الجملة اللي بابا قالهالي في العربية قبل اهم امتحان في حياتي كسرتني اوي كنت داخله امتحان في بلد ما ، هو زي ثانوية عامة في مصر بس نظام مختلف، المهم كنت خايفه و كانت اصلا فترة صعبه اوي عليا قولت لبابا و احنا في العربيه "ياه.. تخيل يا بابا اجيب الدرجة الي عيزاها؟" قال بانزعاج "درجة الي عيزاها ايه يا حبيبتي؟ احنا مدخلينك الامتحان عشان تجيبي درجة وحشه و نثبتلك ان الهبل الي كنت بتعمليه ده مسموش مذاكره" جرحني اوي و سكتت طول الطريق، و دخلت الامتحان متوترة، بس توكلت على الله و حليت كويس اوي طلعت رحت عشان اقوله الخبر الحلو ، اول ما بصيت في عيونه ممسكتش نفسي و عيطت، مش عشان كنت زعلانه بل كنت فرحانه اوي، عيطت من الفرحه ، شهور من التعب و الضغط النفسي انتهت قولت بصوت متقطع من العياط "بابا الامتحان كان تحفه بجد انا مش مصدقه!" قالي "طب الحمد لله" بعدين لما لقاني فرحانه اوي و مكمله عياط، قال "متفرحيش اوي كده ايه الي يضمنك انك مغلطتيش ، استنى لما النتيجه تطلع" و جرحني تاني ، كان دايما بيقولي اني مبذاكرش و مبعملش الي عليا رغم انه مش شايف كنت تعبت قد ايه ملحوظه، ابويا طيب اوي، بس هو كان مفكر انه بيحميني من الالم الي هحسه لما مجبش درجة حلوة المهم للي عنده فضول يعرف النتيجه.. جبت الدرجه الي عيزاها و محدش كان مصدق الخبر و دخلت طب بشري برغبة ابويا
خلاص انتي ممكن تحسبيها انو كان بيفوقك وانك اخدتي الكلام دا تحفيز+ الرجاله عموما مش بيعرفو يختاور كلامهم فاهمة يعني ممكن يكون بيموت فيكي بس كلامو الي هوا عادي
هقولك موقف هوا المفروض يدايق بس انا بضحك عليه مره كنت قاعد مع خالي وخالي دا حرفيا في مقام أبويا الله يرحمه فالمهم انا وهوا قاعدين وكان في قرايبنا فيتكلم معايا بيقولي ناوي تعمل اي في مستقبلك والكلام دا قلتلو عايز اخد كورس انجليزي قالي طب انت مثلا في مستوي اي ف الانجليزي رديت بكل تلقائيه قولتلو medium قالي انت كدا مشغل الفرن مش بتتكلم انجليزي المهم يعني كلو الي قاعدين ضحكو حتي انا الصراحه مع ان فيها احراج بس بحاول اقولك ان حرفيا بباكي بيحبك وممكن يكون شبهنا كلنا ومبيعرفش يزوق الكلام
اديكي قولتي كان بيحاول يقلل طموحك علشان متزعليش بصي هو بابا غبي شويه أغلب ابهات كدا معتقدين أنهم لما يقلله من مجهودك انت كدا هتتشجع و تنتج اكتر فا معلش هو بيحبك بس مش بيعرف يعبر صح
طيب انتي المفروض فاهمه بباكي كويس وزي ما حضرتك قولتي انو طيب وبيحاول يحميكي من اثر صدمه شبه دي المفروض دي تبقي ذكري حلوه شويه صح؟