انا حاسه ان الدنيا دي سيئة لأقصي درجة ، حاسه ان مافيش يوم قيامه اصلا ومافيش انتهاء للعالم مليارات ماتو وناس عايشه وغيرهم بيموت وناس بتتولد كل يوم لكن الحياة مستمرة طول العمر ، مافيش اي اشارة لاي انتهاء ابدا ، هو الانتهاء بس موت الشخص والحياة مستمرة عادي كل واحد بيموت بيشوف عمله ويتحاسب ويتسأل ويشوف مكانه جنه ولا نار بس كدا القيامه فين مش موجودة مش باينلها خالص ، مؤمنة بالآيات القرآنية وان دي حاجة علمها عند ربنا ، ومش كافرة ومش كل الكلام دا كله ، لكن فعلا مش باينلها ملامح ابدا احنا معذبين في الدنيا دي الواحد موجود فيها ومش عايز يكون موجود ومش عايز يكمل اصلا ،،ليه الواحد يكمل ويعيش وهو كدا كدا ميت ليه الواحد يسعي ويتعب ويعمل اللي ميتعملش وف الاخر هيموت ولو فجأة .. ليه اصلا كل دا ليه اصلا في الدايرة دي وجهاد نفس وكل الحوارات والمشاكل وكل دا اصلا فرح وحزن وألم وحاجات كتير ومعاناة من كل ناحية ونصبر ونصبر ، وعشان اي جنه ايوه اصلا اي الاستفادة اساسا من كل دا ، اوقات بحس بافكار حرفيا ايوه القيامة علمها عند ربنا بس فين مش باينلها اصلا، امتي ربنا هيكتفي ؟ ليه اصلا اتجوز واخلف ذرية تتعذب زي ما انا متعذبة ومش عايزة اصلا اكمل الحياة دي اساسا .. والعكس ليه اصلا كل دا كل حواليا قاعدين يتكلموا عن الموت ، بحس بجد الموضوع سيء جدا والواحد مش فرحان نذرة للدنيا بزهد اساسا ومش عايزها اصلا ومش عايز يثبت لحد ولا حتي لنفسه اي حاجة عايز يسيب كل المعارك دي كلها ويمشي جنه ولا نار مش فارقه .. مع ان من جوايا بحاول اعمل واجاهد نفسي ، بس بردو فين ! اكن الحياة دي مستمرة علي المدي البعيد والقريب الي ما لا نهاية بس نهايتها هو موت وبس ويجي غيرهم ناس ومليارات تموت ومليارات عايشين بردو مكملين في الحياة ، اكن الحياة دي ابدية ، ماشي علمها عند ربنا ، والواحد عارف الايات وماليش اني اسأل ومشغلش بالي واجابتها عند ربنا وهو المتحكم وانا مش بتعالي ولا عايزة انهيها انا ، بس ازاي ! امتي ربنا هيكتفي ؟ لحد امتي بحس ان ربنا مستمتع اصلا بالدنيا دي وبالناس دي كلها وحياتهم وابتلائتهم وصلاتهم وذكرهم ومش عايز اصلا دا ينتهي ، الواحد بكل اسف لربنا ولنفسه ولتفكيره ولو اسأت في التعبير بس فعلا انا دماغي هتموتني ، مكملة في حياتي وصابرة وبحاول استغفر ربنا وربنا يبعد عني الوساوس ، بس والله مش وساوس دا سؤال مهم كل اللي حواليا بيكفروني انا مؤمنة الحمدلله بالله وبكل حاجة ومسلمة وتمام ، بس بردو سؤال امتي ربنا هيكتفي ؟ ماشي ربنا عنده علم بس الواحد حاسس نهايته هي الموت بس وحياة مستمرة بردو ما زالت مستمرة وهتفضل مستمرة !!!!! مليارات يا عالم ماتوا ومليارات تانية عايشه علي مستوي العااااالم كله كله كله كله ايوه ربنا هيكتفي امتي !!
