عياط

طب يا جماعه الناس بتعيط ازاي عشان فقدت القدره الي العياط و قلبي تقيل اوي و نفسي اعيط (هنكمل الكلام بأي حاجه) تعبانه مخنوقه نفسي اعيط اعتقد هيفرق اوي علي الاقل يشيل شويه من علي قلبي ا ب ت ث ج ح خ

ازيكم عاملين اي ، امبارح كنت اول مره اعيط وانا جنب ماما ف المهم هي فضلت تقولي فيه اي و كده وانا م كنتش عايزه اقول ف قولتها اي سبب تاني و بعدين بدأت اخبي زعلي ده باني اضحك معاهم بس كان باين اوي أن فيه حاجه لاني كنت بضحك علي الفاضي حرفيا حتي اختي قالتلي انتي بتضحكي كده ليه و برضو لما بابا خبط رجله فيا غصب عنه روحت فاتحه في العياط ، ده اسمه اي ده

السلام عليكم و رحمة الله و بركاته.. مشكلة من نوع آخر بما انى كالعادة مميزة، عارفين فكرة انك بجد تاخد قرار انك تبدأ من جديد و كأن مفيش حاجة حصلت و تتعلم من اخطائك و تصلحها، كل ده محتاجة بس قرار، و العزيمة بتيجي بعدها سبحان الله.. من كام يوم لسه كنت بنهار صبج و ليل، و ضعيفة بشكل غير طبيعي،و مازلت ضعيفة برضو مش هنكر، أنا كل يوم كنت بموت من العياط و الوجع، بس المفروض ابدأ بقى و اعالج نفسي، مش هينفع اسيب كل الجروح دى تنزف لحد ما اتصفى، لما ممكن اروح لربنا و واحدة واحدة نصلح حاجة حاجة مش شرط كل حاجة مرة واحدة.. يتمنى من قلبي ان مفيش حد هيقع في كل الاخطاء اللى وقعتها، و لو وقعت قوم عادى و الله ما في حد هيقومك.. انا رغم كل ده ربنا مسابنيش و لسه محسن الي و ساترنى، خلونا نكسف على دمنا شوية و نحاول مش هيحصل غير كل خير، الوجع عند ربنا لما بيأدبنا على حاجة بيكون له لذة مختلفة❤️‍🩹🥀

يومي النهارده مكنش احسن حاجه بس الحمد لله بس حقيقي يومي النهارده مكنتش مرتاحه ولا مبسوطه زي اي يوم عارفه ان مش كل الأيام لازم ابق مبسوطه بس حقيقي مخنوقه اوي النهارده مواقف كتيره قفلتني ومكنتش طايقه حد واشخط ف اي حد قدامي أوقات بحس إني ضعيفه ومش عارفه أتصرف ولا المفروض اعمل ايه بحسني زي الطفله ال محتاجه احتواء بس وطبطبه حته العياط مبقتش بقدر اعيط مش فاهمه فيه ايه

عيطت من شوية كتير على حوار تافه يمكن عيطت بالشكل دا عشان بقالي شهرين مبكتش بجد انا مش شخصية نحس بس حسيت اني بقالي كتير اوي مسكة نفسي وبقول مش عايزة انكد عليا مش عايزة اضايق تاني لاني بجد يا جماعة بكره العياط جدا وبيتعبني وكل مرة بعيط لوقت متأخر بحس اني بخسر جزء من نفسي بس حسه بعدها اني بقيت احسن وفكرت بشكل افضل وادركت انه كان حوار غبي😭

انا بيجي على اوقات ببقى بعيط من غير سبب للعياط بس في حاجات كتيره حصلتلي خلتني لما اعدي على نفس المواقف أو تتكرر نفس المواقف مقدرش امسك نفسي واعيط يعني في العادي قبل كده كنت مبعيطش غير لوحدي بعيد عن اي حد دلوقتي بقيت من اقل موقف ابقى عايزه اعيط و فعلاً بعيط من غير ما اقدر امسك نفسي قدام الكل و في حاجه عايز اقولها بعيدا عن الموضوع انا راجعه مش في المود هل أسهر و اتغدى و افك شويه ولا لأ لإني فعلاً حاسه أنه مش لازم و انام على طول مش قادره اعمل حاجه

