولا بيكمل مفيش إحساس بالخسارة بالمعنى الدرامي مفيش صدمة مفيش انهيار فيه بس حالة استقرار على إن مفيش حاجة تستاهل إعادة التقييم من الأساس والأغرب إن ده مش مؤلم طول الوقت هو أقرب لحياد مستمر الألم موجود أحيانًا لكن حتى الألم فقد وظيفته كإشارة لتغيير أي حاجة وفي النهاية مفيش سؤال مفتوح فعليًا لكن في إجابات معروفة بس فقدت قيمتها فبقيت الحياة أقرب لتنفيذ معرفة موجودة مسبقًا من غير ما يبقى في دافع حقيقي لاستخدامها