أنا محتاجة رأيكم بصراحة جدًا لأنّي في حيرة وتعبانة نفسيًا. أنا اشتغلت شغل كول سنتر من فترة قصيرة، الشغل عبارة عن 9–10 ساعات مكالمات متواصلة تقريبًا بدون راحة كفاية، وأنا لسه في فترة تدريب فكل مكالمة بتبقى فيها ضغط عليا ومحتاجة أتعلم وأسأل وأنا شغالة. حاسة إن الضغط عالي جدًا عليا ومفيش وقت أتنفس أو أرتاح، ومش قادرة نفسيًا أستحمل فكرة إني أنزل الشغل تاني. في نفس الوقت، باقي لي حوالي 10 أيام عشان أقبض تقريبًا 1500 جنيه، وجزء مني بيقول استحملي عشان الفلوس، وجزء تاني بيقول مش قادرة أكمّل ومش مرتاحة خالص. أهلي بيقولوا كمّلي عشان متندميش، وأنا فعلًا خايفة أسيب وأندم، وخايفة أكمّل وأنا بتعب أكتر. أنا محتارة بين: - أكمل كام يوم وأقبض وأستحمل الضغط - أو أسيب الشغل دلوقتي وأحافظ على نفسيتي حتى لو خسرت الفلوس أنا مش عارفة أقرر ومحتاجة رأيكم بصدق.
اهربى بجد ال ١٥٠٠ متسويش صحتك النفسيه اللى هتروح
ولو المكان ضغطة زيادة وعايزة تكملي في الشغلانة شوفي شركة تانية وانتي شغالة وروحي من شغل على شغل
بقالك اد ايه في الشغل دا
كملي تجربتك للاخر وكل اما تمسكي خيط اتعودى تجيبي اخره ومتبطليش الا لو جبتي أخره عشان متندميش علي حاجه فاتتك انا عارف الشغل ده لاني اشتغلته وكميه الضغط فيه بس طالما شغل وفي غيري قادر يشتغله يبقي انا كمان أقدر وبعد فتره قييم التجربه ونشوف جبنا اخرها والا لسه شويه انما انت لسه في الاول..
بصي مش عايز اجرحك ولا حاجه يا اخويا بس لو مش مرتاح أو قادر اكمل سيب الشغل وخد 1500 جنيه و 4500 جنيه مرتب ده قليل اوي علي شغلانه المجهود و التعب ده ربنا يكرمك و تلاقي شغل احسن بمرتب احسن و مش فاهم ليه تخسري الفلوس
بصى انتى راحتك النفسية اهم وكل حاجه بس حرام انك تشتغلى كل ده وتتعبى وف الاخر الفلوس تضيع عليكى حاولى تانى مع نفسك لو مقدرتيش خلاص