من حوالي 3 شهور عجبتني بنت في الشغل، وكانت محترمة جدًا، مؤدبة، ومحافظة، وملهاش أي تعاملات زيادة مع حد. خلال الفترة دي حسيت إن في قبول بينا في حدود الأدب والاحترام. اتكلمت مع صاحبي لأنه خاطب صاحبتها، وهي سألتها عن رأيها فيا، وقالت إنها موافقة وفرحانة. وبعدها اتأكد نفس الكلام مرة تانية، وإنها مستنية إني أروح أتكلم معاها. روحت فعلًا واتكلمت معاها بكل احترام، وقلت لها إني عايز التعارف يكون بعلم أهلها وبالطريقة اللي تريحهم، سواء من البداية أو بعد فترة تعارف محترمة. قالت لي: "سيبني أفكر، ولما أرجع من الإجازة هرد عليك." بعد ما رجعت من الإجازة بيومين قالت: "أنا آسفة، مفيش نصيب." بصراحة اللي محيرني مش الرفض، لأنه حقها، لكن اللي مش فاهمه هو إزاي كل المؤشرات كانت بتقول إنها موافقة، وفجأة كل حاجة اتغيرت. الحمد لله سمعتي كويسة وشغلي مستقر، وكنت داخل من الباب الصح وبكل احترام. دلوقتي بقينا بنتعامل في حدود الشغل، وكل واحد في قسم مختلف بس مش طايق اشوفها ولا اسمعها امال ليه للناس دي كلها حباه ومعجبه وعايزاه مش فاهم