انا مش عارف هو هنا مساحة امنه فعلا ولا لا.. بس انا هقول اللى عايز اقوله ومش مهم بعد كده انا فى حاجات كتير ملخبطانى بس للاسف انا مبحبش اتكلم بوضوح عن اى حاجه او مش عايز اعمل مشكله لو اتكلمت شغلى متلخبط وبدور ع شغل ثابت مش لاقى مش مرتاح ف بيتى وبعد ماكنت مرتاح جدا ومبسوط مش عارف ايه اللى حصل الدنيا اتقلبت مرة واحدة بقينا نتخانق ع اتفه حاجة وكل شويه تقولى انا مبقتش مستحملة العيشة و مش طايقاك وكلام من ده مع ان والله لا بشتم ولا بمد ايدى ولا حتى بتعصب لكن انا احيانا لما بدايق بقول كلام ينرفز عادى زى اى حد خلقه ربنا الاول كنت بقدر امسك نفسى واسكت ومن كتر الضغط بقيت مبقدرش اتحكم ف نفسى وبتكلم احيانا بتقعد تغلط وتعلى صوتها وتزعق بس بسكت ومبرضاش ارد بكتفى انى ببص كده بصه تخليها متنطقش تانى لكن انا بسكت مع ان بيكون جوايا بركان والله لو انفجر يبوظ الدنيا بس بسكت بخاف ع بيتى ومش عايز الامور تسوء ونوصل ان حد ييجى يدخل مابينا ويصلح لان لو مشكلتنا خرجت بره بيتنا يبقى مستحيل ترجع بيتى تانى انا كمان عندى مولود عنده كام شهر مش مهم ولد ولا بنت المهم اننا متعلقين ببعض قوى وبيتغير من تعلقنا ببعض والله فى حاجات تانية كتير بس انا مش عايز اقول اكتر من كده هو بس سؤالى هل انا كده صح ولا اخد موقف وازعق واتنرفز زى ماهى بتعمل؟ هى بتضايق ان مبتاخدش حق ولا باطل معايا لما بسكت، اتكلم طيب واديها حقها ع دماغها ولا اعمل ايه؟؟ انا بس نفسى بيتى يرجع زى زمان 😞 معلش الناس الظريفة اللى بتستخف انا مش عايز حد يتكلم ولا عايز نصيحة منهم اللى عنده حاجه كويسة يقولها اللى معندوش يسكت انا مجرد انى بفضفض بس مش اكتر..
التوتر والقلق وممكن اكتئاب بعد الولاده والموضوع متعالجش وقلة نوم ليها بسبب الطفل وامور كتير اوي ممكن تكون سبب دا ف هي محتاجة حد يبقى شايف دا ومقدره جدا ... حضراتكم محتاجين قعدة جاده تقعدوا سوا تتناقشوا على ايه اللي حصل وايه الاسباب اللي مضيقاها...وتتناقشوا في اسلوب وطريقة الخلاف مع بعض مينفعش ابدا هي تشتم وتزعق وكذلك انت بردوا مينفعش دا يحصل ابدا منك اتفقوا على اسلوب وطريقة للخناق لان كل البيوت بتتخانق عادي المهم الخناقة ميحصلش فيه حاجات تخلي النفوس والناس تكره بعض
هي تقريبا عندها اكتئاب ما بعد الولادة وهرمونات متلخبطة هو عموما الست محتاجة اللي ميركزش مع تصرفاتها وياخدها دايما علي محمل الجد لانها في فترات تصرفاتها بتبقي عاطفية اكتر من عقلية فاعتقد تصرفاتها الفترة دي من الاكتئاب واللخبطة والتوتر والهرمونات لذلك الراجل هو اللي بيبقي اكثر عقلا من المرأة عموما في حاجات بسيطة هتخليها تهدي وترجع زي الاول انك تجيب حاجات بتحبها ورد شوكولاته حاجات في ال skincare انك تخرجها تشيل عنها البيبي شوي تساعدها في البيت ولو اي حاجة بسيطة بس علشان تعرف اهتمامك ليها في الفترة دي وانك مقدر مشاعرها ولخبطتها وحقيقي اكتر فترة هي محتاجاك فيها ومحتاجة انك تدعمها نفسيا لحد ما تعدي وتتعود علي وجود بيبي ودايما وانت في الشغل او برا رن عليها واهتم بيها بالكلام
لازم تجيها قصادك وتتكلم معاها وايه اللي مضايقها من غير ماتحكم عليها أو تحاول تصلحها. هيا عايزاك تسمعها الاول
لازم تعيش غضبك وتتنرفز عادي واوعى تجرح بالكلام. اهم حاجة في الجواز واهم من الجواز ذات نفسه هو التواصل لازم تتخانقوا وتتكلموا وكل واحد يقول ايه اللي جواه عشان تعرفوا تتواصلوا وتفهم ا بعض
متهيألي انك لازم تدرك ان المولود الجديد بيغير من البيت و بيوتركوا انتو الاتنين