هفضفض بس مش اكتر كنت مخوقه وستيل بس اقل شويه منغير سبب مفيش اي حاجه حصلت المهم كنت رايحه اغسل وشي دوخت جامد اوي وحسيت بهبوط ولقيتني بعيط منغير سبب معرفش حصلي كده ليه وانا اصلا مخنوقه من ايه دلوقتي اهدى شويه بس لسه حاسه بخنقه وكنت فاكره ان لو حكيت لحد قريب مني هبقى كويسه المهم حكيت بس محدش فهم وبردو لسه زي ما انا

اوقات كتيره وبقا معظم وقتي او كل وقتي بقيت بحس اني قرفانه من البشر والناس وكل حاجه حواليا ومش طايقه حد حرفياً بقا عندي اشمئزاز من اي شخص برجلين بقيت عصبيه اكتر من الاول بس ف نفس الوقت بارده بقيت بنفعل ع اي حاجه بس بارده فيها بردو معرفش هل دا طبيعي ال انا فيه ولا ايه...حقيقي مخنوقه من البشر بقضي يومي كدا عشان ممسكش حد اعجنو واطلع كبتي فيه..بقا عندي ارق..مبقتش مركزه..بنسا كتير اوي..حاسه جوايا كتير مكتوم وحاسه ب حاجه كبيره كاتمه ع قلبي اكترها عياط مش قادره اخرجو اتغيرت اوي ف حته العياط بقيت كتومه ومبعرفش اعيط خالص زعلانه من حاجات كتيره واولها نفسي زعلانه ع نفسي النهارده ماشيه ف الشارع حسيت عايزه اعيط وعيني دمعت حسيت محتاجه طبطبه حسيت ب حاجات كتيره اولها ليه احس اني عايزه اعيط ف الشارع وسط الناس مع اني عمري ما عيطت قدام حد ولا بينتلهم ضعفي انا تايها ونفسي افهم السبب..حاسه اني لوحدي اللي كدا

بصوا هو هتلاقوا الكلام م متناسق بس انا جوايا تعب مش متناهي حرفيا تعبت مامتي تعباني بطريقه فظيعه ومشاكل بيت اوفر وحصل حاجه كده من فتره وقعتني اكتر من الي انا فيه حرفيا شاطره جدا حاليا في فتره امتحانات وم بفتح كتاب عياط ٢٤ ساعه ونوم ٢٤ ساعه طبعا امي كل يوم تزود عليا دي غير اني اصلا معنديش صحاب لاني رافضاهم ممكن واحده ودي بكتيره كلامنا شات نفسي افوق من الي انا فيه دي حسه اني خلاص

بالنسبالي العياط بيحل كل حاجه زعلانه مدايقه مخنوقه بعيط وكل حاجه بتتحل بعدها بحاول اهدي نفسي الاول بأي شكل وبعد كدا احل الحاجه دي موش عارفه بحس نص المشاكل هتنحل لو عيط بس للاسف دا بيستنزف كل طاقتي وبيخلصها اينعم بعرف بعدها احل المشكله بهدوء بس بحس اني مرهقه في التفكير انا عصبيه جدا ودي حاجه بحاول اهديها بالعياط ...

