السلام عليكم انا اخوكم في الله عندي ٢٤ سنه مبحبش الشفقة من حد ومبحبش اصعب على حد عشان كده مبحبش احكي حاجه عني نهائي بس انا بجد محتاج افضفض انا عايش جوه صراع نفسي ( بيني وبين دماغي فقط)محدش تاني حاسس بيا ، أنا كنت مرتبط ببنت حوالي 5 سنين، وحصل بينا تجاوزات كبيرة، وبعد فترة طويلة من المشاكل قررنا نبعد عن بعض. بعد ما سيبنا بعض كنت متدمر نفسيًا وموجوع جدًا. في الفترة دي اتعرفت بالصدفة على بنت محترمة جدًا ومنتقبة، أصغر مني بـ6 سنين تقريبًا، لكن كانت ناضجة وأخلاقها عالية، وحسيت معاها باحترام وراحة واهتمام كنت محتاجهم. شوفتها رؤية شرعية وبعدها خطبتها بحضور أهلي. البنت دي كانت مخطوبة قبل كده لشخص كانت بتحبه، لكن الخطوبة انتهت بسرعة واتوجعت جدًا، وبعدها قدرت تتجاوز الموضوع بإيمانها وصبرها. بعد ما خطبتها بفترة قصيرة، الإكس عرفت إني خطبت، فكلمت أهلي وقالتلهم إن كان بينا علاقة كاملة قبل ما نسيب بعض. أهلي اتخضوا جدًا وخافوا من المشاكل اللي ممكن تحصل، وكان رأيهم إني أسيب خطيبتي الجديدة وأرجع أخطب الإكس وأتجوزها. أنا مكنتش عايز أسيب خطيبتي الجديدة، لكن تحت ضغط أهلي وظروف الموضوع سبتها بعد أقل من أسبوعين خطوبة، ورجعت خطبت الإكس. اللي واجعني لحد دلوقتي إن البنت دي مكانش ليها أي ذنب، واتكسرت للمرة التانية في حياتها بنفس الطريقة تقريبًا. ولسه فاكر كلام كانت بتقوله إن أسهل حاجة تتعافى منها لما حد يظلمك أو يسيء ليك، لكن الأصعب لما حد كويس في نظرك يبعد فجأة من غير سبب يخصك. عدى أكتر من 6 شهور على اللي حصل، لكن أنا لسه موجوع جدًا. أي حاجة تفكرني بيها بتوجعني، حتى لو شفت بنت منتقبة أو سمعت اسمها بالصدفة. بقيت حاسس إن حياتي فقدت الشغف والطعم. أنا بدعيلها دايمًا بالخير والنجاح، خصوصًا إنها كانت في الثانوية الأزهرية، وفي نفس الوقت عايش في صراع: هل كان المفروض أتمسك بيها مهما حصل؟ ولا اللي عملته كان الصح بسبب الظروف والمشكلة اللي كانت مع الإكس؟ أكتر حاجة مأكلاني من جوا إني حاسس إني ظلمتها وكسرت قلب إنسانة محترمة ملهاش أي ذنب، وبحاسب نفسي على أخطاء الماضي وحاسس إن كل الوجع اللي أنا فيه دلوقتي هو تمن الغلط ده. (و اخر حاجه ، انا عارف ان ربنا كتبلها أنها تبعد عني عشان هي تستاهل حد احسن مني مليون مره 😭 إنما انا شخص وسخ و استاهل الوسخ اللي زيي ، شعوري اني وحش و استاهل الوحش دي بيوجعني اوي أقسم بالله انا طول عمري ابن ناس وشخص متعلم تعليم عالي في أعلى الجامعات و من صغري بتشغل و شقيان عشان انا ولدي متوفي بس هي غلطة غلطها زمان ايام المراهقه وبدفع تمانها من وجع قلب دلوقتي اسف يارب )
بص هو النصيب و كل حاجه بس بص للموضوع من ناحيه تانيه تخيل لو كنت اتجوزت البنت التانيه و الاكس جت و عرفتها كل حاجه اعتقد كانت هتتوجع اكتر لو كنت جوزها مش خطيبها ، قضا اخف من قضا ربنا في قسوته رحمه لكن مش حاسين بيها سيبها لله و ارحم نفسك و دماغك كل ابن ادم خطاء وانت دفعت تمن غلطك توب و خلاص و صدقني علي اد صبرك ربنا هيعوضك
ربنا يعوضك خير و تبدأ حياة احسن بس انا اكتر حاجه فرحتني بصراحه موقف اهلك انهم اختاروا الستر للبنت الأولي موقف محترم جدا منهم بصراحه