حبيبي عارفه انك متقصديش بس لازم نتكلم بطريقه احسن من كده عن ربنا صح مستعده ندخل نقاش انا وانتي عن سؤالك يلا بينا بس اول حاجه احب اذكرها اني معنديش العلم الديني الكافي اني اجاوبك بشكل احترافي وكافي ليكي ف احنا رغم نقاشنا لازم تتواصلي مع شيخ يكون ذو علم كافي أنه يقدر يجاوبك اجابه كامله بس بما اني بنت زي زيك تعالى نفكر بهدوء احنا اتولدنا علي دين الإسلام و من صغرنا كنا بنتسآل كتير عن فين ربنا ومين هو ربنا وواحده واحده بدأنا نقرء في المصحف ونعرف أن الإسلام هو دين الحق وأن الله هو الخالق سبحانه وتعالى وان فيه حكمه وراء كل شئ في الدنيا حتي ابسط الامور وكلنا مدركين أن النهاية هتكون هي القيامه اللي ربنا وعدنا بيها أنها هتكون بداية جديدة وهي الحياة الأبدية أنا فاهمة إحساسك واللي بنشوفه من موت وألم بيخلي أي حد يسأل ليه ده بيحصل بس دي مرحلة اختبار وفيها الخير والشر مع بعض ربنا سبحانه وتعالى مش محتاج الأذى ولا بيرضى بالظلم لكن بيدي الإنسان حرية وبيكون في حكمة أكبر أحيانًا إحنا مش شايفينها كاملة دلوقتي فكرة يوم القيامة مش مجرد عقاب دي وعد بالعدل الكامل ممكن تقرأي سوره البقره بس بهدوء وفهم
ربنا دايما بيحب يدي البرد على قد الغطا، المتعة في الرحلة والله مش في اني افكر اموت بكرة، و معلش لو كلامي هيضايقك عايزك تفتحي مخك شوية و تفهمي ان الكام سنة اللي هتعيشيهم في الدنيا هم اللي هيحددوا الكام مليون سنة اللي هتعيشيها في الأخرة (فكري في الجملة دي كويس)
في سورة الكهف آية عظيمه بتقول: { وَكَيْفَ تَصْبِرُ عَلَىٰ مَا لَمْ تُحِطْ بِهِ خُبْرًا } ودى من أقرب الآيات لقلبي الحقيقة حقيقي بيبقى صعب على الإنسان بنظرته الدنيوية المحدودة إنه يفهم كل اللي بيحصل حواليه أو يفهم الحكمة المستخبية وراء الابتلاء فـ يا رب ألهمنا الصبر على ما لم نُحِط به، وارضنا بقضائك حتى تظهر حكمتك في كل شيء لقيت دي في بوست افتكرت سؤالك وان في آيات حقيقي بتجاوب علي اسألتنا ربنا مطلع علينا وعارف أن صعب علي الإنسان يصبر ويكمل طاعه طول ماهو مش عارف اي الحكمه من اللي بيعملوا بس ده اكبر اختبار بنمر بيه وخلينا متفقين أن كل الأديان السماوية بتؤمن أن في رب وان في قيامه ف احنا لو اتبعنا اسألتنا يبقي هنعمل فعل اسوء من الناس اللي كان بيتعامل معاهم رسولنا الكريم وكان بيدعوهم للإسلام ف احنا نعمل اي بقاا نصبر ونحتسب صبرنا ده عند ربنا الذي لا تديع ودائعه وان شاء الله نؤجر عليه يوم الحساب
انا مش هتجادل مع حد زيك اكتر من كدا كفاية يوم القيامة اللي انت مش مؤمن بيه نتقابل هناك وتعرف ان الله حق
الإمام ابن تيمية يقول إن اللذة الحقيقية والراحة التامة ليست من طبيعة الدنيا، فلو كانت الدنيا كاملة لما اشتاقت النفوس للجنة وأن مشقة الطريق (الدنيا) تُنسى بمجرد الوصول (الجنة) فالقياس لا يكون بطول التعب بل بعظمة النتيجة زي اكانك لما تكوني في سنه دراسيه صعبه او محنه في شغل او في حاجه جايبه اخرك اول تقبضي او تعدي المحنه او تنجحي بتنسي كل التعب نفس الفكره وفكره المليارات الناس اللي بتموت وغيرهم بيتولدو وامتي ربنا يكتفي والعياذ بالله يعني الكون ليه اجل بينتهي لما كل روح تاخد اختبارها وحقها انتي ركزي على نفسك واتعلمي المفيد وفيدي الناس واعبدي ربنا وسيبك من الاسئله التي لا تفيد بشي دي نصيحه يعني عشان ترتاحي من الوسواس دي وطبيعي اي حد يجيلو حاجه زي كدا بس ميفضلش وراها اتمنى تكوني اقتنعتي شويه وفي شيوخ كتير يوتيوب او على جوجل بيجاوبو على الاسئله بتعتك او اللي شبهها ابحثي وهتلاقي اجابه مرضيه اكتر ربنا يهديكي ويهدينا كلنا ويرزقنا الجنه
اقرأي كتير في السور واستشعري كل ايه بمعناها كويس وقد اي ده كلام بيلمسنا وبيكون موجه لينا كأن ربنا مطلع علينا وقد اي كان الكلام ده بيطبطب علي قلوب الرُسل والأنبياء في وقتها وكمان اقرءي في السيره النبويه وقصص الانبياء في كتب كتير بتناقش اسئله دينيه اتجهي ليها اسأل الله لكي الهدايه واوعديني انك هتكلمي حد من أهل الدين في رقم للأزهر الشريف بيتم الرد علي جميع الاسئله بهدوء أو ممكن تروحي الحسين أو السيده زينك اي جامع كبير بيكون في شيوخ كبار هناك وبيسمعونا وفي حلقات دينيه بتتعمل كل جمعه في المساجد دي مع علماء في الدين
بس بس بس اي التفكير دا ازاي بتحلفي تقولي والله طيب وانتي اصلا مش مؤمنة بالقيامة
الله يسال و لا يُسأل اتقي الله يا بنت
انا فهمي ضئيل و انت سؤالك غبي 👍