النهاردة اتحطيت ف موقف محرج ومؤلم اوي كان الاستاذ بيقول درجات امتحان الفيزيا بتاع الشهر اللي فات ف كان بينادي الاسامي ويقول الدرجات ف ماشاءالله اللهم بارك الفصل كله جايب فوق ال 7 من 9 لكن للاسف لما قال فلانه اللي هي انا 5.5 من 9 ف قال فين فلانه وقعد يقولي لي كده و م لي كده قدام الفصل كل وانا كنت محرجه جدااا وماسكه دموعي بالعافيه حسيت اني افشل واحده عل الكوكب مش قادره اتخطي نظرته ليا ولا صوت بنات كانو بيضحكو عليا ورا قلبي واجعني ومش قادره ابطل عياط من ساعتها انا مستوايا م وحش اوي كده انا كنت جايبه ف التاريخ 8.5 من 9 و ف الكيميا 9 من 9 بس النهاردة حسيت اني فاشله جدااا وفقدت الشغف وحاسه بخنقه ووجع ونغزه ف قلبي م قادره اوقف عياط

هو الحوار شبه غريب او مش مفهوم الي هو هل انا الي فيا حاجه ولا هما فعلا وحشين من فتره نزلت بوست اني مش عارفه اتاقلم مع بنات جيلي خالص واني ملقتش واحده بس فيهم سالكه ممكن واحده بالظبط الي شوفتها في حياتي كلها بس مش من نفس البلد بتاعتي المهم لما بقعد اراجع كل حاجه فعلا انا مش يبقى غلطت في حاجه في اي تعامل مع حد مع العلم انا من النوع الي بيعترف بغلطه عادي جدا فالي هو اي بجد. عايزه اقولكم اني بقيت بكره انزل اي حاجه هما فيها ودي علي الدفعه كلها بقيت بشوف كتل نفاق وانانيه بس ماشيه قدامي بتخنق منهم لدرجه العياط

كنت قاعدة عادي بقرأ وبعدين مسكت الفون شويه بكلم واحدة من صحابي فجأءة لقيتني تايهة حسيت ان انا م ف مكاني الصح حسيت أن ده مش انا قفلت الفون وبصيت بعيني بعيد ع الاقي ولا حاجة انا قاعدة ف اوضتي اللي فيها رسوماتي المرعبة اللي بصالي اللي مش باين منها غير عنيها ع الاوضه مضلمة والرسومات كلها بالاسود الا العيون ببص لقيت نفسي لوحدي مش بخرج ومش عايزة اخرج مش عايزة اسافر مش عايزة انزل جيم مش عايزة انام مش عايزة حتي اشرب أو أكل مش عايزة اعمل حاجة عايزة بس اقعد ابص للسقف واعيط واطلع كبت سنين تبا

انا نفسي اعيط بجد نفسي افضل اعيط كتييير جدا زي زمان عادي ولكن انا مش عارفة العياك مبقاش بيكمل تلت ثواني بمجرد ما عيني تدمع كل حاجه بتنتهي ده غير اني بقيت اخاف من صوت العياط وده بخليني اوقف اسرع قبل كده جبت توكة ولسعتها فوجعتني ومع ذلك بردو العياط مكنش موجود حد عنده حل

انا أعجبت بشخص ومع الوقت حبيته وكان بينا هزار وضحك وانا لاحظت انه مش بيهزر مع البنات في المحيط الي انا معاه فيه وللأسف اتعلقت بيه وانا مع العلم ان مفيش بينا اي حاجه بينا غير هزار ولا حتى في شات او اي حاجه من الحجات دي بس للاسف هو مشي من الماكن الوحيد الي كننا بنشوف بعض فيه بعد ما حبيته من كل قلبي وهو مكنش بيبدلني المشاعر دي خالص بس حسيت انه ببعملني بطريقه مختلفه عن باقي البنات وانا حاليا زعلانه جداا انه مشي وقلبي مكسور وكل يوم عياط عليه مع انه عمره ما حبني اصلا

عايزة اعيط بطريقة مش طبيعية حاسة كمية هموم و وجع في قلبي حتي الشغل اللي بشغل نفسي بيه علشان ما افكرش بقي هو سبب في عياطي و زعلي دلوقتي مش قادره حتي اعمل حاجة قاعدة سرحانة و مش قادره ابص حتي قلبي واجعني حاسة اني حاسة اني غبية بس ديه اول مرة اشتغل و حاجة مش بفهم فيها ولا من اهتماماتي حتي ولا ليها علاقة بمجال شغلي انا تعبت والله من كتير ما بتنقل بس انا والله بعرف عادي و بشتغل عادي مش غبية يعني

