رسائل غامضة

محتاج رأيكم بجد عشان تعبت ومش عارف أفهم أنا فين. كنت مرتبط ببنت بقالنا حوالي 3 سنين، وكان في كلام جاد في الجواز، وأنا كنت ناوي أخد خطوة رسمي. الفترة الأخيرة حصلت حاجات غريبة: في يوم بليل اتبعتلي منها شوية رسائل واتمسحت بسرعة جدًا، وأنا كنت قاريهم قبل ما يتمسحوا، وكان في كلام زي: "كنت بكلمك قبل ما أنام" "كنت هعدي عليك امبارح ولا عايز تعملها لوحدك" لما واجهتها، مرة قالت سوء فهم، ومرة قالت حد غيرها كتب، ومرة الموضوع دخل في قصة اختراق وسحب فلوس. في نفس الوقت كان في تناقضات في كلامها عن شخص في حياتها، مرة تقول زميل، مرة مدير، ومرة مفيش حاجة، ومرة في شغل مستمر بينهم. طلبت أشوف الموبايل، سحبته بسرعة من إيدي، وقعدت تقلب فيه، وبعدها قالت جملة غريبة: "أنا ست مش كويسة"، وبعدها رجعت في كلامها. بعد كده بدأت تبعد، وتعمل بلوكات، وتقول عايزين ناخد أجازة، وفي نفس الوقت ساعات تبان مهتمة وساعات تختفي. دلوقتي بعتتلي رسالة بسيطة، وأنا رديت، لكن لما حاولت أكلمها بعد كده مردتش، وفي نفس الوقت واضح إنها بتتكلم مع ناس تانية عادي. أنا مش عايز أظلمها، بس في نفس الوقت مش مرتاح ومش فاهم: هل ده كله ممكن يكون سوء تفاهم وضغط نفسي؟ ولا في حاجة فعلاً بتتخبى؟ ولو مكاني، تكمل ولا تمشي؟