كنت عايز اقول تخيل في دماغي كده كان ريحني شوية اتمنى يساعد او يريح حد تاني برضه تخيل انك رايح مكان معين مثلا ومش معاك gps ف حد قالك قبل ما تبدأ تروح المكان قالك هتخش تمشي يمين في شمال في تاني يمين مثلا او ايا كانت السكة يعني ، بس هي كانت سكة معقدة وصعبة ومليانة ألم ومجهود ف انتا وانتا ماشي، فيه اللي ذاكرته كويسة و هيفتكر كل كلمة اتقالتله وفيه اللي مش هيقدر يفتكر، ف بيقعد يفكر نفسه كل شوية يمين في شمال في تاني يمين يمين في شمال في تاني يمين.... يفضل كده لحد ما يا اما يوصل المكان اللي هو عايزه او يتوه، او ينسى اصلا ف هيلاقي نفسه مضطر يسأل حد تاني على السكة، فيه اللي هيفيده و فيه اللي هيتوهه اكتر من المكان اللي كان عايز يروحه، يا اما بيتوهه بجهل منه او لانه بيفتي، او لمجرد الأذية عامة ساعات ويا عالم عامة ممكن توصل المكان اللي عايز تروحه ولا لا الفكرة في الاخر انه ده شبه حياتي شوية او حياة اي حد بشكل ما انتا رايح مكان صعب طريقه ، صعب جدا لدرجة انك متعرفش اصلا فيه ناس بتوصل ولا لا فيه ناس على اول الطريق فيه اللي بينصحك صح، وفيه اللي بيقولك متحاولش تروح المكان اصلا عشان هتفشل، وفيه اللي بيقولك وليه تتعب نفسك اصلا اقعد هنا، وفيه اللي راح فعلا وبيحاول ينصحك عشان تنجح زيه انتا متعرفش مين اللي بياذيك اصلا ومين لأ ، يمكن اصلا محدش منهم كان عايز يأذيك بالمعنى الحرفي وكلهم في دماغهم انه بيفيدوك فعلا حتى لو كلامهم هيأذيك على المدى البعيد وانتا عشان تقدر تفرق بين الصح والغلط، وعشان تقدر تروح المكان منغير ما تتوه كتير و تضل عن الطريق اللي كان المفروض تمشي عليه، وعشان برضه تقدر ترجع نفسك للطريق الصح ومتفقدش الامل في نفسك انك توصل، وعشان تقدر تفكر نفسك كل شوية بالسكة عشان متنساش، وتتحكم في خوفك من انك تنسى و تلاقي نفسك نسيت فعلا من كتر خوفك من الضلال فيه اللي بيتوفرله كل الظروف اصلا انه ينجح ويوصل ومع ذلك بيتوه برضه، يا اما هو محاولش يا اما حاول فعلا وقدر ربنا انه يتوه محدش محمي من التوهان كل ده صعب، الحقيقة انه مش كلنا لينا نفس القدرات فيه حد عنده ذاكرة كويسة وقلب صافي انه يركز على طريقه بس وميشتتش نفسه في اي ملهيات عن الطريق، وفيه اللي بيكون كويس فعلا لكن قدره انه يشوف صعوبات تخلي المشي صعب عليه، وفيه اللي مش قادر اصلا وبيعتمد على غيره عشان يوصل من الاخر عادي انك تتوه، الطبيعي اصلا انك تتلهي بالمشتتات اللي حواليك مين فينا معصوم من الخطأ عامة، انتا مش غلطان و مش سيء للدرجة اللي تخليك متقدرش ترجع للطريق تاني تقدر ترجع طالما انتا عايش ، و ممكن ربنا يوفقك بولاد الحلال اللي يقدروا يساعدوك منغير ما تبذل مجهود كبير في انك ترجع، ممكن تلاقي حد رايح المكان بالصدفة وعرض عليك انه يوصلك معاه بعربية اغلبنا هيقع المهم انك متفقدش الامل في الرجوع او طالما مخسرتش أملك في نفسك او متكسرتش ف انتا لسة مخسرتش حتى لو مجرد بس انك بتحاول انك ترجع ده في حد ذاته نجاح