لو مفيش حد يحكم عليا كان زماني بقيت الانسانه تقريبا اللي عايزه اكونها من بدري .. كنت هغلط كتير جدا مش هنكر ده لاني مش كامله زي ما ابويا دايما عايز يشوفي من غير اخطاء وانا عايشه بالقناع ده دايما وده مرهق جدا ومش بيوصل لاي حاجه عموما .. لو مفيش حد يحكم عليا كنت هقع واقوم ومش هتكسف من غلطاتي عشان هي جزء مني وجزء من اني اكون احسن بعدين كنت هعيش حياه احسن من غير خوف ومن غير ما افكر ازاي اعيش جمب الحيط طول الوقت عشان اتجنب ان ابويا يثور عليا ويكسرني بعنفه اللي كان بيمارسه عليا طول سنين عمري من وانا صغيره .. لدرجة ان في جملة محفوره ف دماغي من وانا صغيره قالهالي وانا ماشيه معاه ف يوم وخفت منه بجد انك لازم تخافي مني .. الكلام ده وانا طفله ودكتوري النفسي قالي اني خذت الكلام ده كانه اوردر من وقتها وانا بجد بخاف منه وعندي حق لانه ف كل خناقه كان بيتفنن ازاي يكون ابشع من المره اللي قبلها ابشع واسوء مره لما اجبرني انزل الشغل ٤ سنين مع مدير غير سوي كان بيعاملني وحش ومستغل ان ابويا جابرني علي الشغل ولما وقعت ف يوم من الاجهاد ورجلي اتكسرت وقعدت من شغلي شويه عشان اخف كان عايز ينزلني بالعافيه وافك الجبس لدرجة اني نزلت للدكتور بعد خناقه معاه وانه اتهجم عليا انا وامي وكسر الباب علينا نزلت للدكتور قالي مين قال ان ينفع تفكي الجبس ده بيهزر قولتله بابا الدكتور كان ف صدمه وكان عايز يكلم بابا يديله كلمتين ده موقف صغير من مواقفه معايا ده غير بخله عليا انا لو بابا مش موجود ف حياتي كان زماني بنت مختلفه تماما هو عدوي ف الحقيقه بس الواقع بيقول انه ابويا بس الاب مش بيعمل ف بنته كل اللي هو عمله معايا او مع امي لو انا من غير احكام ابويا مكنتش هبقي عايشه تعيسه انهارده بس هي مش شماعه لاني بحاول اكون مسؤله دلوقتي بس ده ملغاش جوايا كل اللي عمله معايا مهما كنت بعامله حاليا بشكل طيب عشان مش بعرف اكون غير كده