انا محتاجة أحكى عارفة انى هتعرض للتنظير😅بس انا فعلا محتاجة اتكلم،من ١٠ ايام قررت ادخل آبلكيشن زواج إس.لا.مى بعلم ماما"بابا متوفى" دخلت كتبت معلوماتى وكام جملة عن قناعاتى والمواصفات الى بتمناها،المهم ان في ناس بتبان فايك من اول لحظة، لكن في شخص كان حاطط صورته شكله كان مقبول بالنسبالى وهو الى بعتلى،طريقة كلامه كانت مريحة واعجب بطريقة تفكيري، المهم انه برا مصر ف بعد م اتكلمنا شوية كتير قالى ان السبت الى هو "اول امبارح" دا هينزل وممته هتكلم ماما وهنعمل رؤية شرعية لانى منتقبة،طلب يكلم ماما كلمها ف نفس اليوم الى اتعرفنا فيه ع بعض اخد رقم موبايلها وهو شرحلها كل حاجة وهى كانت مستعجبة هو ازاى فهمنى كدا كانت بتقوله كأنك بتقرأ من كتاب وان بنتي فيها كل شئ ممكن تتمناه،المهم قالها معلوماته وعنوان بيته وظروف شغله واسم عيلته مكانش في شئ مريب،واحنا كنا بنتكلم فالاول مش كتير من باب نعرف بعض اكتر كدا كدا كلها اسبوع وهيجي البيت،انا مش معقدة بس بتعامل بالحلال والحرام هتقولولى ازاى بتقولى كدا وداخلة ابلكيشن زى دا. هقولكم من قلة الحيلة يا جماعة لما تبقى بنت تستاهل كل حاجة حلوة بشهادة الى حواليكي وان مش ناقصك حاجة وانتى عارفة قيمة نفسك لكن مش لاقية الشخص المناسب ليكي ف جواز الصالونات رغم ان المعروض كتير لكن مفيش حد مناسب،ومع انتظار الشخص المناسب بقيت ٣١ سنة، المهم ان الشخص دا حسسنى انى فاهمنى وانى طفلةو رغم انى كنت طول الوقت متشككة ف كلامه مش بصدق بسهولة لكن كنت بقول يمكن يكون صادق وهو كمان مقابلش الى بيتمناه ف جواز الصالونات ع كلامه،هو زى م ماما كانت بتقول كان بيتكلم عنى كأنه بيتعامل معايا من زمان واه بعتلى كذا صورة له وبعتلى اللايف لوكيشن بتاعه فالبلد الى هو فيها، ع اد م كان لطيف وحاسة انه فاهمنى وبيعاملنى انى بنت رقيقة وانى طفلة وانى حسيت ان في شخص شايفني صح لكن فنفس الوقت كان بيضغط اعصابي بطريقة مفهمتش كان بيعملها ازاى مثال اننا واحنا بنتكلم هو عايز يتعامل اننا مرتبطين ف يبعتلى شعر حب بصوته او يناديني بلقب زى المرتبطين فانا كنت بعترض وان دا حرام وانا اجنبية عنك فكان بيقلب عليا الطربيزة، وصلنا مرة انه اضايق جدا ف مسح الشات من عندى وعنده لانى قولتله انك تتكلم عن مشاعر حب من دلوقتي ممكن يكون فراغ عاطفى ودا شئ مخوفني،المهم قالى خلاص مش هنتكلم وانا هثبتلك انى مش بلعب وكلم ماما يشتكيلها منى وانه حاسس بالعجز مش عارف يطمنى ازاى لحد م ينزل، انا مكنتش ببعتله ابدا لما كان هو بيبعت كنت برد وبحاول اختصر لحد مرة بعتلى فويس طويل انه بيحب نفسه كدا ومش عايز حد يغيره وان الى يقبله يقبله زى م هو،ولما حاولت افهمه انى مش بحاول اغيره انا بس بحط حدود،هو قالى انتى المفروض تحترمي رجولتى وتفهمى انى اناالى المفروض اعمل كدا دا دوري وانتى جواكي خوف انا ماليش ذنب فيه وانتى بتتوتري ف شوفى نفسك هتقبليني زى ماانا ولالا،نا فاللحظة دى حسيت انى عملت حاجة غلط ودخلت فحالة خوف الا اكون بخسر الشخص الصح الى فخيالى وان هو كمان كان مستني حد ف خياله رغم انه خطب مرتين بس هو ملقاش الى بيتمناه الا فيا. ايوا انا عارفة انى هبلة انى صدقت خصوصا انه اصلا مشافنيش لانى منتقبة مشافش حتى صورة بالنقاب ع اساس هيجي البيت..