للمرة المليون أنا عندي مشكلة وبنفر من الناس اللي بيهون عليها عياط حد قدامها، مش بس عشان أنا شخصية إيمشنول موت بس أزاي فيه ناس لما تدخل في جدال توصل الشخص لغرغرة العين ورجة الصوت، وتفضل مكملة عادي! أنا بكره طبع القسوة والجمود وبنفر من قساة القلوب ، الحنية بالنسبة ليا مش أوبشن ألاقيها ف الشخص الا بتعامل معاه أو لأ عشان أي حد مش حنين ف الطبع والمعاملة مستحيل يكون ف حياتي مش عشان أنا طول الوقت محاطة بالحنية والإهتمام الحمد لله يعني بس ولكن عشان بحس أي حد قاسي أين كانت ظروفه إنسان مش طبيعي الله يعافينا آمين وعشان كدة دعوتي الثابتة إن ربنا يصرف عني قساة القلوب وفظاظة الكلمة وربنا يعافي الناس جميعا من الابتلاء دا )" 🫠🦆

حبيته اوووي ليه يعمل كدا فيا حبيته خالص ليه يبعد ليه انا عملت اي غلط انا كونت بحاول عشان ميبعدش عني ليه حصل كدا انا مش قدرها اصدق شوفت حلم انه بيعد عني مصدقتش لاقيته بعد عنييي ليهههه بيحصل كدا معايا انا قلبي وجعني اوووي مش قدرها ابطل عياط 💔😭😭😭😭😭😭😭😭😭😭

لسه برضه مش عارفه اعيط خيانته ليا صعبت عليا كل حاجه حتى العياط و الصلاه ولا عارفه ارتاح بعياط و لا عارفه ارتاح بصلاه والله العظيم عارفه انه بياع و ميستاهلنيش و لا يستاهل زعلي بس انا زعلانه على نفسي و على حالي

اول عيد من غير تيتا حاسة مش قادرة اعدي او اتعامل مش عارفة افصل دماغي مش عارفة اوقف عياط بجد هي وحشيتني اوي بس مش قادرة اتقبل بجد موجوعة اوي مكنش فيه غيرها مش عارفة ابقي كويسة بجد انا بكره الفقد بكل انواعه عارفة انه سنة الحياة بس مش عارفة اتعامل 💔

اول مرة اقول ده معرفش اصلا اذا كان يصحلي اقول ده ولا لا بس انا زعلانه من ربنا اوي ومن نفسي كمان ان كل يوم بعيط دلوقتي بعيط ربنا انعم عليا بكل حاجة ممكن احتاجها ربنا حط قدامي كل حاجة توريني انا هبقا اي لو مستغلتش اللي عندي صح فبقيت طول الوقت خايفة انا دلوقتي خايفة في الحقيقة انا تالتة ثانوي بذاكر و بدعي بس خايفة خايفة جدا بقول يمكن لو معنديش كل المؤهلات اللي تخليني اوصل الموضوع كان هيبقا احسن مش هاحس بالذنب علي الأقل لو موصلتش ازاي موصلش وانا اهلي مقدمين ليا كل حاجة ازاي موصلش وانا الذكية المجتهدة ازاي وانا بسعي وببذل كل طاقتي يمكن مش نصيبي؟ ازاي مش نصيبي و حبي للطريق ده مدفون في قلبي مش ربنا لو زرع جوانا حب لشئ معناه اننا نقدر نوصله كل يوم بعاني مع الافكار دي كل يوم بعيط من فكرة اني موصلش وبين ان ربنا ينجيني و اوصل هي نجاة من ربنا بس نجاة