السلام عليكم اولا قبل اي شيء ادعولي يا جماعة ربنا يفك كربي وحالي يتحسن -- ممكن اعرف بتتعاملوا ازاي لما حالكم يتقلب؟ يعني انا حالي بقا بشع بشع بشع، عمري في حياتي ما وصلت لكده فعلا، انا طالبة طب ف سنة اولى، وكنت على مدار ١٢ سنة اللي فاتوا متفوقة موت وبعرف احفظ كويس وذاكرتي كويسة وكل حاجة فيا كانت تحفة فعلا، اول ما دخلت الجامعة مش عارفه احفظ وبنسى بشكل متخلف ورحت كشفت وكان عندي انيميا ونقص زنك، جماعة بعيدا عن اي شيء الضغط النفسي اللي انا فيه صعب انا بقيت اعيط كل شوية بشكل هستيري وفجأة، امبارح عيطت في العربية لمجرد بس اني افتكرت حالي بقا عامل ازاي انا بجد زعلانه اوي على نفسي ومش عارفه اعمل ايه؟ اللي عنده اي نصيحة بالله يقول، الوقت ضيق والامتحانات بعد شهر بالضبط والكمية بجد كبيرة وانا مش عارفه احفظ ، امبارح كان عليا امتحان حرفيا عكيت فيه كل معلوماتي نسيتها ده غير ان اصلا امتحانات الموديول الاول والتاني اللي امتحنتهم من ٣ اسابيع وكنت عاكه فيهم برضو علشان نسيت لسه مأثره فيا وانا محتاجة اعوض فعلا في اللي جاي فهل حد عنده نصيحة؟ + ادعولي بالله بالله ادعولي ومتنسونيش من دعواتكم.
2 زي ما قولت بقولك تاني ذاكري بذكاء واسألي الدفعات الأكبر منك من أين تؤكل الكتف عشان متحرقيش ف الفاضي وتلاقيه كل هباء ويبنتي مهما كانت النتيجة ارضي بيها وقولي الحمدلله و الله يمين من واحد كان ف نفس موقفك من ٣ سنين الوضع هيتعدل مش هيفضل كدا استعيني بالله وخدي بالنصايح الي الناس الأكبر منك هيدوهالك واعملي بيها ومهما كانت النتيجة متزعليش من حاجه كليتنا دي بتكسر اى دحيح وعاوزة واحد واعي مش واحد حفيظ بس وانا ممكن مش احسن حد ينصح يعني لكن لو احتجتي نصيحة ف حاجه انا موجود ربنا معاكي ي رب و يوفقك ويعينك
اعملي كل ال عليكي عافري و سيبي الباقي علي ربنا اصل هتعملي ايه يعني ؟ اعملي ال عليكي و خلصت + كلي كويس
1ربنا يعينك يبنتي ويوفقك الأول الي أنت فيه دا انا نفسي مريت بيه بتبقى تنين مجنح طول سنين تعليمك ولما بتدخل كليتنا دي بتلاقي نفسك مستواك أقل من الطبيعي هي حاجه اسمها imposter syndrome انت حاسة انك دخلتي مكان غلط وكدا لكن صدقيني اغلبنا بنكون كدا ف الأول انا نفسي مش عكيت انا نيلت الدنيا ف سنة اولى فمتقلقيش انت تمام والله وزي الفل والعيب مش عليكي عامة العيب ع النظام العقيم الي كنا بندرس فيه ف ثانوي انك مش لازم تحفظ وافهم بس وللأسف كليتنا دي محتاجه حد بيصم مش بيحفظ هتتعودي وتتأقلمي والدنيا هتمشي والله بس انت هوني على نفسك شوية وافتكري بس انك مطالبة بالسعي وخليكي واعية انت محتاجة بس تعرفي الدرجة بتتجاب ازاي هتلاقي ف مواد تتبصمج مواد تتفهم حلي كتير قبل الامتحان النظام عندنا ف الكلية صعب ومحتاج حد بيذاكر بذكاء مش بجهد وخديها مني انا ف رابعه دلوقت اول سنة ما هي إلا انك هتفهمي فيها الوضع عامل ازاى حاولي تطلعي منها بأقل الخسائر ومن كلامك شكلك اول حد ف عيلتك يدخل وانا بردو مجرب الحوار دا انك تبقى داخل ع المجهول مفيش حد يوجهك انت يمكن بتنسي شوية ويمكن مش بتنسي اصلا بس انت مركزة مع نفسك زيادة
عودي نفسك عشان تحفظي اي حاجه تمسكي ورقة وقلم تقعدي تكتبي دي اكتر طريقة فعالة ف الحفظ وتكرري الموضوع ع فترات متباعدة مثلا حفظتي حاجة الصبح راجعيها مرة بالليل ومرة بعد يومين ومرة بعد أسبوع انا عارف ان الحوار يكاد يكون مستحيل مفيش وقت للكلام دا بس انا بتكلم عن الحاجات الي مينفعش تتنسي ف مش كل حاجه هتتحفظ حاولي تستوعبي المعلومة و تصيغيها بطريقتك و تحفظي بس الأجزاء المهمة شوفي انهي مواد ف الموديول عليها درجات اكبر اهتمي بيها طبعا الأول و بردو متنسيش المواد الصغيرة لان قدام هتلاقيها جمعت درجات معاكي
ربنا يفك كربك و يشفيكي شفاء تاما باذن الله