المهم انى حسيت انه ممكن ينهى الموضوع ومعرفش ليه دخلت فحالة panic متستغربوش انا وصلت لمرحلة انى كنت بخاف اكتب كلمة تضايقه لانه بيفضل يعلق ويسمك فالكلمة لحد م يخليني اتوتر جدا ف خوفت ابوظ الموضوع، ماما دخلت عليا لقت وشى اصفر قالتلى انا هكلمه فهو وماما اتكلمو كتير وبعدين جه صالحنى وقالى انا كنت بهددك بس لكن انا عمري م هسيبك من وقتها انا حسيت بحالة مش طبيعية لدرجة انى قولت لماما شكلى بقيت شكاكة وبسبب ضربات قلبي دى محتاجة اخد مهدئ،هو فهمنى انه قال لاهله بس مقالش اننا اتعرفنا ع ابلكيشن لا قالهم انى صاحبة مرات واحد صاحبه عشان عقليتهم مش هتتقبل فكرة الابلكيشن لكن هو مقتنع.المهم مرة بفتح الشات لقيته باعتلى جملة يمكن مش صعبة بالنسبة لناس كتير لكن بالنسبالى كان فيها تجاوز فالوضع الطبيعي كنت هزقته لكن حاولت اتعامل براحة وقولته ي فولان انا مبحبش نوعية الهزار دى قالى اى حاجة مش هتحبيها اكيد مش هعملها لكن برضو كنت مضايقة وكان باين ع طريقة كلامى فقالى مالك قولتله بصراحة لسة مضايقة من طريقة الهزار دى ف المهم قلب الطربيزة عليا تانى واول م بيعمل كدا ضربات قلبي بتزيد ونفسي بيروح قولتله انا مش قادرة اكمل كلام انا هقفل،قعد يبعتلى حقك عليا ويتصل ع الابلكيشن كتير لدرجة انى قفلت النت الكلام دا كان يوم الحمعة وكنت مقررة مش هكمل والشخص دا متلاعب وقولت لماما صحيت الصبح لغيت الاكونت رغم انى كنت ممكن استنى لان كان خلاص نازل يوم السبت بس انا مكنتش عايزاه يعنى كنت قفلت الموضوع،لقيته بيتصل بماما بيقولها فولانة كويسة؟؟قالتله اكيد لا وهزقته ع تجاوزه معايا وكانت هتنهى الموضوع،وراحت كملت كلام معاه بعيد عنى انا اول م رن التوتر مسكنى تانى المهم قعد يقسم كتير انه مش قصده وانه عارف قيمتي ومش عايز غيري يربي ولاده.. ماماقالتلى هو هيتصل بعد ساعة واسمعيه انا مكنتش عايزة اتكلم معاه لكن قالتلى ادى نفسك فرصة المهم رديت لمااتصل وهو عرف يستوعبني وكانت طيارته لمصر خلاص قربت قالى هستناكى تبعتيلى حمدلله ع السلامة لما بعتله كان وصل مصر، بعتلى صورة له فالمطار قالى اتصورتها عشانك وانه مبسوط ان اخيرا انا وهو ف بلد واحدة وهيشوفني وان دى كأنها اول اجازة ليه انه مبسوط اوى انه عمره م هيضيعني ولا هيسيبني انا ابوظ العلاقة دي،فضل يكلمنى عن تفاصيل الخطوبة وفجاة واحنا بنتكلم هو مبقاش بيشوف الرسايل ولابيرد لا عمل بلوك كنا بنتكلم تل.جر،ام اختفى فجأة قولت يمكن الموبايل فصل بس فات امبارح والنهاردة مبعتش وهو كان قايل لماما اول م ينزل ممته هتكلمنا ،اى لزمة كل الى حصل دا ايه لزمة الحبكة الدرامية دى،غير انى شاكة ان الصور والملعومات مش بتاعته، داانا كنت بقوله ان بابا متوفى من كذا سنة ومن وقتها وانا بخاف اتوجع قالى بيني وبينك ربنا 😅